Home Enseñanza SIMAR ta haya cu vandalismo na Cacique Macuarima School ta un golpi...

SIMAR ta haya cu vandalismo na Cacique Macuarima School ta un golpi duro pa enseñanza

201
0
SHARE
- Advertisement -

ORANJESTAD (AAN): Sin duda alguno, Dialuna a habri cu casi tur stakeholders den Enseñanza na Aruba, dunando nan mensahe di asombro, disgusto, y sorpresa pa loke a pasa madruga na Cacique Macuarima School na Macuarima, cu a perde 4 lokaal debi na vandalismo sigui pa candela feroz.

Esey ta loke Presidente di Sindicato SIMAR, esta Josephine Albertus tambe a expresa.  El a acudi Dialuna mainta na e scol pa check kico a pasa, y papia cu miembronan.

Segun e lider di SIMAR, el a cana den e scol y mira e cuatro lokaalnan cu a keda afecta pa motibo di vandalismo.  Dos lokaal basta destrui y e otro dosnan ta daño di awa y huma, y ta pica pa mira e situacion aki.

El a bisa cu na Aruba, maestronan cu hopi amor ta bay scol pa duna e muchanan les, y awor ta lanta mainta y mira e vandalismo cometi, y pesey muchanan no por haya lesa.

El a yega y haya tur e docentenan para pafo ta wak loke a pasa.  Di trempan a bisa mayornan pa nan no laga nan yiunan na scol, como cu no tin les te cu proximo aviso.

Pues e siman aki no por tin scol debi cu mester inventarisa tur cos cu a kima y no tin coriente.

E hobennan malcria cu ta comete vandalismo no ta ripara e consecuencia cu e ta trece cune.  Nan a haci cosnan pa pret, y pesey awor tur e trabaonan di e muchanan y e docente a kima y tur cos a keda kima y mester wak con pa busca esaki back.

Lider di SIMAR a mustra cu tur hense sa cu ya caba e isla su enseñansa falta di finanzas y e situacion aki ta bira uno mas pisa.

Segun Albertus, e tabata contento di mira tur docente na e scol hunto cu e cabesante y e apoyo cu nan ta hayando y ta spera cu esaki ta algo cu nos por apoya, otro scol y instancianan pasobra nos sa cu enseñansa ta hopi importante y e ta forma e parti di un futuro di e pais y nos no por lage asina aki y nos tin traha lihe riba e situacion aki.

Hecho ta cu e ta un golpi grandi pa enseñanza!  Pero e malhechornan cu a comete e acto no sa mes kico nan a haci.

 

- Advertisement -

DUNA COMENTARIO

Please enter your comment!
Please enter your name here