Home General Abuso di “Bo Aruba” ta exigi epoca politico nobo

Abuso di “Bo Aruba” ta exigi epoca politico nobo

68
0
SHARE
- Advertisement -

Camara di Comercio a splica na 2016 loke Rekenkamer ta condena awe 

*DIARIO ta cla pa sostene eleccion separa gobierno y parlamento

*No ta trata di PPP pero di bay haci gasto cu Aruba no por paga 

ORANJESTAD (AAN) — DIARIO ta keda para riba su prome palabranan despues di a analisa y bolbe analisa e rapport “Bo Aruba” cu e maximo autoridad financiero di Aruba a produci despues di a investiga e proyectonan pa un total di 1.6 Biyon.

Es mas, DIARIO ta reta miembronan di gobierno anterior y di e constelacion anterior di parlamento pa contradeci e ponencia, cu hamas nan lo a expone un negoshi di nan mes na e riesgonan cu nan a expone Aruba cu e proyectonan di “Bo Aruba”.

Na varios ocasion, DIARIO a mustra cu “Bo Aruba” no por bay den lachi di olvido pero mester sirbi pa reforma e sistema cu abuso ta wordo haci di posibilidad cu pueblo ta duna politiconan pa tuma decisionnan financiero pa pueblo.

Na varios ocasion, lectornan di DIARIO a presenta e proposicion pa cambia e sistema electoral di tal forma, cu ta separa eleccionnan pa parlamento y gobierno. Teniendo cuenta cu loke a pasa cu “Bo Aruba” (un rapport cu ta wordo sigui pa mas rapport di Algemene Rekenkamer Aruba cu a condena gobierno y parlamento), awe DIARIO ta cla pa acepta e formula di separacion di e dos eleccionnan.

Loke a pasa cu Aruba cu e proyectonan cu mester a yega na 1.6 Biyon no tin nomber. No ta trata aki di e principio di PPP. Ta trata aki di e abuso cu a wordo haci di e principio di PPP tambe.

Manera semper DIARIO a splica, gobierno anterior a actua manera un hende cu kier cumpra loke e no tin placa pa paga, pero ta hinca su mes den un debe cu e no por paga.

Un hende su ta hinca su mes den un debe cu e no por paga, ta comete un acto criminal cu segun nos leynan ta fraudulento.

Pa asumi e posicion cu el a asumi den e asunto di PPP (PPS na Hulandes), DIARIO encamina e mes caminda cu el a sigui pa splica Aruba cu e pais mester lubida Citgo. DIARIO banda di e rapport di Algemene Rekenkamer Aruba, a investiga tur rapport y opinionnan cu a wordo duna.

DIARIO asina a tuma nota di loke Camara di Comercio den su diferente comunicadonan a trece dilanti.

Den e tercer comunicado riba PPP na 2016, Camara di Comercio a bisa textualmente: “Esey ta e caso por ehemplo cu e aspecto di suficiente experticio, tanto riba tereno tecnico como huridico di banda di gobernacion, pa por iguala e partner priva y duna suficiente contra peso den e proceso.  E problema mayor señala ta e corelacion entre magnitud di e total di inversion den PPP, compara cu e tamaño di economia y tamaño di gobernacion. Lamentablemente den e material analisa te awor no a topa cu evaluacion di hustamente e aspecto aki, cu sin embargo ta resulta importante.”

Den algun frase, Camara di Comercio a bisa na 2016 loke awe Algemene Rekenkamer Aruba a trece dilanti, cu gobierno anterior no a studia loke nan ta haci y a actua na un forma iresponsabel cu un 1.6 Biyon di pueblo.

Awe Aruba mester di un epoca nobo. Ora mira kico a pasa cu proyectonan PPP, porta ta habri pa bay di acuerdo cu mester tin dos eleccion: uno pa gobierno y uno pa parlamento.

Asina mester evita loke a pasa cu proyectonan PPP, ora parlamento cu a sostene gobierno anterior a permiti gobierno anterior abusa di placa di pueblo.

Pakico dos eleccion ta e solucion? DIARIO lo bolbe riba e topico pero hecho ta cu segun e sistema actual di eleccion, formacion di gobierno ta permiti pa mas hende riba lista di un partido pa eleccion den parlamento haya un puesto despues di eleccion.

Si pueblo a vota pa cinco asiento den parlamento, ora forma gobierno automaticamente mas cu cinco politico ta drenta gobierno y parlamento. Esaki a haci e abuso di PPP posibel?

Consenshi di gobierno anterior y su miembronan den parlamento mester papia riba loke rapportnan oficial a condena!

 

- Advertisement -

DUNA COMENTARIO

Please enter your comment!
Please enter your name here