Home Salud Pashent Arubano un luna den sala di espera na Colombia

Pashent Arubano un luna den sala di espera na Colombia

671
0
SHARE
- Advertisement -

Gastonan enorme cu fondonan hopi necesario den crisis actual

*AZV mester soluciona tardansa asistencia medico den exterior

*Pashent y compañero den angustia en espera di dokter

ORANJESTAD(AAN)–Mester introduci un control mas severo pa e forma cu pashentnan cu Aruba ta manda exterior pa cuido medico, ta wordo atendi dor di dokternan.

Mester introduci registronan cu ta mustra cuanto tempo pashentnan mester warda pa nan haya e asistencia medico cu nan a bay busca den exterior.

“Dokternan di cas y specialistanan mester cuminsa presta mas atencion na loke ta pasa cu nan pashentnan ora nan bandona nan consultorio?” Esaki ta e pregunta cu ta surgi.

Ayera DIARIO a wordo confronta cu otro caso den cual segun informantenan un persona cu mester haya asistencia medico na Aruba,  ta registra mas cu 30 dia sin haya oportunidad pa atende cu e specialista loke ta peligroso pa su condicion di salud y directamente ta afecta e fondonan financiero di AZV.

Informacion cu a alcansa DIARIO ta crea preocupacion grandi pa bienestar di pashentnan di Aruba cu ta haya permiso di AZV pa haya asistencia di dokter na Colombia.

Tin cierto tipo di asistencia medico cu Aruba no por duna su ciudadanonan y ta haci cu nan mester biaha pa exterior cu den caso di malesa semper ta doloroso. Na momentonan dificil mester ta leu di cas y di famia.

Pa ley personanan cu problema di salud cu wordo manda exterior, ta biaha cu un persona. Fondonan publico mester cubri tur gasto di e fondo cu tin limitacionnan entre otro riba remedi cu e ta cubri pa asina e scapa gasto.

Di un manera of otro no ta tene cuenta cu e gastonan cu ta relaciona cu e tempo di angustia di pashentnan.

Un persona a keda 30 dia na Colombia sin por a haya asistencia di e dokter cu el a bay bishita. Con por ta posibel cu un persona cu biaha pa Colombia mester warda tanto tempo, ta dificil pa comprende.

Personanan cu haya permiso pa bay exterior pa check nan salud, tin condicionnan cu por contene mas peliger pa nan salud. Nan mester haya atencion medico mas pronto cu ta posibel y for di prome cu nan biaha ya tur cita mester ta regla.

Informantenan ta indica cu mester bini mas informacion riba e topiconan aki pa asina pashentnan ta prepara pa loke ta spera nan.

Personanan cu ta biaha cu pashent tambe ta haya nan mes confronta cu mas tempo den exterior cu nan a spera.

Segun informantenan mester duna dokternan di cas y specialistanan un registro special den cual nan por sigui e progreso di cada pashent cu a bishita nan consultorio.

E sistema computerisa cu e cadena medico di e pais mester conoce, por a wordo interumpi pa e atake pa medio di internet, pero mester sigura un maneho cu un dokter di cas y un specialista tin control riba loke ta pasa cu nan pashent cu mester di mas atencion ora e bandona nan consultorio.

DIARIO lo bolbe riba e topico importante. Salud di hende ta central den bida y den comunidad.

- Advertisement -

DUNA COMENTARIO

Please enter your comment!
Please enter your name here