Home Parlamento Rapport di Contraloria General a constata iregularidad den proyectonan MFA

Rapport di Contraloria General a constata iregularidad den proyectonan MFA

70
0
SHARE
- Advertisement -

ORANJESTAD (AAN): Contraloria General di Aruba a emiti e “Rapport BO Aruba” cu a haci un investigacion riba e forma cu den e seis añanan ey a crea 241 proyecto sin cu nan tin cobertura, cu riesgo negativo, y sin cu a check e consecuencianan financiero pa Aruba. Diaranson mainta tabatin un reunion den Parlamento pa asina trata e seriedad di e rapport aki, y e puntonan asombroso cu a ser descubri aden.

Parlamentario Endy Croes a baha fuertemente riba e manera cu Mike Eman y AVP a construi e edificionan di MFA. E investigacion a determina cu ehecucion di diferente di e proyectonan aki ta completamente contradictorio cu nan propio vision y maneho.

Un ehempel bibo ta lo siguiente. Gobierno di AVP su vision tabata pa renoba edificionan existente di gobierno y asina baha costonan di huur atrabes di e maneho y vision aki.

Esaki ta skirbi den maneho di gobierno anterior. Kico AVP a haci? Net lo contrario. AVP a bin cu e idea pa traha 5 MFA nobo cual finalmente a subi costonan di huur barbaramente.

   Presta placa pa 5 edificio y traha 4:

Gobierno di AVP a presupuesta 17.1 miyon pa traha 5 MFA pero a traha 4 MFA como cu a usa extra gastonan den e promer 4 MFA-nan y no a laga placa pa traha esun di San Nicolas. MFA Noord 4.1 miyon mas 550 mil extra gastonan a sali 4.6 miyon. MFA Paradera 3.2 miyon mas 250 mil extra pa un total di 3.5 miyon. MFA Sta Cruz 3.6 miyon mas 80 mil extra gastonan a alcansa 3.7 miyon finalmente. MFA Savaneta 3.2 miyon mas 410 mil extra gastonan pa un total di 3.6 miyon.

Consecuentemente no a laga suficiente placa pa traha esun di San Nicolas. Pues presta placa pa 5 edificio y traha 4 pero pueblo mester paga prijs di 5 edificio. Pa 25 aña largo gobierno a compromete Aruba pa paga 3.1 miyon pa aña na e proyectonan aki unda pueblo lo paga finalmente 77.9 miyon Florin.

Prijs barbaro pa huur pa m2:

Gobierno di AVP a splica e tempo aya cu lo huur espacionan cu sector priva y social pa reduci gastonan na final y asina genera entrada pa paga e proyectonan cual finalmente AVP no a logra nan obhetivo. E proyectonan aki a sali asina caro y prijs pa huur pa meter cuadra (m2) den un MFA ta 63 Florin pa m2.

Resultado ta cu ni comercio of departamentonan di gobierno no ta interesa pa un huur asina caro. Nan lo no sali di un lugar cu nan ta paga 20 pa 25 Florin pa m2 pa bay complace Mike Eman su idea na 63 Florin na m2. Riba pagina 42 di e rapport di Contraloria General (Bo Aruba) ta splica hopi cla cu gobierno di AVP no a sigui y cumpli cu e proceso legal pa cu nos leynan. No a cumpli cu artikel 26 di Ley di Comptabilidad.

   Actonan iregular castigabel:

Rapport di ARA a nombra 2 otro proyecto como ehempelnan bibo. Tanto Plaza Padu y renobacion di edificio di ATA bieu no a cumpli cu nos leynan vigente.

Contraloria General na e parti aki a remarca cu na momento bo desvia di artikel 26 di ley di contabilidad na e manera cu gobierno di AVP a haci ta actonan iregular y ta castigabel.

Parlamentario Endy Croes ta termina pidiendo Ministerio Publico pa contesta e carta cu Parlamentario Croes a manda pa Ministerio Publico acompaña cu copia di e rapport puntrando pa un opinion di Ministerio Publico alrespecto e rapport Bo Aruba di Controlaria General.

Señal a bay pa gobierno mediante mocion pa entrega keho oficial contra tur esnan cu a comete actonan contra nos leynan.

- Advertisement -

DUNA COMENTARIO

Please enter your comment!
Please enter your name here