Home Editorial E lucha contra e coronavirus como causa nacional

E lucha contra e coronavirus como causa nacional

159
0
SHARE
- Advertisement -

Editorial

Na momento cu e prome informacionnan riba un enfermedad contagioso nobo a haci nan entrada, mundo a registra e prome reaccion intensamente humano cu ta e miedo di hende pa bira malo y perde su bida.

Comunicacion moderno a haci posibel pa na tur pais desaroya, hende directamente por a tuma nota cu un coronavirus nobo a keda registra na e organisacion internacional di salud.

E prome medidanan cu mester a wordo tuma tabata directamente conecta na e ansha di hende enfrente peliger pa salud.

Pa DIARIO, na un momento crucial pa periodismo di un pais cu na 2020 mester busca su recuperacion economico y consolida su situacion financiero pa atende cu exigencianan social, un emergencia a surgi. Informa pueblo di Aruba riba e malesa nobo, su progreso y peliger pa nos comunidad, tabata e prome paso cu mester a wordo tuma.

E situacion peligroso na China a cuminsa haya resultado riba diferente tereno importante manera economia mundial, cu ta den un shock severo manera tambe nos ta informa Aruba.

Sinembargo, un actitud realistico semper ta hiba nos na loke e reaccion di ciudadanonan rond mundo a demostra, cu ta e necesidad di accion directo pa sigura salud di hende, cu ta e parti mas importante di un comunidad democratico.

E enfermedad nobo ta exigi nos pa bay na su reis. El a nace den circunstancianan cu tabata contra tur norma higienico.

Un base sanitario aceptabel na tur nivel y den tur sector a demostra di ta e prome arma cu hende tin contra enfermedad, cu ta progresa caminda no tin higiena adecuado.

Esaki a haci cu DIARIO for di e prome momentonan, a mustra riba medidanan di higiena cu mester a wordo tuma na Aruba cu nos Creador a duna hopi punto na su fabor.

Na prome luga nos clima seco cu brisa constante, ta nos miho aliado. Aruba ta rondona pa un lama limpi, cu nos mester conserva.

Nos ta bebe awa saludabel y controla pa ley y nos base di higiena ta mara na un nivel halto di educacion y desaroyo cu ta haci cu e forma cu nos ta atende cu alimento conoce higiena y preparacion saludabel di cuminda. E forma cu nos ta atende cu pisca y carni ta evita corupcion di loke ta bira nos alimento.

Nos cushinanan ta limpi. Nos tin cranchi di awa pa laba man y pa nos propio limpiesa y di nos cas.

Nos bañonan  y acesorio ta separa di nos cushina y luganan di come. Ley ta impone regla pa atende cu enfermedad, cuminda na luga publico, condicionnan sanitario na tur parti.

Pero tin peliger tambe. Ningun comunidad ta cien porciento di acuerdo cu tradicion y ley. Situacionnan higienico na varios luga a bay atras cu entrada di pensamento sanitario cu no tin e nivel di e Arubiano.

Control sanitario ta importante den barionan cu vivienda scondi y condicionnan higienico peligroso.

Temporada di Carnaval cu eventonan publico y necesidadnan sanitario publico ta impone exigencia adicional na un destinacion turistico y centro di refugiado cu Aruba a bira.

Economia y situacion financiero mundo ta den problema. Pa hende por atende e parti aki, e mester gosa di un bon salud, cu e coronavirus ta pone den man di nos tur!  Henter comunidad mester uni pues den e lucha contra enfermedad cu ta un causa nacional.

- Advertisement -

DUNA COMENTARIO

Please enter your comment!
Please enter your name here