Home General HTLV-111-LAV ta haci bofon di panico pa COVID-19

HTLV-111-LAV ta haci bofon di panico pa COVID-19

200
0
SHARE
- Advertisement -

Papia berdad na un pais cu entrada legal y ilegal continuo

 *Cifranan ta mustra cu no ta hoben so mester di proteccion

*AIDS ta morto disfrasa durante temporada Carnaval 

Aunke hopi ta sconde nan angustia, sigur cerca hende cu pa nan trabou ta exponi na contacto cu hende, ta biba cu temor a base di informacion cu ta alcansa nan riba e peliger di COVID-19,  e nomber oficial di e coronavirus nobo.

Na mes momento comunidad ta sumamente preocupa cu nuebe luna despues di Carnaval, e pais por wordo confronta cu un aumento drastico di ciudadano pa motibo di nacemento cu no tabata planea.

Pa un pais cu entrada legal y ilegal di exterior, sigur e peliger di e corona virus nobo, ta autentico. Sigur si tene na consideracion cu cualkier hende cu tabata na China y a biaha pa otro pais of a subi crucero, por entrega nan e malesa.

Pa un pais cu entrada legal y ilegal di exterior, crecemento di poblacion sigur cu baby cu no tabata planea y cu despues mester bay school y haya trabou, tambe ta un problema.

Pero e enemigo mas sigur cu cualkier seconde por ataca, ta parce di a haya un chens pa relaha. Esaki ta e motibo pa awe DIARIO pidi hoben y adulto pa proteha nan bida y mira bon kico nan ta haci na culminacion di temporada di Carnaval cu Rey Momo na timon.

Awe atrobe nos ta bati alarma pa recorda pueblo cu HTLV-111-LAV ta destructor di bida. Awe nos deber periodistico ta exigi nos pidi representante di tur edad, pa evita posibel morto dor di contacto sexual, uzo di luganan sin higiena pa haci necesidad humano y contacto cu hende cu ta sangra entre otro.

Awe nos kier recorda Aruba cu tin un menasa di morto cu nunca nos mester for di bista aunke malesanan nobo ta pone nos lubida.

Awe nos ta papia di un corona virus nobo, cu a haya e nomber di COVID-19 y den un par di luna a mata 1874 persona di e totalidad di 73.336 persona infecta mientras 12.968 a recupera.

Awe nos mester bolbe den historia pa recorda cu na 1959 na Congo, Africa, testnan a revela un virus cu mester a cuminsa afecta hende silenciosamente for di dies aña prome.

Na 1970, un mundo sin sistema computerisa y forma digital sofistica pa inventarisa loke ta pasa na mundo, a wordo avisa cu na Merca tambe nan a descubri e virus cu na 1989 a haya e nomber di AIDS.

Pulmonia, cancer, ta entre e resultadonan di AIDS, cu ta kibra e sistema di defensa humano pa mata hende. Ciencia a descubri remedi, cu lamentablemente no ta yega tur hende y tur luga y cu a haci posibel pa den e trafico ilegal di hende, AIDS por plama sin ningun consideracion cu e dolor cu e ta causa.

Con grandi e riesgo ta pa haya AIDS? Na 2018, cifranan oficial ta papia di 36.2 miyon adulto y 1.7 miyon mucha (bou 15 aña) cu ta sufri di AIDS.

21 porciento di hende cu AIDS, no tabata sa cu nan tin AIDS.

Na 2018, un total di 23.3 miyon hende tabata haya tratamento contra AIDS, cu a trece cambio grandi den nan bida.

Ciencia a logra baha e cantidad di casonan mortal di AIDS cu 55 porciento.

Paisnan den vecindario directo di Aruba ta produci refugiado, cu tin problema pa haya tratamento medico y ta bini Aruba na forma ilegal of como turista.

Mundo conoce hende cu trastorno mental cu conscientemente ta trata di plama nan enfermedad.

Awe nos ta analisa e chens pa hende muri a base di circunstancianan mas frecuente den temporada di Carnaval.

Nos mester evita famia cu nos no ta planea. Nos mester evita e corona virus nobo. Pero nos nunca mester perde for di bista e peliger grandi di AIDS cu por bira motibo di morto despues di momentonan cu tabata parce placentero, uzo di luganan pa nos haci nos necesidad y comunicacion cu sanger.

 

- Advertisement -

DUNA COMENTARIO

Please enter your comment!
Please enter your name here