Home Hudicial Ministerio Publico a apela castigo abou pa homber cu a kap otro...

Ministerio Publico a apela castigo abou pa homber cu a kap otro mata

227
0
SHARE
- Advertisement -

Hues a baha e exigencia di 10 pa 5 aña di prison

ORANJESTAD (AAN): E lamentable caso di kapmento cu machete caminda e homber Marlon a perde su bida, lo bay Corte Superior.

Asina DIARIO a conclui despues di a haya e informacion cu Ministerio Publico ta apela e sentencia di Hues di Corte den Promer Instancia.

Por a compronde cu Fiscal no ta di acuerdo cu e decision di Hues caminda a castiga e homber Franklin Sanchez (51) di Santo Domingo na 5 aña di prison.

EXIGENCIA DI FISCAL

Aña pasa December 2019 durante tratamento di e caso penal contra Franklin Sanchez, Fiscal a bisa cu e ta haya legalmente proba cu Franklin a kap Marlon cu machete. Fiscal a mustra cu riba e video di seguridad di un botica, ta mustra claramente con Franklin a ataca Marlon di lomba ora cu Marlon a caba di yega cas y a bay habri porta di cas.

El a kap cu forza na e pia abao di Marlon, kende a core bay y a fayece. Tin dos testigo a mira con Franklin a core bay riba Marlon y kap cu forza. Fiscal a bisa cu patologo a constata cu door di kap hopi hundo bao di e rudia a corta addernan cu a causa morto di Marlon. Fiscal a exigi 10 aña di prison y tambe ta haya e demanda di daño pa cubri e gastonan di entiero cu ta algo mas cu 9600 florin na su lugar.

DECISION DI HUES

Hues a bisa cu e acusacion contra Franklin ta cu dia 30 Mei 2019 a asesina Marlon of maltrato severo cu consecuencia morto. Franklin a admiti di a kap Marlon cu machete na su pia. Door di esaki Marlon a fayece.

Hues a mustra cu Franklin a bisa cu no tabata su intension di mata. Na opinion di Hues, sinembargo, e forma con Franklin a actua tabata di tal manera cu e consecuencia ta fatal. A ataca Marlon di patras y dal’e cu machete na su pia parti abao.

Hues a bisa cu por a mira riba video cu Franklin tabata di buk ora el a zwaai cu machete. Hues ta haya cu esey ta mustra cu no tabata Franklin su intension pa mata. Hues a bisa cu e situacion tabata otro si a dal cu machete den pecho. Hues a dicidi cu e no ta haya proba cu intencional Franklin tabatin intension di mata.

Hues a rechaza e defensa su punto di defensa propio.

Hues ta haya Franklin culpabel di maltrato severo di Marlon (24) na su pia abao cu consecuencia cu el a fayece. Hues a bisa cu Franklin a kita bida di Marlon.

CASTIGO MENOS

Pa cu e castigo, Hues a bisa cu e ta tene cuenta con tur cos a sosode. Ta aceptabel cu durante e incidente Franklin no por a pensa bon door di loke el a tende cu Marlon y su tata a viola su yiu muher. Hues a tene cuenta cu despues di a dal cu e machete Franklin a entrega su mes na Polis.

Ta na Polis el a scucha cu Marlon a fayece door di e kap. Hues a sigui bisa cu Franklin a coopera cu e investigacion. Ta promer biaha cu e ta wordo deteni. Tambe e raport di psycolog ta mustra cu e ta responsabel. A tene cuenta cu sentencianan pa casonan similar.

Hues a bisa cu e ta baha e castigo di 10 aña di prison cu Fiscal exigi door cu ta otro delito. El a condena Franklin na 5 aña di prison, kitando e tempo cu e ta sera. Pa loke ta demanda di daño cu e tata di Marlon a haci, Hues a aproba e gastonan di entierno cu ta algo mas cu 9 mil florin. Hues no a aproba e demanda di daño inmaterial. E ta haya cu esaki den e caso aki ta hopi complica. Hues a pone e medida di pago contra Franklin.

APELA SENTENCIA

Investigacion cu DIARIO a haci ta mustra cu Fiscal no a keda contento cu Hues a baha e castigo asina abou.

Despues di e sentencia, tabatin evaluacion na Ministerio Publico y a dicidi cu ta apela e sentencia aki.

Esey ta nifica cu posiblemente e aña aki ainda, Hof di Corte Superior lo trata e caso aki.

 

- Advertisement -

DUNA COMENTARIO

Please enter your comment!
Please enter your name here