Home Impuesto Nummerplaat: Si bo paga Mitar Aña laat bo tin di saca 75...

Nummerplaat: Si bo paga Mitar Aña laat bo tin di saca 75 Florin extra

260
0
SHARE
— Solamente 53% ya a paga y e deadline ta 28 di Februari 2020.
- Advertisement -

ORANJESTAD(AAN): Diaranzon Relacionista Publico di Servicio di Impuesto Meverly Romano a duna e ultimo desaroyonan pa loke ta pago di impuesto di vehiculo di motor.

“Nos falta 7 dia prome cu e fecha final di 28 di Februari y ta hopi importante pa nos duna un actualizacion di tur cos”.

— Grafico pa esnan pagando Mitar Aña.

“Te aworaki di e 88.730 numbernan cu nos tin registra 53% a cumpli cu pago, unda cu 40% a paga e impuesto di full e aña, mientras cu 13% a paga e impuesto di mitad di aña.  Mirando cu falta apenas 7 dia di trabao pa por yega e fecha final, e cantidad ainda ta hopi abao”.

Esaki segun Romano, kende a sigui bisa cu DIMP lo a desea pa 80% tabata paga.

   SOLAMENTE 53% A PAGA:

E relacionista publico a gradici e 53% pa nan cumplimento, pasobra e personanan aki a demostra cu nan ta respeta nos leynan y cu nan ta tene cuenta cu nan responsabilidad fiscal y cu esey ta algo hopi importante den e mundo di belasting.

“Di e 39.731 cu falta pa paga, 34.685 ta di plachi di number A”.

“Posiblemente den esakinan tin hendenan cu no a paga añanan anterior y hecho ta keda cu e ta un cantidad hopi grandi”, segun Romano, kende a indica cu 2% no a paga, pasobra nan a entrega nan plachi di number.

El a sigui bisa cu mirando cu falta apenas 7 dia di trabao pa e ultimo dia di pago yega, e dianan cu ta bin ta bay ta increiblemente druk.

Segun Romano, un parti ta bay paga via banco, pero si bo wak cuanto falta pa paga, ta un average di alrededor di 5.000 number cu mester wordo paga pa dia.

“E cantidad ey ta hopi halto y si 2000 di e personanan ey yega na Camacuri of cualkier otro oficina di nos, nos no por atende e cantidad ey pa dia”.

“Loke ta bay sosode ta cu nos no por bay duna un cantidad hopi grandi di number na e clientenan cu tin, pasobra nos tin cu tene cuenta cu seguridad tambe”.

“Nos no por yena un sala cu 2000 persona”, segun Romano, kende a indica cu ta purba di mantene e sala entre 250 cu 300 cliente den un momento.

   MFA DEMASIADO YEN:

El a splica cu si yega e cantidad ey ta stop di duna mas number pa wordo atendi y esey ta pone cu si hendenan a yega prome cu ora di ciere di DIMP mes nan por keda sin wordo atendi.

“Mi kier a pidi comunidad pa tene cuenta cu nan seguridad y seguridad di personal di DIMP.  Mesun cos por pasa na MFA y Diamars nos tabata tin un situacion unda cu hopi hende a bay paga BBO y otronan a bay paga number di auto y ya pa 12’or na un di e MFA-nan mester a stop di duna number , pasobra tabata tin mas cu 200 persona den sala”, segun Romano.

El a indica cu tur aña e departamento ta haya hopi critica y ta pesey el a duna e splicacion aki pa hende por compronde ta kico ta e problema.  Mirando tur esaki, DIMP ta sigui recomenda pa hende haci nan pago via banco.

   MULTA AUTOMATICO:

“E ta facil e ta sigur y bo por hacie ki ora cu ta, pero si nos ta pidi esnan cu ta warda pa haci e pago dia 28 di Februari, haci esaki parti mainta pasobra si bo haci esaki atardi, dependiendo di e ‘cutoff’  time di e banco, e pago lo por yega riba e cuenta di DIMP e dia siguiente”.

“Si e pago drenta nos sistema despues di dia 28 di Februari e persona ta bay haya un multa”.

“Esnan cu ta paga cu Aruba Bank of CMB si por conta cu e hecho cu e pago cu wordo haci na e banco ta drenta mesora den e sistema di Servicio di Impuesto”.

Esaki segun Romano, kende a sigui bisa cu esnan cu paga online tin cu manda via email [email protected] nan comprobante di pago, pa despues nan ricibi e recibo di pago via email.

Tuma bon nota!  Si acaso pa Diabierna otro siman, esta 28 di februari 2020 (fecha di deadline) bo NO a logra di paga, bo mester ta prepara pa paga 50% extra ora cu bo yega dia 2 di Maart 2020 na loket.

Por ehempel, esnan cu tin belasting di 300 Florin: Si bo logra toch paga nummer pa henter Mitar Aña (Halfjaar) riba Diabierna 28 di Februari, lo bo tin di paga 162 Florin.

Si bo no a logra paga Diabierna ey, y a bay paga Dialuna 2 di Maart, tene cuenta cu tur hende cu paga laat lo haya automaticamente un multa di 50% di e suma cu nan mester a paga originalmente, plus e suma inicial.  Pues Dialuna e mesun persona ey pagando Mitar Aña (Halfjaar) lo paga 237 Florin.

Splicacion:  Pues si bo belasting ta 300 Florin pa Mitar Aña (150 Florin), e ora riba Dialuna 2 di Maart en adelante, lo bo mester paga 50% extra!  Esta e 150 Florin + 75 Florin di boet, y ainda e 12 Florin pa plachi.  Esey ta yega na e suma di 237 Florin.  Tres dia prome, e suma total lo tabata solamente 162 Florin.

E computernan di DIMP automaticamente lo añadi e multa administrativo si pa 28 di februari 2020 e prome parti no ta paga.

   BARCO TA YEGANDO:

“Hendenan a puntra si e tarifa a cambia pa 2020 y esey no ta e caso.  Loke si por sosode ta si a wordo registra cu e auto tin motor di gasolin y awor a bin resulta cu ta motor di diesel e tin.  E ora ey naturalmente e tarifa lo cambia”, segun Romano.

El a sigui bisa cu si ta bon e barco cu cargamento di plachi di number ta yegando Aruba e siman aki y ta wordo calcula cu den e prome dos simannan di Maart por cuminza parti e plachinan di number.

Ta trata di mas cu 88 mil number y mester controla pa wak si tur e numbernan tey.

Romano a indica cu tin planea pa bin cu un tipo di delivery service, unda cu e plachinan lo wordo entrega na bo cas of oficina.

“Nos ta papiando cu e companianan di seguro riba esey tambe y nos a ricibi bon feedback di nan, unda cu nan ta dispuesto pa coopera mas hopi posibel.  Sinembargo, nan tin cu wak den nan propio cas, con mas mihor nan por comunica cu nos riba e parti ey”, segun Romano.

 

- Advertisement -

DUNA COMENTARIO

Please enter your comment!
Please enter your name here