Ex prome dama Doina Eman ta inicia awe tratamento di kimoterapia

    548
    0
    SHARE
    - Advertisement -

    Aunke tumor canceroso no tey mas…

    ORANJESTAD (AAN):  Diamars atardi, ex Prome Minister Mike Eman a convoca un reunion cu prensa na cas di Mama Blanche pa asina duna un update relaciona cu e salud di su casa señora Doina Eman.

    E ex mandatario a expresa na prome lugar palabranan di gratitud y aprecio pa tur e sosten y oracion cu nan a haya y ta hayando na e momentonan aki relaciona cu e salud di su casa Doina cual ta conoce momentonan dificil for di dos luna pasa te cu awor.

    Eman a bisa cu nan a wordo confronta diripiente cu un kebrante di salud bastante severo y dificil di su señora Doina.

    Pa e motibo ey, nan kier a duna un splicacion di unda nan ta para awe den loke ta e buskeda di e salud di Doina. El a bisa cu Diaranzon pasa nan tabata tin un cita importante cu e specialista oncologo despues cu Doina a haci un operacion na December ultimo.

    Na Januari nan a haya un noticia hopi fastioso cu unda el a wordo opera a constata cu tabata tin un tumor cu a kere no ta canceroso. Pero despues a resulta cu tog ta uno canceroso y bastante complica pa trata.

    E pregunta e momento ey tabata con leu e malesa aki tabata na momento cu Doina a sinti e sintomanan te cu e mester a opera.

    Diaranzon pasa, nan a haya tog un bon noticia cu for di tur e scannan cu a wordo haci na Aruba y na Colombia cu si analiza tur e scannan di tripa y stoma, esakinan ta mustra cu no por a wak nada mas canceroso.

    E ora ey ta keda cu caminda cu a opera tabata tin un cancer basta complica y pa e motibo ey e specialistanan ta recomenda un tratamento di kimoterapia cu lo cuminsa awe mainta cu lo dura mas o menos 4 luna y mey, Mike Eman a duna di conoce.

    El a agrega cu e tratamento ta bay tin su efectonan secundario, pero Doina lo sigui haya su sosten 24/7 manera a sosode tur e tempo aki pa asina surpasa e momento dificil.

    Eman ta masha agradecido pa tur e sosten cu nan a haya y pa e oracionnan pasobra tog e diferente testnan awor ta mustra otro y na e momentonan aki ta duna nan hopi speranza cu e tratamento profesional cu Doina lo haya na Aruba mes lo ta uno exitoso.

    Doina Eman di su banda a expresa palabranan di danki pa e oracionnan y tur e belanan cu a wordo cendi. “Danki di curazon, nos tambe ta conbibi cu tur e famianan cu ta pasando asina duro (…) Dios bendiciona boso tur pasobra sin Dios nos no por”.

    Ta di spera cu dentro di algun luna por haya sa di un resultado mas positivo ainda y cu Doina Eman por recupera su salud completamente.

     

    - Advertisement -

    DUNA COMENTARIO

    Please enter your comment!
    Please enter your name here