Home General E cuadro di ley di Aruba a perde rumbo?

E cuadro di ley di Aruba a perde rumbo?

276
0
SHARE
- Advertisement -

Despues cu ya Orden di Abogado a mishi cu e fundeshi 

*Nos leynan no ta permiti free for all den mundo politico

*Sentencia di Hues mester bisa kico ta bon y kico ta malo 

Pa democracia por funciona e mester di Ley na cual tur hende mester tene nan mes. Na momento cu un hende lubida kico Ley ta encera y comete un traspaso, e instancia cu pueblo a encarga pa proteha nos cuadro di ley cu tur forsa di ley, ta Corte di Husticia.

Den e sistema democratico, Pueblo ta encarga tres instancia pa dirigi e pais. Pueblo ta encarga Parlamento, cu e ta scoge directamente, pa percura pa politica segun regla estableci, goberna e pais. Pues mundo politico na prome luga mester respeta Ley y mester ta ehempel pa ciudadanonan cu mester tene nan mes na Ley cu ta nace den Parlamento.

Ta trabou di Parlamento pa determina si Conseho di Ministro cu ratificacion di Rey, ta pasa leynan cu ta di acuerdo cu nos cuadro legal. Parlamento, Conseho di Ministro, Gobernador den representacion di Rey ta haya asistencia di Raad van Advies pa sigura cu loke ta wordo dicidi pa e pais, ta cuadro cu Ley cu ta mara na Constitucion, cu no conoce distincion di persona.

Pa proteha pueblo, cu ta e curason di democracia, contra violacion di Ley, Corte di Husticia ta e tercer pata di e Trias Politica.

Corte di Husticia cu su sentencia basa riba nos cuadro di leynan, mester dicta sentencia pa asina sostene loke ta bon y condena loke ta malo sin ningun distincion.

Recientemente DIARIO a protesta contra “huiswerk” cu e Orden di Abogado a dicidi di entrega na Corte di Husticia, haciendo uzo di instalacion di Huesnan nobo. E Orden di Abogado a cuestiona si Corte por dicidi si gobierno (Conseho di Ministro y Gobernador) a actua bon.

Nos a protesta contra e suceso aki, pasobra Corte di Husticia no por acepta otro huiswerk cu no ta loke ta skirbi den leynan cu no ta laga ningun buraco habri pa husticia prevalece y democracia haya cumplimento.

Awe uno di e casonan mas sushi cu e ultimo decada di politica a produci, ta exigi nos puntra nos mes si e cuadro di ley di Aruba, a perde rumbo.

Cu tur respet cu nos debe Hues y nos creencia absoluto den democracia cu ta exigi pa nos respeta nos cuadro di ley, nos kier puntra si den e sentencia den e caso di Rocco Tjong contra Benny Sevinger, Aruba ta ricibi un mensahe cla di kico ta bon y kico ta malo.

Den e sentencia ta wordo treci dilanti cu Benny Sevinger no por a proba cu Rocco Tjong a comete e acto sumamente serio cu Sevinger y su partido a uza pa destrui imagen di Tjong.  Esaki ta nifica cu Benny Sevinger tabata culpabel di uza loke ta mentira te ora e tin prueba, pa destrui un hende.

Sevinger no ta wordo condena pasobra Tjong ta politico y mester tin cuero di olifante.

DIARIO a analisa e caso aki te den profundidad y a mustra con un mucha, cu tabata un baby, tambe a wordo hinca den un situacion sumamente dificil pa un ser humano.  Ta e baby tambe a keda marca pa resto di su bida den loke claramente ta un wega politico di mas baho cu Aruba a conoce.

Un sentencia ta hurisprudencia. Un sentencia pa ley ta determina, kico un ciudadano por haci of no por haci di acuerdo cu ley.

Cu tur respet pa nos Corte di Husticia, nos ta puntra nos mes kico e sentencia ta bay nifica pa moral di Aruba. Kico e ta nifica pa e nivel politico di un pais, cu semper tabata conoce decencia.

Cu tur respet pa Hues, pero a  base di nos respet tambe pa e cuadro di ley cu nos como periodismo mester proteha, nos kier puntra kico ta bay pasa awor cu e free for all baho y sushi cu nos a denuncia abiertamente, no a wordo condena.

Nos ta entrega e analisis aki na tempo, na nos futuro generacion cu lo mester biba cu resultado di nos situacion actual y e forma cu nos ta duna contenido na democracia.

 

- Advertisement -

DUNA COMENTARIO

Please enter your comment!
Please enter your name here