E rabo largo di coronavirus ta explota

    1737
    0
    SHARE
    - Advertisement -

    Mundo ta confirma alarma cu DIARIO a bati pa comercio

    *Gobierno Chines ta manda periodistanan Mericano bay

    *Fondo Internacional Monetario ta lansa advertencia serio 

    ORANJESTAD (AAN) — Naci na un mercado caminda entre otro cacho, pushi, colebra, djaca, ta wordo bendi bibo of morto pa bira plato di cuminda riba mesa, e coronavirus nobo tin mundo na careda. Periodistanan sigur a haya nan mes ta core den un incidente, cu por tin resultado internacional.

    Pa prome bes for di 1998, gobierno Chines a exigi tres periodista Mericano di e corant Mericano, Wall Street Journal bandona e pais despues di un publicacion cu otro periodista di e corant.

    China ta den un problema serio despues cu otro malesa serio a expone e realidad di bida na China, caminda condicionnan a haci posibel pa awe mundo ta busca un remedi pa e coronavirus nobo, registra oficialmente como COVID-19.

    Mundo no tabata sa cu e fuego artificial Chines cu tabata rementa rond mundo na entrada di 2020, tabata parti di comercio Chines cu dianan despues di entrada di e aña nobo, a wordo paralisa completamente den un intento di e pais pa confronta e resultadonan di e malesa nobo.

    For di prome momento di isolacion di China, cu a paralisa industria petrolero, produccion di un parti grandi di articulonan cu ta wordo uza tur dia, DIARIO a bati alarma na Aruba pa e situacion cu awe ta wordo confirma dor di instancianan mundial manera e organisacion comercial mundial World Trade Organization y e Fondo Monetario Internacional.

    Tabata obvio ayera, cu mundo den un panico total, no por splica den cual direccion mester core y kico lo pasa riba tereno internacional mientras e rabo di e coronavirus nobo tabata sigui crece pa explota manera pagara.

    E hecho cu periodistanan Mericano mester a bandona China por tin un rabo sigur despues cu China y Merca a firma un acuerdo comercial cu no por bira realidad ya cu portanan di economia Chines a cera.

    World Trade Organization na 2019 tabata den estado di alerta pa e problemanan entre Merca y China cu por a afecta comercio mundial. Cifranan di e organisacion mundial di comercio pa e ultimo lunanan di 2019, tabata indica un desaroyo comercial menos bon pa 2020 prome cu e coronavirus nobo a saluda mundo.

    Awor cu e malesa a haci su entrada, ta adverti cu e situacion mundial comercial lo sigui conoce problema mientras e gigante di produccion mundial riba tur tipo di articulo, no por entrega producto na mundo.

    Cifranan di e situacion actual lo por wordo presenta te na Juni 2020 dor di World Trade Organization. E cifranan aki sigur lo ta laat pa dicidi kico lo bay pasa cu Weganan Olimpico cu mester cuminsa dia 24 di Juli.

    Te cu ayera ainda e organisadonan di Weganan Olimpico a bisa cu e encuentronan internacional, cu te awor guera so a pone nan cancela, lo sigui. Pero kico atletanan mes lo kier, no tabata conoci.

    Na diferente encuentronan mundial a nota preocupacion cerca deportistanan cu entre otro ta prefera di laga nan famia keda cas.

    Cancelacion di Weganan Olimpico lo tin resultado sigur debi na e resultadonan financiero cu e tin pa e organisacion, participantenan y tur negoshi cu tin nan entrada cu e weganan.

    Declaracionnan cu sigur a haya tur atencion na mundo tabata bini di IMF, e fondo monetario internacional, cu a uza e palabra cu DIARIO a uza den su prome articulonan pa informa Aruba di e posibel resultadonan di e malesa.

    Incertidumbre mundial tabata loke IMF a confirma despues cu companianan manera Apple a anuncia cu mester tene cuenta cu posibel scarsedad mundial di nan productonan.

    IMF mes no por bisa kico ta bay pasa pero situacion economico mundial ta enfrenta e reto grandi di incertidumbre.

    Si IMF mes no por bisa kico lo pasa cu economia mundial si no stop COVID-19, DIARIO tambe mester tene su mes na sigui spierta Aruba, mientras e rabo largo di e coronavirus nobo ta sigui crece y explota manera un pagara.

    - Advertisement -

    DUNA COMENTARIO

    Please enter your comment!
    Please enter your name here