Publicacion oro Venezolano a bira peliger grandi pa Aruba

    2407
    0
    SHARE
    - Advertisement -

    Articulo di La Patilla y Castro Ocando por tin intencion scondi

    *Aruba ta wordo pusha den confrontacion Arabe y Hudiu

    *Reino mester yuda atende cu noticia falso di avioneta y oro 

    ORANJESTAD  (AAN) — Na momento cu hasta Reino a duna Aruba un oportunidad pa porfin Aruba relaha den e temporada di Carnaval pa despues sigui soluciona su problemanan, un publicacion riba un website Venezolano, a bira un bofta den cara di Aruba.

    Den e edicion di 17 di februari, DIARIO a mustra cu den su espacio riba internet loke ta yama su mes “periodismo” bou e nomber La Patilla, a lansa acusacion serio contra Aruba y gobernacion di Aruba.

    La Patilla y un supuesto periodista Castro Ocando cu lo a produci e articulo falso, a lansa acusacionnan serio contra Aruba y e sistema legal a base di cual Aruba ta funciona. E “escritor” Castro Ocando, a lansa acusacionnan baho contra Aruba y gobierno di Aruba, cu a wordo acusa hasta di a silencia autoridad riba un cargamento di oro cu a yega Aruba.

    Ayera tanto La Patilla como Castro Ocando a bay sconde y a retira e publicacion falso for di internet despues di e produci un peliger grandi pa Aruba.

    E acusacion falso a wordo uza dor di un medio di comunicacion Hudio na Argentina, JAI, cu a haci uzo di loke La Patilla y Castro Ocando a trece dilanti pa yega na e conclusion, cu e cargamento di oro por tabata destina pa Medio Oriente pa sirbi como pago pa atakenan terorista contra Israel.

    A base di e articulo, Aruba a wordo pusha den e confrontacion Arabe y Hudiu na Medio Oriente den e presentacion di JAI, cu a uza e informacion hunto cu otro informacion hororoso riba crueldad contra Hudiu.

    Mientras e acusacionnan di JAI a cuminsa circula, La Patilla a deshaci di su publicacion den un acto cobarde despues di un informacion falso, cu ta kibra e imagen di Aruba como estado di derecho.

    DIARIO a discuti e asunto aki cu expertonan riba tereno internacional. A wordo indica cu ta un peliger enorme a wordo crea contra siguridad di Aruba y tur Arubiano.

    A trapa riba e bon nomber di Aruba pero tambe a mara e pais na actonan terorista den un confrontacion mundial peligroso.

    Segun informantenan mester cuestiona e motibo cu tin tras di e publicacion di La Patilla y e supuesto periodista Castro Ocando.

    Aparentemente La Patilla ta uno di  e publicacionnan cu ta haci uzo di website, pues un pagina riba internet, pa duna nan mes e nomber di medio di comunicacion. Nan ta publica loke nan kier pa atende cu e situacion cu cual nan kier atende pa medio di personanan cu ta yama nan mes periodista.

    Informantenan no ta descarta cu cualkier persona cu kier a haci daño na Aruba directamente of pa dal gobierno di Aruba aunke ta destrui henter Aruba, por haci uzo di e publicacion den cual ta acusa gobernantenan y henter e sistema gubernamental di Aruba.

    E peliger cu a wordo crea ta enorme y Aruba mester atende cu Reino cu ta encarga cu siguridad di Aruba riba tereno internacional.

    Informantenan ta mustra cu ta un abuso a wordo haci di Aruba, su gobierno y tur Arubiano pa alcansa un proposito cu a keda scondi dor di loke ta yama su mes medio di comunicacion.

    DIARIO  ta sigui investiga e caso aki y lo sigui informa Aruba di e impacto sumamente serio di e articulo.

    - Advertisement -

    DUNA COMENTARIO

    Please enter your comment!
    Please enter your name here