Home Impuesto Esaki ta e ultimo siman pa haci pago di impuesto di vehiculo...

Esaki ta e ultimo siman pa haci pago di impuesto di vehiculo di motor

11
0
SHARE
- Advertisement -

Tene cuenta cu algun aspecto importante:

ORANJESTAD (AAN): Directora di DIMP, Luenne Gomez, a splica cu ta bon pa bin cu algun informacion dilanti pa loke ta trata pago di impuesto di motor, mirando cu esaki ta e ultimo siman pa haci pago corespondiente. 

ORARIO DI CAHA 

Gomez a indica cu e orarionan di nan oficina ta e siguiente. Na nan oficina na Camacuri nan ta brinda servicio di 7:45 am pa 11:30 am y di 1:15 pm pa 3:30 pm. Na e MFA’s, Noord, Paradera y Savaneta lo ta habri di 8 am te 3 pm, non-stop. Na MFA Santa Cruz y Hulpbestuurskantoor na San Nicolas for di 8 am te 11:45 am y di 1 pm pa 3 pm.

Ta bay tin 6 cahero prepara pa brinda servicio na e clientenan, na Camacuri. Dos cahero na cada MFA y un cahero na Hulpbestuurskantoor. Ta bay ta atendiendo den nan salanan personanan 60 plus, mamanan na estado of cu baby. 

IMPORTANTE… 

El a indica cu nan ta ripara cu nan clientenan cu ta sufri un kebrante di salud ta preferibel pa nan laga un hende representa nan of un hende haci un pago di impuesto di vehiculo di motor pa evita cu nan ta yega y bira malo den e salanan.

Tin un team cu lo ta patruyando den e sala pa cualkier eventualidad. Team di seguridad ta cana tambe den e sala pa mantene ordo. Tin reglanan di cas cu mester cumpli cune: no pechi, no bril di solo, celular, tampoco ta permiti pa filma den e salanan y pone esaki riba Facebook pa seguridad di DIMP, a señala.

 

HACI PAGO ONLINE

 

Mirando e cantidad di contribuyentenan cu ainda falta pa paga impuesto di vehiculo di motor, DIMP ta keda boga pa haci pago online. Esaki ta evita aglomeracion di hende den e salanan y cu nan seguridad tambe lo ta na peliger.

Loke e cliente tin cu haci ta download Bo Impuesto App riba nan telefon. Yena e informacion den e seccion di ‘Profile’ y DIMP lo confirma cuanto mester paga via e App. Despues e cliente por habri su online banking di su banco y busca den e lista di ‘Beneficiary’, DIMP Motorrijtuigbelasting y haci e pago online.

Esnan cu haci pago online lo por ricibi nan comprobante di pago for di DIMP si manda un copia di esaki via email na [email protected] 

MFA’s

Ta importante pa menciona cu na e MFA’s por atende un cantidad maximo di 300 cliente pa dia. Esnan cu ta haci un pago mester mantene na 3 number maximo pa persona. DIMP lo saca for di e rij esnan cu tin mas cu tres number pasobra esaki lo trece cu e tempo di espera ta bira mucho mas largo, e directora di DIMP a remarca.

- Advertisement -

DUNA COMENTARIO

Please enter your comment!
Please enter your name here