Home Turismo Companianan chikito di Tours ta sinti cu calidad di turistanan crusero a...

Companianan chikito di Tours ta sinti cu calidad di turistanan crusero a cay bastante

31
0
SHARE
- Advertisement -

ORANJESTAD (AAN): Aunke e destinacion di “Aruba” a caba di wordo nombra como destinacion number 1 di e.o. Carnival Cruise Lines, toch tin varios trahador local cu ta labora den mundo di Island Tours, ta mira cu e calidad di turista cu ta gasta placa, no ta yegando e isla mas.

Roberto Solognier cu ta experto di duna Island Tours, a indica na DIARIO cu en general, nan ta contento cu Aruba a haya e distincion ey di Carnival Cruise.  Bo ta mira cu awor ta mas barco ta bishitando e isla, hopi turista ta cana tur caminda den Playa ora cu un barco crusero drenta.

Sinembargo den mesun rosea, Solognier a splica cu lamentablemente e calidad di turistanan si a baha.  Compara cu aña pasa mes, el a bisa cu esnan di 2019 tabata gasta mas placa, compara cu awor na 2020.

Bo ta mira e turistanan ta yega Aruba, ta baha di e barco y ta djis bay subi e Tram, of cana bay den centro di ciudad.  Pero e cantidad di turista cu kier haci un Island Tour cu e companianan priva para pafo di Waf, esey si a baha bastante.

“Nos ta sufriendo, y e aña aki e tabata un Januari hopi duro pa nos,” Solognier a indica.  Net e turistanan cu kier gasta placa, tuma Island Tours, y bishita diferente lugar rond di Aruba, net eseynan no tey.  Segun e Tour Operator, bo ta mira claramente e diferencia grandi awor, compara cu mesun periodo di 2019.

El a splica cu principalmente Turistanan Europeo ta yega, y kier djis sea cana den ciudad, of bay beach.  Nada mas.

“Nan ta subi Tram, y e mesun turista ey como 40 minuut bo ta mira nan ta baha bek na Waf for di e Tram, y bo ta nota cu nan no a haci nada di compras, y ta djis subi barco bek”.

E Tour Operatornan cu ta para pafo di Waf, ta den combersacion cu Aruba Ports Authority NV (APA) pa pidi pa nan haya trato igual cu e companianan cu si ta haya chens di subi Waf y bay para te na e Cruise Terminal.

Pues nan ta pidi pa APA laga esnan pafo tambe bay para paden hunto cu e companianan cu si tin vergunning, of ta pone tur compania para pafo hunto y asina nan tur ta igual.

E companianan para pafo ta haya cu ta inhusto cu e companianan cu a paga pa vergunning y cu ta para cerca di Terminal, ta haya trabao prome cu nan.

E Tour Operatornan ta deliberando hopi ki solucion pa yega na dje.  Hecho ta cu e companianan chikito pafo ta sufriendo, y esnan grandi paden si ta djo-djo cu tur cos.

Mas crusero ta bin Aruba, mas turista ta cana rond, pero e Tour Operatornan chikito ‘no ta sinti’ esey.

Ya caba a reuni cu APA NV, y a presenta un idea cu a consisti di un schedule rotativo, unda cada compania ta haya chens igual pa ta paden, y otronan ta keda pafo segun palabracion.  Pues algun biaha compania ta pafo di Waf, otro biaha compania ta haya chens di bay paden pa busca turista.

Esaki ainda ta den deliberacion.  Nan a sinta cu APA na mesa, y a nota cu nan idea a haya oido y atencion di e profesionalnan di waf.  A papia extensamente di e problema, y elabora riba solucionnan.

Di algun tempo, companianan chikito di Tours tabatin hasta planea di bay busca nan derecho dilanti Huez.  Pero prome cu yega asina leu, nan a opta pa reuni cu APA pasobra na mesa ta e mihor forma pa yega na solucion.  Te ainda nan ta sinti cu nan ta bayendo riba bon caminda.

- Advertisement -

DUNA COMENTARIO

Please enter your comment!
Please enter your name here