Home Gobierno Minister Dangui Oduber a lanza plan di prevencion pa enfermedadnan no contagioso

Minister Dangui Oduber a lanza plan di prevencion pa enfermedadnan no contagioso

171
0
SHARE
- Advertisement -

Causa di morto number un na Aruba ta malesanan no contagioso

ORANJESTAD: Dialuna mainta a tuma lugar e lanzamento oficial di e plan nacional multi-sectoral pa prevencion di malesanan no contagioso (non-communicable diseases NCDs) na Marriott Ballroom.

Durante e lanzamento, Minister di Salubridad Publico  Dangui Oduber a hiba su discurso den presencia di representantenan di di PAHO/WHO Dr. Erica Wheeler y Dr. Taraleen Malcolm.

Tambe tabata tin varios miembro di Parlamento, Directie Volksgezondheid Aruba y demas stakeholders presente e mainta aki.

E mandatario a trece dilanti den su discurso cu e proceso pa bin cu un plan nacional di prevencion a cuminsa na November di 2018 caminda a presenta un analisis di e situacion y esaki a keda discuti entre tur e stakeholders.

Den e analisis aki a conclui cu e causa di morto number un na Aruba ta malesanan no contagioso y e riesgo pa esaki aumenta ta grandi.

Datonan ta mustra cu e malesanan causante mas grandi di morto prematuro na Aruba ta entre otro cancer, problema cardiovascular, diabetes, malesanan respiratorio cronico y mucho mas, tur ta NCD’s

Datonan na 2017 riba estilo di come basa riba un encuesta di salud a indica cu na Aruba 52% di e poblacion riba 4 aña di edad ta consumi fruta, 55% ta consumi berdura tur dia y 25% ta consumi e productonan aki 3-5 biaha pa siman.

Un encuesta riba actividad fisico a demostra cu na Aruba 54% di adulto ta participa den deporte of otro actividad similar. Tambe a conclui cu ni e adulto ni e hoben no ta alcanza e cantidad di actividad fisico rekeri den 1 siman, segun e minister.

E mandatario menciona cu na 2018 ora e la reuni pa prome biaha cu e nefroloog nan como Minister di Salubridad Publico nobo. tabata e momento cu nan a expresa na su persona nan preocupacion riba e crecemento den e cantidad di pashent cu ta wordo trata pa medio di dialysis na Aruba. A keda divulga na e mandatario cu 16.2% di e poblacion di Aruba ta sufri di diabetes y esaki ta mucho mas halto cu e average mundial di 8.3%, es decir Aruba ta casi dos biaha mas halto.

Den e mesun reunion aki tambe a toca e tema di cuanto esaki ta costando AZV. A keda presenta cu e costo di 1 pashent di dialysis pa AZV ta aproximadamente 100 mil florin pa aña. E tempo ey Aruba tabata tin 200 pashent cu un crecemento di 24 pa 30 pashent pa aña, e 200 pashentnan aki a costa AZV aproximadamente 20 miyon florin pa aña.

E mandatario a bisa cu su vision ta pa promove un miho cuido medico y un mihor calidad di bida pa e poblacion di Aruba. Pa logra haci e vision aki realidad e unico manera tabata pa bin cu un plan nacional di prevencion riba NCD’s.

Na Maart 2019 a tuma lugar un workshop di 2 dia caminda tur e stakeholders representando diferente sector na Aruba a participa pa yega na un plan nacional. Pa e plan aki ta exitoso e tabata pa importante pa duna tur hende cu ta traha den e field e oportunidad pa duna nan input y participa activamente na e plan.

Minister  Oduber a bisa cu hopi orguyo cu awor e plan ta un realidad, cu e asistencia tecnico di PAHO awe Aruba tin su propio plan nacional multi-sectoral pa cu prevencion di malesanan no contagioso (non-communicable diseases NCDs) 2020-2030. Cu e plan aki Aruba ta un ehempel. Aruba ta e prome pais den Caribe cu tin un plan nacional di prevencion.

“Hopi gobierno a papia di prevencion den salud den pasado. Nos gobierno a pone den nos programa di gobernacion cu nos lo bin cu un plan nacional di prevencion pa asina yuda nos comunidad hiba un bida mas saludable y percura pa garantiza e sostenibilidad di e fondo di AZV” e mandatario a expresa.

Finalmente Minister Dangui Oduber a gradici PAHO/WHO pa nan asistencia pa haci e plan aki un realidad. Tambe e mandatario a gradici su consehero di Salud drs. Judelca Briceño pa coordina henter e proceso.

E mandatario a gradici tambe AZV, ImSan, HOH, Wit Gele Kruis y HAVA pa ta parti di e directiva pa ehecucion di e plan pa a añanan nos dilanti.

- Advertisement -

DUNA COMENTARIO

Please enter your comment!
Please enter your name here