Home General Dignidad di Aruba tin mas balor cu oro di cualkier pais

Dignidad di Aruba tin mas balor cu oro di cualkier pais

143
0
SHARE
- Advertisement -

Gobierno di Aruba mester investiga publicacion La Patilla

*La Patilla mester bringa su guera na cas y no uza Aruba

*Kende y kico tin tras di acusacion baho contra Aruba? 

DIARIO ta e matutino cu a nace pa sostene e lucha di Aruba, cu tabata basa riba e sentido di dignidad di e Arubiano. Ta e pakete di balornan halto di e Arubiano a haci cu Aruba como un solo pais, a lucha pa su Status Aparte.

Aruba semper tabata conoci pa e sentido enorme di patriotismo di e Arubiano. Un Arubiano hamas lo permiti ningun hende of instancia trapa riba nomber y reputacion di Aruba. Esaki ta motibo pa awe pidi gobierno di Aruba, cuminsa cu un investigacion oficial y si ta necesario demanda e publicacion La Patilla di Venezuela pa e abuso cu el a comete contra Aruba cu e publicacion baho contra Aruba y gobierno di Aruba.

DIARIO como matutino di Aruba hamas lo permiti pa ningun hende na forma directo of indirecto mishi cu Aruba, e Arubiano of instancianan cu ta representa e Arubiano.

Awe nos kier bisa La Patilla y tur cu por a uza La Patilla pa dal Aruba un bofta, pa e bay bringa su guera na cas. E dignidad di Aruba y di e Arubiano tin mucha mas balor cu tur deposito di oro cu por tin den e suela si su pais, cu mester respeta Aruba.

Loke a pasa no tin nomber y ta un wega sumamente sushi cu a hinca Aruba den peliger mundial grandi. Ya Aruba tin basta problema cu e situacion cu a desaroya den su porta di cas y a afecta Aruba, cu no ta acepta ningun hende of instancia mishi cu dignidad di Aruba.

Kico ta La Patilla? Un rubrica riba computer cu ta yama su mes publicacion y cu a wordo funda un cierto Ravell. Nos ta laga na autoridad Arubano pa bay investiga ta kende ta Ravell y a base di cual autoridad e por susha nomber di Aruba y pone bienestar di e pais na peliger manera a sosode.

Ta un abuso sin nomber cu Ravell y su Patilla, ta kere cu e por produci acusacion falso contra Aruba y gobierno Arubano.

Patilla mester comprende cu Aruba no ta un republica di banana, pero tin un base legal cu ta haci cu nos gobierno no por pone husticia cera su boca. Si Ravell, Patilla y cualkier anti-Arubiano cu ta sconde nan tras, kier menciona nomber di Aruba, nan mester bay school cu ta duna les riba e diferente formanan pa goberna un pais y e forma cu Aruba ta wordo goberna.

Ta inaceptabel cu atrobe nomber di Aruba ta wordo afecta na Venezuela. Nos ta splica bon cla, cu si tin Arubiano cu a yuda den fabricacion di e storia falso cu oro horta di Venezuela a pasa Aruba, e no merece nomber di Arubiano.

Na Aruba nos no conoce “oro di sanger” pero mas bien “Sanger Arubano di Oro” basa riba e dignidad di Aruba y e Arubiano cu nos ta defende.

Un abuso a wordo cometi contra Aruba. Un abuso di marca mayor cu mester wordo investiga dor di gobierno di Aruba.

Nos pais a sufri basta y suficiente di loke e no a produci dilanti di su costa y no ta bala pa cualkier pia ni patia kere cu e por scop.

DIARIO na nomber di tur Arubiano ta lanta para contra cualkier intento pa mishi cu nomber, reputacion y dignidad di un pais cu a lucha pa su bandera ta halto halsa na mundo!

- Advertisement -

DUNA COMENTARIO

Please enter your comment!
Please enter your name here