Mucha y mente criminal ta contradeci otro

    729
    0
    SHARE
    - Advertisement -

    Wega criminal mester pone comunidad analisa su mes

    *Pa ley mayornan tambe ta responsabel pa loke un menor haci

    *Educacion na cas y school ta forma consenshi di mucha y hoben 

    ORANJESTAD(AAN)–Ta parce ayera cu DIARIO a skirbi tocante comportacion di mucha y hubentud despues di incidentenan na school.

    Awe comunidad ta papia atrobe di mucha y hoben relaciona cu casonan cu ta haci nos puntra nos mes, kico futuro di hende lo ta.

    Polis ta bati alarma grandi pasobra muchanan por mata otro den loke ta wordo yama wega. Polis ta papia di mucha y weganan cu por conduci na detencion di loke nos ta yama mucha.

    Na inicio di culminacion di e fiesta di Carnaval cu ta un tradicion di alegria pa Aruba pero tambe ocasion pa hopi hoben cay den trampa di mente maligno, como matutino di pueblo nos mester atende e desaroyonan cu urgencia.

    Ora papia di mucha cu ta hunga, nos ta pensa riba muchanan cu ta core tras di un bala. Ora nos ta papia di mucha cu ta bishita school, nos tin problema pa mira e maldad pa crea un trampa pa herida otro, causa daño na otro, destrui hende.

    Atrobe nos ta bay na e esencia di loke ta un mucha. E ta un ser cu a nace inocente y cu mundo ta programa. E no por papia. E no por yuda su mes. E no por pensa pa su mes.

    Un mucha ta wordo forma dor di educado na cas, na school of den su ambiente. Lamentablemente e cantidad di educador a aumenta tambe riba telefon mobil, tablet, computer cu ta entrega na e mucha cantidad di heroe falso, destructor y peligroso pa hende.

    Pa esaki a sosode e mucha mester a haya placa cerca su mayornan of cu permiso di su mayornan pa e cumpra tanto e telefon, tablet of computer y e weganan cu continuamente tin su atencion.

    Mayornan pues ta permiti, pa hende desconoci programa mente di nan yiunan. Si un mayor tuma tempo pa mira e loke ta tene e yiunan ocupa,  nan ta actua.

    Riba mes linea nos ta papia di educadonan na school, den organisacionnan infantil y hubenil cu mester guia muchanan y si ta necesario guia mayornan mes.

    E siman aki, alarma grandi a wordo bati cu advertencia di autoridad cu tin mucha cu mente criminal. Autoridad lo persigui nan como criminal si ta necesario.

    Kico a resta di mucha y hoben? Den e situacion aki nada. Infancia y hubentud ta wordo considera e temporadanan mas bunita den bida di hende cu un consenshi den desaroyo. Si wega a bira un accion criminal, kico a pasa cu consenshi? Kico lo pasa cu e mucha of hoben ora e ta manda, ora e ta dicidi, ora e ta adulto?

    Kende a programa e mucha na cas y na school? Kende ta dicidi na cas, si acaso tin cas segun e concepto Arubano di e palabra “cas”? Un luga caminda tur hende ta manda pareu, caminda mucha por haci loke nan kier, no ta cas.

    Un school caminda no ta forma consenshi di mucha, no ta school. Den esaki nos ta tene nos mes estrictamente na e concepto Arubano di loke ta cas, famia, school, comunidad.

    Si e mucha ta criminal y por wordo persigui, e mayornan tambe ta responsabel pasobra e mucha ta nan responsabilidad. E educador na school mester forma un consenshi sano cerca alumnonan.

    Comunidad tin un tarea sagrado awe! Rescata nos hobennan y entrega nan un consenshi Arubano!

    - Advertisement -

    DUNA COMENTARIO

    Please enter your comment!
    Please enter your name here