Home Turismo Area rond di St. Regis Hotel lo wordo embeyece y matanan cu...

Area rond di St. Regis Hotel lo wordo embeyece y matanan cu tin rond lo wordo proteha

49
0
SHARE
- Advertisement -

Desaroyadornan di e proyecto

ORANJESTAD (AAN):  E construccion di St. Regis Hotels & Resorts Aruba ta bay inicia y tin algun pregunta cu a wordo haci na e propietarionan y desaroyadornan.

Mirto Martis, Counselor di e proyecto a laga sa cu door cu e hotel ta wordo construi den un area cu ta hopi conoci pa e comunidad, cual ta esun unda tur mucha a bay zwemles pa haya nan diploma, tin preocupacion riba si e beach lo wordo limita pa publico, si lo tin cortamento di e mata grandi di kwihi, etc.

Mester bisa cu e beach ta publico. Ademas di esaki tin un ‘beach policy’ cu ta conta pa e hotel aki tambe. E area lo wordo embeyece, segun e desaroyadornan. Tin algun cambio ta bay tuma lugar pero tur esaki ta bay segun stipulacion y acuerdonan cu Gobierno di Aruba.

Por ehempel, Martis a señala cu tin un acuerdo cu gobierno cu e mata di kwihi no ta wordo corta. Por ta, e a wordo drecha un tiki, pero no ta bay elimina e mata.

A diseña e proyecto unda e matanan ta parti di e landscaping, a remarca.

Otro parti importante ta cu e ‘Signature Park’, cual a wordo traha na 2007, den 13 aña e no a bay ni pa dilanti ni patras pasobra no tin mantencion. Te hasta caminda unda e scol di zwemles ta e no a wordo caba nunca.

Strandpolitie a wordo traha hopi mas prome y despues tampoco el a haya mantencion. Pesey den e acuerdo cu gobierno a bisa cu ta bay drecha esakinan. Polis a bay di acuerdo pa hala un tiki pabao, pega cu e grens di Divi Phoenix Hotel y e ora ta haya mas espacio pa beach.

E desaroyador ta bay pone un compania di mantencion cu ta bay encarga pa mantene e area ariba e mesun standard cu e hotel pasobra no por tin un hotel luhoso rondona di un area cu no ta pas y cu te hasta tin mata ta muriendo na banda, Mirto Martis a enfatiza.

E diseño cu ta bin pa e warda di polis nobo ta bay ta casi den e mesun tipo di arkitectura di e hotel.

Mescos a pasa cu e construccion di Ritz Carlton Hotel, e tempo aya. E desaroyador a yega un acuerdo cu Gobierno pa embeyece e area y mantene e mangroves. Aworaki e ta un parti positivo den e benta di e hotel pasobra hende ta gust’e. E matanan ey tin un funcion.

Esey mes tambe ta den e concepto y criteria di e proyecto di  St. Regis Hotels & Resorts Aruba, a declara.

“E hendenan local por ta sigura cu nan ta haya mas lugar pa bay haci uzo di e beach. Ta bay tin mata cu sombra (…) Tur e cosnan ey ta bay wordo drecha pa haci e hendenan contento, pasobra bo mester tin hendenan contento pa e hotel por draai bon”, Martis a bisa.

Finalmente, Pedro Vera a manifesta cu e permiso ambiental cu e gobierno a duna ta contempla no solamente e proteccion di e matanan cu tin den e area. No por mishi cu nan. E matanan cu tin na ambos banda di e proyecto ta proteha.

 

- Advertisement -

DUNA COMENTARIO

Please enter your comment!
Please enter your name here