Home General Minister di Salubridad a revela cu un Arubiano ta bira Director Financiero...

Minister di Salubridad a revela cu un Arubiano ta bira Director Financiero di hospital

1231
0
SHARE
- Advertisement -

ORANJESTAD(AAN): Diahuebs Minister di Turismo y Salubridad Dangui Oduber durante un conferencia di prensa a papia di e situacion na hospital.

E mandatario a splica cu aña pasa a manda un carta hopi fuerte pa Raad van Toezicht di hospital, pa mustra e malcontento riba con e situacion ta na hospital despues di e caso di hacking cu a tuma lugar na November.

“Tabata tin cartanan tambe di specialistanan, kende a expresa nan malcontento riba e situacion preocupante na hospital”.

“Pesey mi a manda un carta pa e Raad van Toezicht pa pidi nan pa entrega nan retiro”.

“E statuut no ta permiti Gobierno pa retira e miembronan di Raad van Toezicht”.

“Despues di e carta aki e asociacion di specialista a entrega un mocion di desconfianza contra e Raad van Bestuur, cu na e momentonan aki ta consisti di solamente 1 persona, esta Ezzard Cilié, cu ta e Director Medico di hospital”.

Esaki segun Oduber, kende a indica cu despues di esaki e Raad van Toezicht a dicidi di no continua cu Cilié na trabao.

“E unico motibo pakico Cilié ta canando rond ainda na hospital ta pasobra e Raad van Toezicht ta buscando un reemplazante temporal pa fungi como un director medico interino, pa hospital no keda sin bestuur”.

“Hospital su vacaturanan no a wordo yena na tempo, pero awe mi por anuncia cu e vacatura di Director Financiero porfin ta bay wordo yena”, segun Oduber, kende a indica cu e posicion ta bay wordo yena pa un persona local, kende e siman cu ta bin ta bay firma e contrato laboral cu hospital.

E mandatario a bisa cu e persona aki ta bay cuminza cu su trabao oficialmente riba prome di April.

“Pa loke ta e Raad van Toezicht mes, ami y Prome Minister tambe tabata tin un encuentro cu nan y a haci e mesun peticion na nan pa entrega nan retiro, considerando tanto cos cu ta bayendo robez”.

“No tabata tin control, no tabata tin supervision y tabata tin mal maneho y nan tambe tabata responsabel pa esaki”.

“Nan a compromete nan mes cu Gobierno cu nan tambe ta bay entrega nan retiro, unda cu nan ta bay traha un asina yama aftreed rooster”.

“Si tur cos ta bon y nan tene nan mes na nan palabracion, nan lo entrega nan retiro riba prome di Februari, prome di Maart y prome di April, como cu ta tres miembro ainda tin cu tuma nan retiro”, segun e mandatario, kende a indica cu ora cu e tres personanan aki tuma nan retiro, Gobierno ta bay haya e espacio pa bin cu un Hunta nobo di Supervision y pa cambia e maneho na hospital, unda cu lo busca un Director Financiero permanente y busca un director general pa hospital.

“Asina nos ta yena e 3 cabeznan di bestuur, cu no tabata e caso”.

“E intencion ta pa nos yena tur e vacaturanan ey y cambia e situacion na hospital, pa mehora e cuido, mehora e servicio, baha e tempo di espera na Spoedeisende Hulp y baha e listanan di espera”.

“Hopi cambio nos kier haci”.

“Si bo wak ImSan, eynan tur cos ta canando hopi bon”.

“E inversionnan cu a wordo haci sigur ta na beneficio di comunidad di Aruba pa un mihor cuido y un mihor servicio”.

Esaki segun Oduber, kende a sigui bisa cu hospital tin hopi hende capacita, hopi hende cu kier mira cambio y tin hopi hende dispuesto pa traha y yuda cu bon cambionan.

El a indica sinembargo cu e management cu tabata tin no a percura pa esaki.

“Mi ta kere cu, cu un comienzo nobo sigur nos ta bay logra cumpli cu e proposito y cumpli cu nos maneho y vision pa loke ta trata cuido medico y salud publico en general na Aruba”, segun e mandatario.

 

- Advertisement -

DUNA COMENTARIO

Please enter your comment!
Please enter your name here