Prensa Venezolano ta raporta cu otro avioneta a wordo gara na Aruba cu casi 1 ton di oro ilegal

    2877
    0
    SHARE
    - Advertisement -

    Parce ta trata di ‘Fake News’ y noticia a bira viral

    ORANJESTAD (AAN): Un noticia publica Diadomingo 16 di Februari 2020 den oranan di merdia riba e portal di La Patilla, a mustra un informe di e periodista Venezolano, Castro Ocando, cu un avioneta a wordo confisca na Aruba, ora cu el a yega cu abordo casi 1.000 kilo di Oro Venezolano di pureza halto.

    Segun e informe, na Aeropuerto di Aruba a detene 3 persona di e avioneta, cu pa colmo tin matricula falso Mericano.  Awor e Piloto y e dos ocupantenan por bay enfrenta acusacion criminal na Merca.

    La Patilla a mustra cu e avion mes a lanta vuelo for di un caretera solitario net pafo di Ciudad Bolivar na Venezuela, a haci un aterizahe di emergencia na Aeropuerto Reina Beatrix.  Autoridad di Douane a keda sorprendi cu e cargamento inusual, esta un total di 932 kilo di oro di pureza halto, casi un ton, cu tabata poni den maletanan di luho.

    Nan a listra e avion despues cu investigadornan na Aruba a descubri cu e avion chikito ta bulando usando matricula Mericano, esta N36754, cu den realidad ta responde na un avion monomotor, di cual su ultimo vuelo tabata mas di 20 aña pasa na California, segun e registro di e website FlightAware.

    Segun e registronan di FAA di merca, e avion N36754 original a wordo saca di e registro na September 2012.  El a wordo adkiri pa un cumprado priva na Los Angeles, California.

    Den e procedimento a detene e Piloto Venezolano y e dos ocupantenan Venezolano.  Den e operacion a participa tambe Agentenan Federal mericano cu ta staciona na Aruba pa cu e US CBP pre-inspection.

    E cargamento tin un balor riba mercado internacional di como 50 miyon Dollar.

    E tripulantenan cu a wordo interoga, ta den proceso di wordo extradita pa Merca, pa enfrenta acusacionnan criminal na Florida.

    E relato di La Patilla no ta menciona ningun fecha cu e caso aki aparentemente a socede, ni si acaso esey ta den fin di siman cu a pasa.

    Na Aruba, como cu awor Ministro Andin Bikker a prohibi Voceronan Policial di traha relato den weekend pa prensa (pa prome biaha den Historia di Aruba), casi no ta haya nada di balor mas di Polis pa dos aña caba.

    Prome cu ciere di edicion DIARIO a haya informacion for di fuentenan fidedigno, cu ningun avioneta cu e registro menciona a ateriza na Aruba y no tabata tin ningun aterizahe di emergencia, ni avionnan straño manera a keda menciona door di La Patilla.

    Parce cu ta trata aki un bes mas di ‘Fake News’ y mas cu logico tur  ‘Fake News’ tin tendencia di bira un ‘noticia viral’ cu tur hende ta comparti pa medio di e plataformanan social existente.

    Posibelmente, durante di awe Gobierno lo por trece algun informacion pa confirma of pa nenga e veracidad di e informe aki.

    - Advertisement -

    DUNA COMENTARIO

    Please enter your comment!
    Please enter your name here