Home General Na Februari proximo barco cu fruta y berdura di Santo Domingo pa...

Na Februari proximo barco cu fruta y berdura di Santo Domingo pa Aruba lo drenta waf

536
0
SHARE
- Advertisement -

Edward McCollum di Consulado Dominicano:

ORANJESTAD (AAN) – Edward McCollum, Funcionario di Consulado di Republica Dominicana na Aruba, den un entrevista cu DIARIO a duna un informacion importante, tocante yegada di barco doña Luisa na waf di Barcadera, cu fruta y berdura di Santo Domingo, for di entrante Diadomingo 9 di Februari anochi.

McCollum a menciona cu nan tin mas di cinco aña trahando riba un estrategia pa por bin cu un barco apropia pa Aruba. Ya den pasado Aruba tabata importa productonan asina di Santo Domingo, pero esaki a stop pasobra tabata un barco hopi grandi.

A keda papia cu hopi doño di barco te cu ultimamente a sinta cu Don Andres di Corsow, y e union cu a forma den e estrategia cu a haci den ekipo, y e Consul di Republica Dominicana na Corsow cu a haci un tremendo trabao aya, te cu e barco a cuminza yega Corsow caba, como siete biaha un bez pa siman, cu un cantidad di container cu productonan fresco y di bon calidad.

E estrategia ta pa e barco bin Aruba tambe, saliendo for di Santo Domingo tur Diabierna y yegando Aruba Diadomingo anochi. Kiermen den 38 pa 39 ora e barco lo ta na Aruba, y esey ta nifica cu lo ta e prome barco cu ASTEC lo baha Dialuna tempran, tur siman. Esaki ta un manera pa bin cu un bon logistica pa Aruba.

Don Andres ta hopi conoci y tur hende sa cu tin hopi aña ta trahando y e tin e conocemento y experiencia suficiente den e maneho di cierto productonan frio of seco, y kico por bin y kico no, sr. McCollum a subraya.

Señor McCollum a haci enfasis riba e calidad di e productonan cu ta hopi halto, mescos e variedad y esaki ta hopi importante. El a haci un yamada na e comerciantenan cu ta desea di obtene y ofrece e consumidor local bon productonan, pa nan y pa pueblo na un prijs hopi razonable.

E prome barco ta sali Diabierna 7 di Februari di Santo Domingo, y ta yega Aruba Diadomingo 9, den oranan di anochi. E barco ta yama doña Luisa y tin un capacidad pa 30 containers. McCollum ta convenci cu comercio y consumidor lo duna e barco y e productonan cu ta basta scars na Aruba aworaki, un bon bini.

 

- Advertisement -

DUNA COMENTARIO

Please enter your comment!
Please enter your name here