Home Parlamento Casi tur e proyectonan di AVP a ser haci estilo fia awor...

Casi tur e proyectonan di AVP a ser haci estilo fia awor y despues wak con lo paga

91
0
SHARE
- Advertisement -

Edgard Vrolijk di MEP:

ORANJESTAD (AAN): Recientemente nos a trata e investigacion di proyectonan ehecuta bao di Gabinete Eman 1 y 2 cu a hiba como titulo: “Bo Aruba”.

Cu e investigacion aki Contraloria General kier a manda futuro gobiernonan y tambe parlamento di Aruba e mensahe cu pa futuro cercano tin aspectonan cu mester tene cuenta cu ne y cu no mag pasa mas ya cu no por endeuda pueblo cu proyectonan cu no tin cobertura financiero.

Y un aspecto cu tambe a resalta ta cu e parti di transparencia den proyectonan ta esencial pasobra locual a pasa di 2009 pa 2017 tabata parce cu parlamento tabata reuni solamente pa sostene un gobierno, pero hamas a ser informa debidamente di e risico financiero pa Aruba haciendo e proyectonan aki.

Lo mas resaltante di e investigacion ta cu BO Aruba tabata un proyecto cu lo mester a costa pueblo di Aruba no menos cu 1.6 biyon Florin y unda cu e PPP proyectonan manera Hospital, Green Corridor, Watty Vos Boulevard y edificionan di MFA y algun otro proyecto mas di embeyecimento di Aruba a causa un daño grandi na nos pais.

Lo mas resaltante di e investigacion aki ta cu hopi proyecto a ser haci sin nan tabatin un projectdossier (niun planificacion) na ordo. Pues tabata carece di un plan y na ki forma e proyecto aki lo yuda pa resolve un problema den comunidad. Y tabata carece un evaluacion di cada proyecto pa wak si esaki a sirbi su meta. Pero lo mas resaltante tabata cu no por haya den casi ningun proyecto ta con lo yega na e fondonan pa e proyecto y con lo mester mantene e proyectonan aki cu ta uno hopi importante.

Ora bo bay wak back cu casi tur e proyectonan aki a ser haci na un manera di fia y despues wak con lo paga. Ehempel di esaki ta e proyectonan PPP y e MFA unda cu a fia pa traha esakinan y nunca a traha e cuadro financiero con lo mester paga  esakinan.

Awe e pueblo ta mara na e proyectonan aki cu lo mester paga 82.4 miyon Florin tur aña y te cu aña 2044. Y lo mas tristo ta e ehempel di e MFA-nan unda a fia pa 5 edificio di MFA pero na final a traha 4 pero pueblo tin di paga te cu 2044 pa e ehecucion di 4 edificio. Otro ehempel ta e Hospital cu a ser traha sin operatie kamer, boiler di diesel paden di edificio y tambe manera awa yobe tur pashent ta cuminsa resa pa nan no ser benta pa awa pafo di edificio manera a pasa recientemente.

Algo cu a resalta ta e falta di respet di ex Minister Benny Sevinger na e organo di Contraloria General cu ta un organo independiente di Parlamento. Unda cu a manda pidi e ex Minister aki pa bin duna cuenta pero el a opta pa no bin duna cuenta y riba dje lamentablemente e ex Promer Minister Mike Eman no a percura pa Contraloria General tabatin suficiente miembro pa por tin quorum cu consecuencia cu  e rapport aki no por a ser publica prome cu eleccion 2017.

Pero p’ami ta keda e incertidumbre cu maske no tin miembronan pa tin quorum, si no a informa parlamento di Aruba cu e ex Minister aki no kier bin duna cuenta pasobra Contraloria General ta traha pa Parlamento di Aruba. Hecho ta cu den nos constitucion Minister tin di responsabilisa su mes na parlamento y tabata deber di un parlamento cu ta sirbi pueblo manera debe ser, pa  yama e minister aki en cuestion y exigi’e pa e por duna cuenta na Contraloria General.

Den di dos tanda di e reunion di Parlamento na momento cu esaki reanuda un biaha mas lo mi elabora riba esaki pasobra den e prome tanda  mi no a haya e contesta desea riba e aspecto si a informa parlamento debidamente.

 

- Advertisement -

DUNA COMENTARIO

Please enter your comment!
Please enter your name here