Home Parlamento Parlamento via un mocion ta purba evita cu gastamento di placa estilo...

Parlamento via un mocion ta purba evita cu gastamento di placa estilo BO Aruba lo ripiti den futuro

184
0
SHARE
- Advertisement -

ORANJESTAD (AAN): Manera DIARIO a trece ampliamente dilanti di e tratamento den Parlamento relaciona cu e investigacion di Contraloria General titula “Rapport BO Aruba”, e siman aki lider di fraccion MEP, Rocco Tjon, a mustra cu diferente punto preocupante a bin dilanti.

E rapport a splica cu tur e proyectonan ehecuta bao Gobierno di AVP di 2010 pa 2016, tabata falta transparencia, falta splicacion con e fondonan aki a wordo usa.  No tabata contesta tampoco te hasta preguntanan cu Contraloria General a haci na e Ministro e tempo ey.  “Puntonan hopi preocupante,” ta loke Tjon a bisa.

E lider di fraccion di MEP, pa nan ta importante cu ora tin reunion asina, cu nan tin un meta final tambe.  Y esey a bin den forma di un mocion pa evita cu e tipo di practicanan aki ta sigui pasa den futuro, y tambe pa exigi un investigacion mas profundo riba e hayazgonan aki di Contraloria General.

Un punto importante cu a wordo señala den e reunion, ta cu den e proyectonan aki a desvia di e leynan di contabilidad y ora bo haci esey, bo tin di anckre den un Ministeriele Beschikking.  Pero Gobierno di AVP no a haci esey.

Den e rapport a splica exactamente cua ta e proyectonan cu a wordo investiga, y awor Parlamento kier pa Gobierno investiga ta cua proyectonan a desvia.  Ta conoci cu nan ta proyecto hopi grandi.

Un di e proyectonan ehecuta den cuadro di BO Aruba, ta e conocido “Tram” den cual a inverti 44,4 miyon Florin y e ta consisti di 14 deel-projekten.  Awor a sali na cla cu 7 di e deel-projektnan aki no a cana segun reglanan di bon gobernacion.  Pues nan a wordo duna bao mesa.  Y ora bo ta trata sumanan di 44,4 miyon Florin, e ora esey ta hopi preocupante.

E impactonan di e dealnan cu BO Aruba ta enorme pa economia, y tambe riba sector social cu a keda full neglisha pa AVP.  Anto e suma cu BO Aruba a costa di 2010 pa 2016 ta 1.6 biyon Florin.  Placa cu por a wordo usa den enseñanza y sector social.

Tin hasta proyecto fantasma den BO Aruba tambe, esta cu nan a wordo presupuesta, pero nunca a keda ehecuta.  Toch awendia nos tur ta paga pa nan.

“Tur esey ta hopi preocupante, y e tipo di practica aki no mag di sigui pasa den futuro,” Tjon a indica.

Pesey a pone den e mocion, e pregunta con Gobierno actual lo percura pa evita cu e tipo di practicanan aki por sigui socede den futuro, y con nan ta teniendo cuenta aworaki cu e tur e recomendacionnan di Contraloria General.

 

- Advertisement -

DUNA COMENTARIO

Please enter your comment!
Please enter your name here