Home Parlamento Prome Minister nunca a haci esfuerso pa percura pa reapertura di refineria

Prome Minister nunca a haci esfuerso pa percura pa reapertura di refineria

79
0
SHARE
- Advertisement -

Parlamentario Mike de Meza

ORANJESTAD (AAN): Dos aña largo pueblo por a tuma nota cu Prome Minister Evelyn Wever Croes, simplemente no tabata interesa pa sirbi interes di e refineria na San Nicolas, ya cu e no a haci esfuerso algun pa trata di sigui cu ehecucion di e plan di reapertura di e refineria.

Miembro di fraccion di AVP, sr Mike de Meza  a mustra cu na momento cu Prome Minister na fin di aña a declara cu ta miho CITGO bay for di Aruba, esaki no tabata sorpresa pa ningun hende, ya cu nunca el a haci un esfuerso pa atende interes di e refineria manera mester ta.

“Prome Minister Evelyn Wever Croes manera ya caba pueblo sa, nunca ta sincero cu pueblo y dia cu el a forma un grupo como lider di oposicion pa bay para dilanti porta di refineria y hasta duna nomber na e “Plasa Ora Cero’, e no tabata sincero y pueblo a haya sa di su mentiranan ora cu el a drenta gobierno y haci net lo contrario y a castiga pueblo cu medida.

Ta mesun Prome Minister aki  a sigura pueblo cu e lo atende y soluciona e situacion financiero di pais Aruba sin cu e mester tuma medida pero e tin dos aña rancando miyones y miyones for di cartera di pueblo.

Awo cu ta sali na cla cu e comedia cu el a hunga yamando Minister Glenbert Croes pa un heroe ora cu a logra un acuerdo cu CITGO, ta bolbe confirma e caracter falso y mentiroso cu Evelyn tin y awor ta confirma cu e no kier e refineria di San Nicolas habri.

Un Prome Minister cu tin boca yen bisando tur ora cu e ‘hende ta central’ no a mustra ni un tiki compasion pa un grupo grandi di trahadonan den e refineria, cu na fin di 2019 a wordo informa cu no tin trabou mas y cu nan tin cu bay cas.

Evelyn no a menciona nan mes den su discurso, no a bisa kico gobierno ta bay haci pa e grupo di trahadonan aki cu a perde nan trabou y no a interveni tempo y seriedad manera ta su deber y cu e por a haci pa sirbi interes di e trahadonan aki.

Un grupo chikito di trahadonan a keda atras pa sigui cu trabounan cual grupo no ta asina grandi cu por percura pa siguridad den e refineria pero pa Prome Minister nada di esaki ta sirbi su interes of e interes di su partido.

Na momento crucial caminda gobierno tin cu atende CITGO riba cumplimento di su obligacionnan a base di e contract firma cu e compania aki, Prome Minister ta drenta gobierno y e prome decision cu e ta tuma, ta pidi e oficina di abogado di su tata pa busca un forma pa kibra e contract aki.

Un decision cu ta trece hopi riesgo cune ya cu e por libra CITGO di tur obligacionnan stipula den  e contract, cual ta un contract solido hinca den otro dor di expertonan di Aruba, di Merca y Hulanda, caminda bou di cualkier circunstancia cu presenta, pais Aruba lo no wordo perhudica na momento cu CTIGO no cumpli.

Loke ta pasando awo ta cu Prome Minister ta mustrando un ansha grandi pa caba cu e proyecto aki, ta dunando e impresion cu tin otro interesnan pa sirbi y cu ta buscando un forma legal pa yega na e punto cu e kier a yega, pa asina entre otro e distino di e compania di pueblo FMSA, pasa over pa famia y amigonan.

Ta di lamenta y sigur di condena seriamente, e forma con Prome Minister Evelyn Wever Croes, a atende cu reapertura di e refineria, caminda den pasado el a papia di gruponan cu ta bati na porta pa inverti den e refineria pero te dia di awe pueblo no a mira ni sombra di un di e companianan aki pero esaki ta otro mentira mas di e lider di MEP.

Na momento cu e Prome Minister di e pais, ta bay over y pidi bufete di su tata pa mira con por kibra e contract cu CITGO, cu su persona no a sinta ningun momento cu ehecutivonan di e compania aki, cu no a ni biaha pa Houston pa atende un asunto cu ta cay bou di su responsabilidad, nos tin cu bisa cu ceramento di e refineria di San Nicolas, ya tin nomber y faam completo, loke no ta sorprende ningun hende, esta Evelyn Wever Croes.

Unicamente Prome Minister a papia cantidad di disparate, a papia cu CITGO su fondonan ta bou embargo pero realidad di e situacion ta cu e refineria di Aruba no tin nada di haber cu e situacion na Venezuela y si nos por mira con na Corsou si a logra los e fondonan necesario bou di mesun circunstancianan cu Aruba tin, anto e ora no por conclui cu Minister Presidente Evelyn

Wever Croes tin otro insteresnan priva pa sirbi y no e interes general di e  pais,” Parlamentario Mike de Meza a mustra.

 

- Advertisement -

DUNA COMENTARIO

Please enter your comment!
Please enter your name here