Home Cultura Comision Celebracion Dianan Nacional lo percura pa festeha Dia Himno y Bandera...

Comision Celebracion Dianan Nacional lo percura pa festeha Dia Himno y Bandera na grandi

33
0
SHARE
- Advertisement -

ORANJESTAD (AAN): Luna di maart ta luna cultural y luna di nos Celebracion Nacional di Dia di Himno y Bandera caminda e aña aki Aruba ta celebra 34 aña di nos Status Aparte y 44 aña di nos Himno y Bandera.

Ya pa varios siman caba Comision Celebracion Dianan Nacional a inicia cu e preparacionnan pa locual lo bira e Celebracionnan relaciona cu nos Dia di Himno y Bandera.

Riba e programa di Gobierno di Aruba tin e siguiente actividadnan:

Festivalnan di Un Canto na Aruba su Himno y Bandera lo tuma luga dianan 6 y 7 di maart, Infantil y Hubenil y ambos dia ta inicia pa 6 ‘or pm. E festival Adulto ta dia 11, 12 y 14 di maart cual lo ta e final.

Tur dia e festival di Adulto lo inicia pa 7 ‘or pm. Ambos festival lo tuma luga riba Plaza Libertador G.F. Betico Croes.

Poeta di Patria, competencia di poema dedica na nos pais Aruba, ta tuma luga dia 13 di maart pa 7 ‘or pm na Fort Zoutman na Oranjestad.

Manifestacion Cultural Dia di Himno y Bandera lo tuma luga dia 17 di maart riba Plaza Libertador G.F. Betico Croes; iniciando desde 6 ‘or di atardi cu benta di cuminda, boca dushi, artesania y sigui pa un manifestacion cultural cu presentacion di nos artistanan local.

Ceremonia Protocolar di Himno y Bandera lo tuma luga e mainta di 18 di maart dilanti Plaza Libertador G.F. Croes cu e acto protocolar, aubade y desfile di gruponan uniforma sigui despues pa otro organizacionnan.

Tur grupo uniforma y otro organizacion oficial ta ser pidi pa busca formulario di inscripcion na Bestuurskantoor y/o Departamento di Cultura, por yena esaki y email na [email protected]

Manera ta un costumber tur organizacionnan cu tin actividad rond di nos isla relaciona cu Dia di Himno y Bandera por acerca nos comision pa un contribucion na e-mail [email protected] y tambe pa e actividad keda menciona den e calendario oficial di actividad di Dia di Himno y Bandera 2020.

Ministerio di Cultura conhuntamente cu Departamento di Cultura y Comision Celebracion Dianan Nacional ta invita henter nos comunidad pa ban uni manera un gran famia y celebra e Dia di Himno y Bandera den grandi, demostrando e amor cu cada un di nos tin pa nos dushi país Aruba.

- Advertisement -

DUNA COMENTARIO

Please enter your comment!
Please enter your name here