Home Hudicial PG a exigi pa subi castigo pa muher cu a tira Sky...

PG a exigi pa subi castigo pa muher cu a tira Sky mata den Rancho

5874
1
SHARE
- Advertisement -

E ta haya e sentencia di 10 aña mucho abou

ORANJESTAD (AAN): Dialuna den oranan di merdia te den oranan di atardi, a trata e apelacion di Ministerio Publico riba e sentencia den e caso penal contra Zacharry Quandt, kende a worde haya culpable di a tira mata Hubert Arrindell (Sky).

Fiscal a exigi 18 aña di prison y Hues a condena Quandt na 10 aña di prison. Ademas di e apelacion aki, a trata tambe e apelacion di Ronaldo Norton, contra su sentencia di 4 aña di prison di cual 1 aña ta condicional, como complice di a tira mata Sky riba 18 Augustus 2018. Abogado di Norton a apela pasobra e ta haya cu Norton no ta complice.

Ta asina cu e casonan a worde trata hunto pero separa. DIARIO den e articulo aki ta concentra riba e caso di Quandt y den un otro articulo ta bay riba e caso di Norton.

   ACUSADO TA LAMENTA DI A TIRA SKY MATA:

Presidente di Hof a informa cu Quandt a bisa cu no tabata su intencion di mata pero ta admiti di a tira. E president a remarca cu dos dia despues di e tiramento di 18 Augustus 2018, Sky a muri.

Presidente di Hof a bisa cu e kier punto di bista di Procurador General (PG) y abogado mr. Lejuez riba esaki. E ta haya cu esaki ta un punto huridico pa determina si ta door di e tiro Sky a fayece of otro cos cu no ta relaciona cu e herida di bala.

Hof a puntra Quandt con e ta pensa di e caso awor. El a bisa cu e ta lamenta hopi. E dia ey e tabata bou influencia di alcohol y marihuana. El a bisa cu si e por a hala tempo back, e lo no a haci’e. El a bisa cu no tabata su intension di tira Sky mata y cu tabata un locura. El a bisa cu e tin un yiu cu ta bay haci 5 aña y ta sinti su falta. Su mama ta wak pa e yiu. El a bisa cu ta duele loke a pasa y pesey el a entrega su mes pa e sinta pa loke el a haci. El a bisa cu ainda e ta soña cu loke a sosode. Ariba pregunta di abogado mr. Lejuez, Quandt a bisa cu e kier cambia su bida. E kier bay biba na Hulanda cu su yiu.

   PG A EXIGI PA SUBI E CASTIGO:

PG ta haya legalmente proba cu Quandt a tira. Pa loke ta e cuestion cu Presidente di Hof a puntra riba e fayecimento di Sky dos dia despues, PG a bisa ley ta bisa cu si bo a ocasiona algo, bo ta responsabel pa e consecuencia. Den e caso aki Sky a worde tira den Rancho y e bala a causa infeccion na su tripanan cu consecuencia cu el a fayece. El a worde hiba hospital y a haya tratamento pero despues el a bay for di hospital.

Segun PG, kico tabata e motibo no ta conoci. E dokter cu a atende Sky a fayece. Esey ta haci cu ta dificil pa haya sa si kico a pasa cu Sky despues cu el a worde hiba hospital.

Na opinion di PG, hende cu a haci algo malo, e ta responsabel pa e consecuencia. Apesar cu si ta Sky a deshaci di tratamento y bay for di hospital, Quandt ta responsabel. PG ta haya cu tin un relacion directo entre e tiramento y e morto di Sky.

Pa loke ta e castigo, PG a bisa Hof cu Fiscal den Corte den Promer Instancia a exigi 18 aña pa asesinato, dos intento di asesinato y posecion di arma. Na opinion di PG, Hues no ta haya proba asesinato sino mata. PG por compronde e punto di bista di Hues cu a condena Quandt pa mata y posecion di arma. PG no ta comparti esaki. E ta haya cu e auto a pasa, Quandt a habri bentana y los tres tiro. A tira riba un grupo di hende. Esaki ta un intento di mata. A tira Sky cu consecuencia cu el a fayece, esaki ta mata. Na opinion di PG, e castigo di 10 aña no ta mustra e seriedad di e caso.

PG a remarca cu dos intento di mata y un mata, e castigo di 10 aña no ta suficiente. El a bisa cu e tin comprension cu Quandt ta hoben pero e forma con e tabata den auto y ta bay tira sin ningun motibo, esaki no por. PG ta haya cu mester manda señal bon cla cu no ta tolera esaki. PG a exigi 12 aña di prison. PG a bisa cu a scucha Quandt bisa cu e tabata un locura. El a remarca cu e locura aki a causa bida di Sky y por a causa bida di dos otro persona.

   DEFENSA:

Abogado mr. Lejuez a bisa Hof cu patologo a constata cu Sky a fayece door cu e bala a perfora su tripa. Ademas e patologo a constata otro complicacionnan. El a bisa cu a constata cu Sky su celebro a hincha. Esaki ta consecuencia di adiccion na droga. E abogado ta bisa cu e posibilidad ta existi cu door di e hinchamento di celebro hunto cu e complicacion di tripa a causa morto di Sky.

Mr. Lejuez a bisa Hof cu Quandt a scoge pa para responsabel pa loke el a haci y a acepta su castigo di 10 aña di prison. E abogado ta haya cu corectamente Hues a duna sentencia y no a bay tras di exigencia di Fiscal di 18 aña. E abogado ta haya cu Hues a tene debido cuenta cu tur cos y ta haya e castigo na su lugar.

Mr. Lejuez a bisa Hof cu ta promer biaha cu Quandt ta cay sera y ta hoben.

E ta haya e hecho cu Sky a bay for di hospital y no tabata kier tratamento, mester worde teni na cuenta y ta haya cu esaki mester suavisa e castigo. El a pidi Hof pa tene cuenta cu Quandt a bisa cu e ta studiando y kier cambia su bida. El a mustra cu Quandt a bisa cu ta duele loke a pasa y ainda ta haya molester di esaki den soño. E abogado a pidi Hof pa si ta posibel baha e castigo.

Hof a sera tratamento di e caso y a bisa cu dia 10 Februari 2020 lo tin sentencia.

- Advertisement -

1 COMMENT

DUNA COMENTARIO

Please enter your comment!
Please enter your name here