Home Hudicial Diescuatro aña di prison exigi pa homber cu a choca su pareha...

Diescuatro aña di prison exigi pa homber cu a choca su pareha mata

378
0
SHARE
- Advertisement -

Fiscal na acusado: “Bira homber, bisa kico a pasa”

ORANJESTAD (AAN):  Fiscal a cuestiona e forma con e acusado A.D. tabata purba bira henter e asunto di loke a sosode 23 April 2019, caminda A.D. a choca e difunto Reynalda Kock mata, dilanti nan yiu muher di 9 aña.

Fiscal na dado momento den un forma emociona a bisa A.D.: “Bira homber. Bisa kico a pasa. Stop di bisa cu bo yiu muher ta gaña”. Fiscal a exigi 14 aña di prison y pa aproba e demanda di daño di e famia cu ta algo mas di 15 mil florin.

Den e articulo aki, DIARIO ta concentra riba e rekisitorio di Fiscal. Den un otro articulo, DIARIO ta publica e tratamento di e caso. Tratamento di e caso tabata hopi largo y pesey ta parti’e den diferente parti pa asina lectornan por tin un mihor bista di e caso.

EXIGENCIA DI FISCAL

Fiscal a bisa Hues cu no por papia di premedita y pesey no por bisa cu aki ta trata di un caso di asesinato sino mata. Na opinion di Fiscal, no tin indicacion cu A.D. a pensa, planea pa kita bida di e victima. Pesey e ta haya cu mester declara A.D. liber di asesinato pero si cu e ta culpable pa a mata.

Fiscal a mustra cu den Corte por scucha for di e acusado A.D., cu e tabata esun trankil y cu ta e victima tabata agresivo. E ruman muher a bisa cu 1 dia promer A.D. lo a menaza cu lo mata. Sinembargo no por bisa cu esaki tabata un plan. Fiscal ta haya cu intencional A.D. a choca y mata.

Fiscal a remarca cu A.D. bisa cu no tabata su intension pa haci malo cu e victima. Fiscal no ta kere esaki. Fiscal a mustra cu e yiu muher ta bisa cu dos biaha A.D. a choca e victima tras di otro. Fiscal ta haya cu no tin motibo pa duda den declaracion di e mucha. E ta haya cu A.D. tabata desea otro cu loke e ta laga mustra awe den Corte.

Na opinion di Fiscal, e acusado A.D. tabata kier pa e victima muri. El a bisa Hues cu e mucha por a mira con su tata A.D. tabata choca su mama. E mucha a purba los su tata pero no a logra. E mucha e ora ey a bisa A.D. cu si e no stop, e no ta papia mas cu A.D. E tata A.D. a bisa e mucha cu si e stop di yora e ta stop. E mucha a stop pero A.D. a sigui choca.

E victima tabata roga pa laga los y A.D. a laga los un rato y a bolbe sigui choca. Fiscal a mustra cu Patologo a determina cu e causa di morto ta e choca di A.D. Reclasering ta haya cu no ta jaloersi sino un discusion cu a sali for di man.

FISCAL TA GRITA ACUSADO

Fiscal pa cu e castigo a mustra Hues cu A.D. a mata e mama di su dos yiunan un di 5 y e otro 9 aña. Tur dos mucha actual ta wordo trata pa psicologo. Fiscal si ta conclui cu ta door di jaloersi A.D. a actua asina. Segun Fiscal, loke ta di lamenta ta e hecho cu A.D. no kier papia e berdad kico a sosode. Den Corte A.D. ta pretende cu e tabatin un bon relacion cu e victima siendo otronan ta papia cu tur dia tin discusion.

Pakico awor A.D. ta pretende cu e ta un persona hopi trankil y a actua asina violento pa haya e cellular di e victima. Fiscal ta haya cu A.D. kier mustra cu ta e otronan ta robez y no e. E kier logra asina pa haya menos castigo. Fiscal den forma emocional a bisa A.D.: “Bira homber. Bisa kico a pasa. Stop di bisa cu ta bo yiu ta gaña”. Fiscal a bisa Hues cu na Aruba tin e tendencia hopi cu e hende muher ta propiedad di hende homber. Esaki no ta corecto. Fiscal a mustra cu e mucha a mira su mama muri den man di su tata.

E mucha a mira con su tata a mata su mama. E acusado awor ta bisa cu ta e famia a hinca cos den e mucha su cabez. Fiscal a bisa cu e no ta kere esey. Na opinion di Fiscal, no tin ningun motibo pa duda den declaracion di e mucha pero si pa duda loke A.D. ta bisa den Corte. Fiscal a mustra cu e muchanan lo keda pa resto di nan bida afecta.

CASTIGO

Fiscal a bisa cu segun ley pa delito asina tin 12 aña di prison. Corte Supremo a mustra cu si tin motibonan di peso lo por hustifica pa subi e castigo. Fiscal ta haya cu den e caso aki tin motibonan di peso y a exigi 14 aña di prison.

Pa loke ta demanda, Fiscal a bisa cu e gastonan di entiero ta wordo prescribi den leynan penal. E gastonan di alimentacion ta mustra logico. E gastonan di school, cumpra camanan pa e muchanan tambe ta mustra logico. Fiscal ta haya cu por aproba e demanda y a pidi Hues pa pone medida di pago of 114 dia sera.

 

- Advertisement -

DUNA COMENTARIO

Please enter your comment!
Please enter your name here