Home Policial Polis un biaha mas investigando otro menaza serio di School Shooting

Polis un biaha mas investigando otro menaza serio di School Shooting

498
0
SHARE
- Advertisement -

Colegio Arubano y Mon Plaisir College MAVO

ORANJESTAD (AAN): Tabata Diaranson anochi laat, for di alrededor di 11:00 pm caba cu un mensahe a cuminza circula principalmente riba Whatsapp, entre alumnonan di Colegio Arubano, y tambe alumnonan di Mon Plaisir College MAVO.  E momento ey falta como 60 minuut ainda pa dia caba.  E mensahe a cuminza plama mas y mas entre e alumnonan cu ainda ta lanta.

Pero hopi ya tabata na soño, y apenas mainta despues di 6:00 am a spierta y lesa e mensahe aki.  Pues ya pa 6:30 am, ta casi tur alumno a haya e ‘forwarded message’ aki cu a spanta no solamente e hoben, sino tambe e mayornan.

Un hende a skirbi e mensahe cu via di informacion confiable, el a haya sa cu lo bay tin Diahuebs “un shooting na scol”.

Sea e ta un chiste di mal gusto, of un mensahe di credibilidad, toch el a pone hopi adulto cuminza notifica otro mayornan.

Consecuencia di esaki ta cu e mensahe tambe a yega na Rectorado di Colegio Arubano, y mesora nan a actua y notifica autoridadnan.  No ta conoci si acaso esey a pasa cu Directiva di Mon Plaisir College MAVO (cu ta situa net banda di Colegio Arubano).

E menaza aki a pone Diahuebs mainta cu hopi mayor a simplemente tuma decision, cu nan no ta manda nan yiu scol.  “Better safe than sorry”.

Dirigentenan di scol tambe a manda un mensahe riba social media, indicando cu nan ta na altura di e mensahe cu a plama door di alumnonan riba Whatsapp di un ‘school shooting’.  Nan a reforza security y ta pidi tur hende pa ta alerta, sinembargo a desmenti cu a haya menaza nobo.

Tabatin Polis henter mainta tur rond di e scolnan di Mon Plaisir y Colegio Arubano.

Na Mon Plaisir College tambe a tuma extra medida cu Security, den consulta directo cu Polis, y tambe e personal pa asina ta extra vigilante durante ora di scol di Diahuebs.

Ora cu Polis a haya sa di e asunto aki, como precaucion nan a bay patruya y observa e situacion na e dos scolnan aki riba Klip.

Vocero di Polis pa 8:43 am a confirma cu Cuerpo Policial  ta haciendo su investigacion. E caso ta worde trata cu prioridad y seriedad di parti di Cuerpo Policial.

Banda di 11:15 am, vocero a bolbe duna un boletin, bisando cu no tin ningun motibo pa crea panico mirando cu tin hopi speculacion riba rednan social. Cuerpo policial ta haciendo su investigacion y e tin e situacion bao control.

MEDIDA NA COLEGIO:

Dialuna cu a pasa, a duna un update y presentacion en general encuanto ‘school-shooting’ na e docentenan y personal di scol.  Esaki a worde haci door di e seccion di Prevencion di Cuerpo Policial.

A ser mustra cu desde November aña pasa caba a reforza e plan di Seguridad na un forma mas estricto.  Cu Ministro di Enseñanza y Ministerio di Husticia a tene contacto encuanto posible pasonan cu ta bay tuma pa garantiza un scol sigur.

E siguiente paso ta pa bay duna informacion y training na e alumnonan.  Meta di esaki ta pa habri caminda cu den klas por discuti y papia di e peligronan cu por topa cune.

Colegio Arubano ta sigui controla alumnonan, y pesey ta necesario pa nan tin e Colegio-Caart den nan poder ora nan ta cana riba tereno di scol, incluyendo nan uniform di scol.  Colegio tin confianza den e expertonan cu ta sostene nan, y tin comunicacion constante cu Cuerpo Policial.   BUSCA YIUNAN:

Ministerio di Husticia a emiti un boletin tambe banda di 11:35 am, mustrando cu contrario na informacion emiti den prensa, ningun momento Rectorado di Colegio Arubiano riba Diahuebs mainta a haci peticion pa mayornan bay busca nan yiu for di scol.

Bureau di Minister, cu Cuerpo Policial conhuntamente cu dirigentenan di e scolnan concerni a tuma pasonan pa sigura e seguridad di cada mucha na Mon Plaisir College y tambe Colegio Arubano for di siman pasa. Ademas pasonan firme ta worde tuma pa cu siguridad na tur scol.

Cuerpo Policial y leiding di e scolnan ta mantiendo alerta pa cualkier eventualidad. No tin motibo pa panico, y Ministerio a bisa cu nan ta lamenta cu un medio di comunicacion a crea panico innecesario.

Sinembargo algun mayor a splica DIARIO, cu varios alumno simplemente a keda basta traumatiza di loke ta pasando, y a hasta bay pidi permiso na Rectorado pa nan bay cas.

   MENAZA:

Algo cu si tur hende ta di acuerdo cune, ta cu mester impone castigo pisa riba esnan cu ta comete e acto menazante aki, y ni maske e ta un joke.. e tin di haya castigo severo.

Kizas algun hoben ta kere cu como cu e mensahenan di Whatsapp ta ‘encrypted’ y pesey autoridad lo no haya sa kende a manda e mensahe original.  Nan ta bon ekiboca den esey, como cu e compania Facebook Inc. (cu ta doño di Whatsapp) semper ta duna cooperacion completo na tur Autoridad Hudicial rond mundo.

Pues abo cu a manda e mensahe ey, djis warda un tiki y autoridad lo bin bati na bo porta.  Mensahenan via Whatsapp tin aun mas ‘precision’ pa haya sa ken a mande.  Nan ta djis cuadra bo IP-Address cu e number di telefon, y no tin forma pa core bay sconde mas.

Esaki ta e di dos caso cu ta pasa den poco tempo na Colegio Arubano.  E prome a socede net ora cu CP y SE Week ta cuminza, y a afecta varios alumno cu a bira nervioso di e menaza aki.

E biaha aki, net CP week ta cabando y toch tin hopi alumno cu ya caba a finaliza di nan.  Pero toch loke e persona cu a skirbi e mensahe aki a haci, ta crea incertidumbre den seguridad di e alumnonan.   Si acaso ta un alumno mes a skirbi e texto original, su futuro como alumno na scolnan na Aruba ta core riesgo.  Djis sinta warda ki ora Recherche yega bo cas, of bay entrega bo mes na e Warda di Polis mas cercano.

Esnan cu tin tip, cu por ta reconoce e estilo di skirbi den e texto, ta ser pidi pa contact e Tipline di Polis na 111-41 pa bisa algo.  Bo ta keda anonimo.

- Advertisement -

DUNA COMENTARIO

Please enter your comment!
Please enter your name here