Home Politica Pa Prome Minister proyectonan PPP ta bon si nan ta “Placa Pa...

Pa Prome Minister proyectonan PPP ta bon si nan ta “Placa Pa Papa”

136
0
SHARE
- Advertisement -

Parlamentario Arthur Dowers

ORANJESTAD (AAN): Scucha Prome Minister Evelyn Wever Croes sinta papia riba proyectonan di PPP manera hospital, Green Corridor, Watty Vos Boulevard y edificionan di MFA di ta e problema financiero di gobierno, ta muestra di un lider politico cu nunca a traha pa pueblo.

Parlamentario Arthur Dowers pa fraccion di AVP a mustra cu tanto e lider como su partido MEP, nunca a traha pa sirbi interes di pueblo di Aruba, ni den pasado ni aworaki, caminda e lema di cu e ‘hende ta cenral,’ ta simplemente un propaganda barata sin ningun nificacion.

“Ta increibel scucha Prome Minister di un pais, trata di bagatalisa proyectonan cu a worde construi na interes general di e pais y di henter pueblo, cuestiona esakinan como si fuera nunca mester a traha nan.

Ta un lider cu su cabes no ta mucho bon, ta cuestiona un proyecto manera expansion y remodelacion di dr Horacio Oduber Hospital, ya cu aki pueblo ta compronde cu nunca mester a haci esaki.

Pa Prome Minister y su famia esaki lo no ta problema ya cu nan ta busca nan ayudo medico den exterior, mirando con nan a previlegia nan mes y famia ora cu nan ta den gobierno, cu otro palabra, pueblo no merece  miho cuido medico.

Otro locura mas di Premier Evelyn ta ora cu e cuestiona construccion di edificionan di MFA den varios bario rond Aruba, cu segun concepto di su gobierno, nunca mester a worde ehecuta, edificionan cu a alivia hopi molester di hendenan cu mester busca transporte pa bin den centro pa atende cu nan asuntonan.

Pa ilustra cu ki mentalidad gabinete Wever Croes ta funciona cune, por bisa cu parlamentario di POR, Howell a cuestiona te dia di awe di con no a construi un MFA na San Nicolas y a sigura cu esaki lo tin cu worde construi pero den palabranan di su Prome Minister, lo no haci esaki ya cu e lo costa placa.

Green Corridor tabata un proyecto cu a pasa den 30 aña di planeamento, un proyecto cu sin duda tabata necesario pa alivia trafico entre Oranjestad y pariba di brug y cu awe ta mustra con efectivo esaki a bira.

Watty Vos Boulevard ta otro proyectonan cu no solamente a mehora infrastructura di nos isla pero a alivia tragico tambe den varios bario y cu a habri caminda pa desaroyonan economico, cual desaroyo bou di gabinete Waever Croes nunca lo prospera mirando e falta di capacidad pa traha pa pueblo.

Awor loke Prome Minister Evelyn Wever Croes no ta realisa of mas tanto ta pretende di lubida y kier pa pueblo lubida, ta cu su famia ta parti di e debe di pais Aruba ora cu a huur e edificio di un hotel den centro di Oranjestad cu no tabata apto y a huur un edificio na Tanki Flip prome cu esaki a caba di worde construi.

Ta famia yega di Prome Minister tabata envolvi den e proyecto aki y por bisa cu famia mas yega na Evelyn a strica riba 20 miyon di Florin y ningun momento el a interveni pa trata di anula e contrato di e hotel aki, apesar cu e no tabata worde usa mas.

Oficina di Papa cu a gana miyones den pasado y actualmente ya cu e ta abogado preferi di gobierno di Prome Minister Wever Croes, stricando placa pa cosnan cu simplemente ta worde inventa pa asina por cobra placa di pueblo.

Cu ki curashi e lider di MEP por bin papia awor di debe cu pueblo tin cu paga, sigur ora cu tur e inversionnan aki tabata na interes general di e pais y contrario na su gobierno tambe actual no na interes di amigo y famianan, di sponsor- y sostenedonan.

Pa colmo Prome Minister ta manda su cheerleadernan den Parlamento bin hunga mesun comedia aki den Parlamento buscando un forma pa tira santo den wowo di pueblo pa asina gabinete Wever Croes introduci mas medida dentro di poco.

Manera mi a bisa caba anteriormento, e momento ta yegando cu Prome Minister lo bay haya pueblo para dilanti di oficina di gobierno, pa busca su placa back, pa busca beneficionan cu nan a perde bou di e gobierno sin gevoel aki,” Parlamentario Arthur Dowers a declara.

 

- Advertisement -

DUNA COMENTARIO

Please enter your comment!
Please enter your name here