Home General Presupuesto semper ta herencia di pasado

Presupuesto semper ta herencia di pasado

100
0
SHARE
- Advertisement -

A menos cu haya un instancia pa paga debe y obligacion 

*Ta basa riba debe of fortuna hereda ta dicidi kico por gasta

*Realidad PPP y Citgo no tabata visibel den cifra di pasado 

ORANJESTAD (AAN) — Den un situacion internacional sumamente dificil, cu hasta ta duna indicacion di un caida economico mundial, Aruba ta prepara pa bay atende cu su presupuesto, cu ta e placa cu e lo tin na entrada pa cubri su gastonan.

Aruba a cay den un crisis na momento cu mundo a drenta un situacion cu ningun hende por a pronostica. Ta e riesgonan cu situacion mundial actual ta nifica pa paisnan ta motibo cu gobernacion no mester gasta placa sin corda cu mester di un reserva.

Pueblo di Aruba durante e luna di Maart, continuamente lo wordo confronta cu e palabra presupuesto y sigur lo mester atende cu tur tipo di informacion for di mundo politico, cu lamentablemente hopi bes no ta honesto cu pueblo. Esaki ta haci cu medionan di comunicacion no por informa pueblo solamente a base di loke politiconan ta informa nan.

Den e situacion actual, cu ta exigi pa pueblo comprende kico ta pasa, DIARIO sigur lo entrega pueblo e informacionnan necesario pa pueblo na un forma realmente democratico por vigila loke ta pasa den mundo politico.

Presupuesto ta un realidad diario di tur ciudadano. Tur Arubiano, basa riba e responsabilidad propio di e educacion na nos pais, ta spierta cu e pregunta cuanto placa nan por gasta riba e dia cu a cuminsa. Un ciudadano responsabel tur dia ta laga loke e tin disponibel dicidi pa su gastonan.

Dependiente di e areglo di pago na trabou, semanalmente of tur luna, un ciudadano ta traha su presupuesto di loke e mester paga y di loke ta resta. E ta paga gastonan di cas, auto, television nobo, pues tur loke ta su responsabilidad pa paga.

E forma cu Ley ta dicidi cu gobierno mester gasta placa, no ta diferente. Un bon gobernacion ta gasta e placa cu pueblo ta paga pa gobierno por maneha e pais. Un bon gobernacion no ta gasta loke no tin.

Un bon gobernacion no ta crea debe pa pueblo paga pero ta tene cuenta cu situacionnan dificil por presenta manera awor ta e caso.

Na Maart, gobierno di Aruba mester dicidi con Aruba ta atende cu placa na 2020. E placa cu awor gobierno ta ricibi den su caha, mester paga e gastonan diario normal di Aruba pero tambe e gastonan cu ayera a entrega.

Awe gobierno mester paga debenan cu a wordo haci. Mescos cu e Arubiano mester paga banco pa e auto cu el a cumpra y interes, gobierno mester paga pa e debenan cu el a hereda y interes riba e debe.

Gobierno actual mester paga placa di debenan (sumanan) cu el a hereda. Banda di esaki gobierno actual mester paga tur e proyectonan cu a construi sin placa y sin vigilancia necesario di e gastonan envolvi. Esaki ta loke ta wordo yama proyectonan PPP.

Gobierno actual mester haci tur gasto den e situacion economico cu el a hereda y den cual e proyecto refineria no a produci e placa cu gobierno anterior a bisa pueblo cu e ta bay produci.

Gobierno actual mester cumpli cu obligacionnan cu gobierno anterior a laga atras manera e aumento di salario cu gobierno anterior a priminti trahadonan di gobierno, a proba.

Gobierno actual mester paga pa e herencia financiero cu el a ricibi y cu e mester a tuma tempo pa documenta pasobra no tabata tin documentacion adecua di e maneho financiero di pasado, manera documentonan oficial ta indica.

Awe den un crisis mundial, cu ta crea incertidumbre pa economia actual y posibel ampliacion economico pa e pais, gobierno Evelyn Wever-Croes mester percura pa un bon maneho financiero di Aruba cu mester cumpli cu su obligacion financiero den cual loke el a hereda, ta hunga e papel crucial.

Aruba, mescos cu tur hende, mester cubri su gasto y debenan haltisimo, a menos cu e haya un instancia pa cubri tur gasto y debe loke ta fantasia, cu a destrui futuro di Aruba.

 

 

- Advertisement -

DUNA COMENTARIO

Please enter your comment!
Please enter your name here