Home Hudicial Corte Superior a confirma sentencianan duna pa tira mata Sky den Rancho

Corte Superior a confirma sentencianan duna pa tira mata Sky den Rancho

1322
0
SHARE
- Advertisement -

Tur dos apelacion no a keda honra

ORANJESTAD (AAN): Luna pasa Hof di Corte Superior a trata e apelacion di Ministerio Publico riba e sentencia den e caso penal contra Zacharry Quandt, kende a worde haya culpable di a tira Hubert ‘Sky’ Arrindell mata.

Fiscal a exigi 18 aña di prison y Hues a condena Quandt na 10 aña di prison. Ademas di e apelacion aki, a trata tambe e apelacion di Ronaldo Norton, contra su sentencia di 4 aña di prison di cual 1 aña ta condicional, como complice di a tira mata Sky riba 18 Augustus 2018. Abogado di Norton a apela pasobra e ta haya cu Norton no ta complice.

    EXIGENCIA DI PG:

Procurador General (PG) a bisa Hof cu e por compronde e punto di bista di Hues cu a condena e muher Quandt pa mata y posecion di arma. PG no ta comparti esaki. E ta haya cu e auto a pasa, Quandt a habri bentana y los tres tiro. A tira riba un grupo di hende. Esaki ta un intento di mata. A tira Sky cu consecuencia cu el a fayece, esaki ta mata. Na opinion di PG, e castigo di 10 aña no ta mustra e seriedad di e caso.

PG a remarca cu dos intento di mata y un mata, e castigo di 10 aña no ta suficiente. El a bisa cu e tin comprension cu Quandt ta hoben pero e forma con e tabata den auto y ta bay tira sin ningun motibo, esaki no por. PG ta haya cu mester manda señal bon cla cu no ta tolera esaki. PG a exigi 12 aña di prison. PG a bisa cu a scucha Quandt bisa cu e tabata un locura. El a remarca cu e locura aki a causa bida di Sky y por a causa bida di dos otro persona.

PG ta haya legalmente proba cu R.N. a core e auto y Z.Q. a tira. Ley ta bisa cu si bo a ocasiona algo, bo ta responsabel pa e consecuencia. Den e caso aki Sky a worde tira den Rancho y causa infeccion na su tripanan cu consecuencia cu el a fayece. El a worde hiba hospital y a haya tratamento pero despues el a bay for di hospital. Kico tabata e motibo no ta conoci. E dokter cu a atende Sky tambe ya a fayece.

Hende cu a haci algo malo, e ta responsabel pa e consecuencia. Apesar cu si ta Sky a deshaci di tratamento y bay for di hospital, Z.Q. y R.N. ta responsabel. Haya cu tin un relacion directo entre e tiramento y e morto di Sky. Haya cu ora Z.Q. a puntra si mester tira, R.N. tambe a bisa pa si. Despues cu Z.Q. a tira, R.N. a core bay duro. Haya cu R.N. ta complice di e tiramento. Haya cu Z.Q. a tira y un bala a herida Sky. Haya cu R.N. a hiba nan Ranchostraat y esey causa e tiramento. Confirma sentencia di Hues pa R.N.

   DEFENSA:

Mr. Lejuez a bisa Hof cu Quandt a scoge pa para responsabel pa loke el a haci y a acepta su castigo di 10 aña di prison. E abogado ta haya cu corectamente Hues a duna sentencia y no a bay tras di exigencia di Fiscal di 18 aña. E abogado ta haya cu Hues a tene debido cuenta cu tur cos y ta haya e castigo na su lugar.

Abogado mr. Illes, R.N. enberdad tabata presente pero no ta haya cu e ta complice.

Hues a bisa cu R.N. tabata stuur auto y ora a pasa den Ranchostraat y a mira hendenan di un gang para, a pidi R.N. pa pasa atrobe y e otro ey a tira. Haya cu inhustamente Hues ta conclui cu R.N. tabata sa cu miembronan di un gang di Rancho tabata para y cu el a bisa si ora Z.Q. a puntra si mester tira. R.N. ta para riba cu cos no a sosode asina. Mustra cu R.N. no conoce miembronan di gang di Rancho. R.N. no a scucha Z.Q. puntra si mester tira. Ademas di e dos testigonan cu ta bisa cu R.N. a bisa si, tin otro testigonan cu ta bisa cu R.N. no a bisa nada y cu ta Z.Q. a bisa cu e ta tira aunke cu ningun hende a bise algo riba su pregunta si mester tira. Haya cu ta dos agente cu a scucha e otronan a bay scucha J.W. riba Z.Q., pero 10 dia despues caminda e ora ey J.W. a bisa R.N. a bisa si. Aki ta tres contra dos. E dos testigonan cu a bisa R.N. no a bisa nada y R.N., contra Z.Q. y J.W. Remarca cu J.W. a duna declaracionnan cu no ta cuadra cu e berdad. Tur cos a sosode net riba e cruzada un poco promer cu Ranchostraat. Eynan a pasa Z.Q. e arma y a tira.

Haya cu tur esaki ta mustra bon cla cu R.N. no tin nada di haci di e tiramento y mester worde declara liber mescos cu J.W.

   SENTENCIA:

Dialuna den oranan di atardi, Hof a dicta sentencia. DIARIO a compronde cu Hof ta haya tanto Quandt como Norton culpable. Hof a evalua henter e caso y ta yega na e decision cu e apelacionnan no ta worde honra. Hof ta haya cu e sentencia di Hues den Corte den Promer Instancia ta na su lugar y ta confirma e sentencianan. Esey ta nifica cu e castigo pa Quandt ta keda 10 aña di prison y e castigo pa Norton ta 4 aña di prison di cual 1 aña ta condicional.

- Advertisement -

DUNA COMENTARIO

Please enter your comment!
Please enter your name here