Douaneronan ta desea audiencia cu Gobernador pa splike kico Ministro ta haciendo cu nan

    869
    0
    SHARE
    - Advertisement -

    Segun SADA

    ORANJESTAD (AAN); Sindicato di Douaneronan na Aruba, SADA, a tene e siman aki un reunion extraordinario cu nan miembronan y a papia di e covenant firma na 2017 y loke a caba di socede awor na 2020.

    Esta cu pa sorpresa di tur hende, siman pasa Gobierno a saca un Landsbesluit cu tin un structura di salario pa Douane Aruba cu ta completamente diferente di loke a firma na 2017, el a cay den hopi mal tera cerca e Douaneronan.

    Pues Gobierno a dicidi na bulldoze e acuerdo cu Douaneronan firma na 2017, y despues riba su mes na forma unilateral a bin cu cambionan completamente contra e deseo di miembronan.

    Segun Edward Maduro di Sindicato SADA, aki ta unda cu ya caba desde aña pasa caba e malcontento formal tabata biba cerca Douaneronan.  Pero ya a entrega caso na Corte, y Gobierno a djis dal bay sin importa cu e miembronan, sin worry cu deseo, sin worry cu negociacionnan den pasado.  Gobierno ta haci net lo contrario di loke el a priminti di haci ora cu Gobierno Wever-Croes a sinta.

    Lider di SADA ta corda ainda con na aña 2018, net despues cu e Gobierno nobo aki a sinta, con na Februari e Ministro di Finanzas a bisa na varios ocasion cu e lo cumpli cabalmente cu e covenant.  Douaneronan na varios biaha a toca e tema ey, y Ministro a keda priminti cu e lo cumpli.

    Awor na 2020 ta bisto cu e Ministro di Finanzas no a cumpli cu su promesa.  Ainda riba social media por mira un grabacion di entrevista cu e Ministro na November 2018, unda e titular di finanzas a hasta tilda SADA di ta stroba e proceso.  Na November ey Ministro a blof cu e documento cu supuestamente a wordo firma den Conseho di Ministro y ta bisa cu e documento ta firma, y a keha cu ta SADA ta esun cu kier stroba e proceso, etc.

    “Esey no tabata berdad,” Maduro a indica na DIARIO.  Awor a sali na cla cu ta nan mes a busca tur forma pa kibra e proceso.

    “No djis Ministro di Finanzas, pero Prome Ministro Wever-Croes tambe a priminti na varios ocasion cu lo cumpli cabalmente cu esaki.  Premier den un reunion na Juli 2018 a afirma cu e como hurista ta mira cu ‘esaki ta cla’, y tur cos ta cla pa implementa, pero na un forma unilateral y dictatorial a kibra e covenant, a bay contra deseo di miembronan, a yama reunion cu miembronan, y e Douaneronan a demostra malcontento cu e forma cu Gobierno ta atende e caso.”

    E decision pa bin cu un structura nobo di salario pa Douane, ta algo cu Sindicato SADA a haya feedback di miembronan cu el a cay den mal tera.

    Toch nan tin un caso den Corte, y cu fe nan lo bay sali bon toch cu esaki na final di dia.

       SINTA NA MESA:

    Por corda con na luna di September 2019, cu e Douaneronan a bay den un accion henter dia, y esey a pone cu Gobierno a core entabla un caso sumario pa obliga nan bay traha bek.  Aki Huez a sentencia cu e partidonan bay na mesa y sali for di e impasse, y cu si dado momento Gobierno no cumpli cu e covenant firma, e lo describi Gobierno como un “onbetrouwbare onderhandelings partner”.  Pues un partner cu bo no por confia den dje.

    Apesar cu Huez a pidi pa nan sinti na mesa, y cu Mediador a trata di start un reunion entre SADA y Gobierno… finalmente e invitacion a bin, pero esey tabata un reunion unda simplemente a notifica e Sindicato cu lo bay kibra e contract.

    Esey no ta conforme e sentencia di Huez, pasobra el a bisa pa e dos partidonan sinta na mesa pa sali di impasse, y no a sentencia pa SADA y Gobierno sinta na mesa, unda Ministro a djis informa cu ta bay bulldoze e contract.

    Ta un lastima cu no a logra sinta di berdad na mesa pa yega na un solucion segun deseo di Huez.

       KIZAS PAPIA CU GOBERNADOR:

    Segun Edward Maduro, Sindicato SADA awor ta studiando diferente paso cu nan por bay tuma relaciona cu e desaroyo nobo aki.

    Miembronan di SADA a expresa esey, y uno di nan ta pa pidi audiencia cu Gobernador Boekhoudt pa e asunto aki.  Esey ta bin debi cu ta Gobernador lo bay pone su firma pa e Landsbesluit aki.   Nan deseo ta pa papia cu Gobernador riba e asunto aki cu tin Douaneronan na Aruba extremadamente rabia.

    Tambe SADA tin pensa di drenta den contacto cu International Labour Organization (ILO), pa informa nan kico ta pasando cu Gobierno y e trato pa cu e trahadornan di Aduana.

    “Gobierno ta bay tur ora Conferencia di ILO, pa papia riba e respet entre dunador di trabao y Sindicatonan, pero aworaki ta mira cu Gobierno mes no ta respeta Sindicato, y ta cuchia e trahadornan, pues nos ta kere cu ta na su lugar e ora pa denuncia esaki na ILO,” Maduro a indica na DIARIO.

    Nan kier mustra ILO cu Gobierno di Aruba mes no ta respeta Sindicato ni miembronan, pa asina haya sa kico ILO ta pensa di esey.

    Pa awor SADA ta pendiente di e caso den Corte pa mira ki paso lo tuma despues.  Pero e ta kere cu na final di dia, e Douaneronan lo sali bon di esaki.

    - Advertisement -

    DUNA COMENTARIO

    Please enter your comment!
    Please enter your name here