Home Impuesto Incumplimento cu impuesto a genera casi 8 miyon florin na boet na...

Incumplimento cu impuesto a genera casi 8 miyon florin na boet na 2019

400
0
SHARE
- Advertisement -

Hopi negoshi no a cumpli cu nan obligacion

ORANJESTAD (AAN):  Directora di Departamento di Impuesto, Luenne Gomez a duna di conoce cu nan ta bay inicia un campaña. Nan ta pensando riba e nomber. Esaki ta relaciona cu e tips cu comunidad ta duna pa loke ta comerciantenan cu no ta cumpliendo cu e ley di BBO riba e recibo.

Tur recibo mester tin un prijs final cu ta inclui BBO, BAVP y BAZV. Kiermen, e prijs riba e reki mester ta e mesun prijs cu e consumidor ta paga na caha.

DIMP tin un plan di maneho pa e aña aki tambe. Aña pasa a controla 57 negoshi. A trece casi 18 miyon coreccion y tabata tin casi 8 miyon florin na boet cu a pone pa negoshinan cu no a cumpli y e aña aki ta bay sigui, Gomez a remarca.

E control aki mester sosode pa sigura cu tur hende ta cumpli y gobierno ta haya su ‘fare share’. Cumplimento y incumplimento ta algo cu semper a existi den historia di impuesto di un pais, a agrega.

Asina cu tin e cobranza di un impuesto, tin hende cu ta cumpli boluntariamente, pero tin hende cu no ta cumpli. E ora ta cu ponemento di boet y haciendo e controlnan necesario ta obliga e contribuyente pa cumpli cu su debernan fiscal.

DIMP ta boga pa bay di un pago obligatorio pa un pago boluntario. “No warda te ora beslastingdienst bin bishita bo negoshi. E ora bo ta haya bo cu hopi mas gasto pasobra e boetnan ta fuerte. Pero cumpli si cu impuesto pasobra si bo ta haci negoshi bo ta bay genera entrada y riba e entrada ey bo tin cu paga impuesto”, Luenne Gomez a remarca.

Departamento di Impuesto tey pa garantiza e cobranza y si un hende no ta cumpli, caminda cu no tin cumplimento boluntario, DIMP lo mester bay enforza e ley y e ora e contribuyente lo haya boetnan y otro consecuencianan pa un negoshi cu por a wordo evita.

Asina cu e cobranza no wordo paga, e cobranza ta keda habri y DIMP ta saca un aanmaning y si e cliente no ta reacciona ta saca un dwangschrift y asina leu ta pone beslag ariba cosnan di e negoshi y ora di bay bende e ta bira un situacion fastioso, e comerciante ta rabia, etc.

Pero e comerciante por a evita esey desde cu e cobranza a sali pa bay cera un areglo of papia cu e inspector pa bisa kico ta loke e por paga y traha un areglo pe, e directora di DIMP a splica.

Ta keda na responsabilidad di e comerciante pa acerca Departamento di Impuesto. E intencion ta pa baha e drempel dunando informacion te hasta riba social media, via website, via e App Bo Impuesto.

Banda di esaki lo tin un portal completamente digitaliza pa e comerciantenan haci nan aangiftenan. Banda di esaki ta ofreciendo varios sesion di informacion na comerciantenan.

E falta di informacion ta pone cu e comportacion di pago no ta manera mester ta. DIMP ta purbando di yuda e contribuyente y di otro banda ta espera cu e contribuyente ta cumpli cu su debernan fiscal, Luenne Gomez a subraya.

- Advertisement -

DUNA COMENTARIO

Please enter your comment!
Please enter your name here