Home Hudicial Hues a baha castigo exigi di 10 aña pa 5 aña di...

Hues a baha castigo exigi di 10 aña pa 5 aña di prison pa homber cu a kap otro homber mata

278
0
SHARE
- Advertisement -

E no ta haya proba mata intencional sino maltrato cu consecuencia morto

ORANJESTAD (AAN) – Ayera merdia e homber Franklin Sanchez (51) di Santo Domingo biba na Aruba, a presenta dilanti Hues pa scucha su sentencia. Algun siman pasa tratamento di e caso a sosode caminda F.S. a bisa Hues cu el a wordo educa cu hopi principio y respet. E no ta acepta e forma con e homber M.S., tata di Marlon, ta abusa di su yiu muher. Si M.S. a bay haci esey cu su yiu homber den e lugarnan di prostitucion ta su asunto pero no cu su yiu muher.

Hues a puntr’e kico a pasa cu el a coy e machete. Segun Franklin, el a coy e machete cu e ta usa pa cultivacion di mata, hinca den un saco y sali bay for di cas y bay na cas di Marlon. El a bisa Hues cu e no sa mes kico e tabata haci. El a perde cabez ora e como tata ta tende di su señora kico a pasa cu su yiu muher.

Ta asina cu Marlon, cu ta e amigo di e yiu muher, a bay cu e yiu muher na su cas y a laga su tata M.S. abusa di e yiu muher, mientras cu e tabata para mira.

EXIGENCIA DI FISCAL

Fiscal a bisa cu e ta haya legalmente proba cu Franklin a kap Marlon cu machete. Video di seguridad di un botica ta mustra claramente con Franklin a ataca Marlon di lomba ora cu Marlon a bay habri porta di cas. El a kap cu forza na pia abao di Marlon, kende a core bay y a fayece. Tin dos testigo a mira con Franklin a core bay riba Marlon y kap cu forza. Patologo a constata cu door di kap hopi hundo bao rudia a corta addernan cu a causa porta. Frankilin a bisa cu e tabata kier duna Marlon un les y no tabata su intension di mat’e.

Mustra riba dos sentencia di casonan na Aruba caminda hincamento un ta 10 aña y e otro 11 aña di prison. Tene ce. Exigi 10 aña di prison. Pa loke ta demanda di daño, 9600 ta entiero ta aceptabel pero no e inmaterial. Fiscal a bisa cu no por papia di defensa propio sino mas bien venganza.

DEFENSA

Mr. Canwood a bisa Hues cu Franklin a admiti di loke el a haci. Sinembargo e ta haya cu no mester perde for di bista e circunstancia cu a pone Franklin a haci asina. Como tata di e yiu muher cu a wordo abusa, el a actua asina. El a dal Marlon un biaha so cu machete y despues el a bay entrega su mes. El a bira emocional ora el a tende di su señora cu su yiu muher a wordo viola door di tata di e amigo di su yiu y cu autorizacion di e amigo di su yiu. Franklin no ta duda den su yiu muher. Franklin a perde cabez y te cu awe e yiu muher ta bao tratamento di psicologo. Franklin a kere den su yiu su palabra y no ta kere cu su yiu ta bay ganja. No tabata su intension di mata Marlon. El a dal un biaha so. Si realmente e tabata kier a mata, e lo a sigui dal cu e machete cual no ta asina. El a haci un movecion pa dal di dos biaha pero no a sigui cu esaki. No por papia di asesinato pasobra e no tabatin plan pa asesina y tampoco premedita. Haya cu aki por papia di defensa propio. El a dal na e pia no cu intension di mata.

Aparentemente door cu Marlon a core bay y e amigonan a hink’e den auto pero no a bay di biaha promer auxilio. E ta kere cu aki por papia di a maltrata cu machete no cu intension di mata. Menciona sentencia caminda e persona condena na 10 luna di prison. Haya cu loke a sosode no a shock comunidad. Ningun hende ta tuma Franklin na malo di loke a sosode. Pidi Hues pa duna Franklin castigo igual na loke el a sinta caba. Haya cu no por compara e caso aki cu esnan cu Fiscal ta menciona. Haya cu e circunstancia di Franklin ta completamente diferente cu esnan cu Fiscal ta menciona. Haya cu mester rechaza demanda di daño. Haya cu ta mucho compleho y cu lo tin otro a paga pa e entiero.

SENTENCIA

Hues a bisa cu e acusacion contra Franklin ta cu dia 30 Mei 2019 a asesina Marlon of maltrato severo cu consecuencia morto. Franklin a admiti di a kap Marlon cu machete na su pia. Door di esaki Marlon a fayece.

NO INTENCION DI MATA

Hues a bisa cu e pregunta ta con mester cualifica esaki. Hues ta haya cu Franklin no a planea pa mata Marlon. E otro pregunta ta si su intension tabata di mata. Hues a mustra cu Franklin a bisa cu no tabata su intension di mata. Na opinion di Hues, sinembargo, e forma con Franklin a actua tabata di tal manera cu e consecuencia ta fatal. A ataca Marlon di patras y dal’e cu machete na su pia parti abao. Hues a bisa cu por a mira riba video cu Franklin tabata di buk ora el a zwaai cu machete. Hues ta haya cu esey ta mustra cu no tabata Franklin su intension pa mata. Hues a bisa cu e situacion tabata otro si a dal cu machete den pecho. Hues a dicidi cu e no ta haya proba cu intencional Franklin tabatin intension di mata.

NO DEFENSA PROPIO

Hues ta haya proba cu Franklin a maltrata Marlon cu e machete cu consecuencia morto. Hues a bisa cu abogado mr. Canwood a mustra cu Franklin a actua den defensa propio ora a tende kico a pasa cu su yiu muher. Hues a bisa cu e no ta di acuerdo cu esaki. El a rechaza e ponencia di defensa propio.

Hues ta haya Franklin culpabel di maltrato severo di Marlon (24) na su pia abao cu consecuencia cu el a fayece. Hues a bisa cu Franklin a kita bida di Marlon.

CASTIGO MENOS

Pa cu e castigo, Hues a bisa cu e ta tene cuenta con tur cos a sosode. Ta aceptabel cu durante e incidente Franklin no por a pensa bon door di loke el a tende cu Marlon y su tata a viola su yiu muher. Hues a tene cuenta cu despues di a dal cu e machete Franklin a entrega su mes na Polis. Ta na Polis el a scucha cu Marlon a fayece door di e kap. Hues a sigui bisa cu Franklin a coopera cu e investigacion. Ta promer biaha cu e ta wordo deteni. Tambe e raport di psicologo ta mustra cu e ta responsabel. A tene cuenta cu sentencianan pa casonan similar.

Hues a bisa cu e ta baha e castigo di 10 aña di prison cu Fiscal exigi door cu ta otro delito. El a condena Franklin na 5 aña di prison, kitando e tempo cu e ta sera. Pa loke ta demanda di daño cu e tata di Marlon a haci, Hues a aproba e gastonan di entiero cu ta algo mas cu 9 mil florin. Hues no a aproba e demanda di daño inmaterial. E ta haya cu esaki den e caso aki ta hopi complica. Hues a pone e medida di pago contra Franklin.

 

- Advertisement -

DUNA COMENTARIO

Please enter your comment!
Please enter your name here