Stichting Parkietenbos a haci entrega di carta na Minister Lopez – Lopez  

    121
    0
    SHARE
    - Advertisement -

    Mas di 2200 firma a keda recolecta te cu awor

    ORANJESTAD (AAN):  Aldrich Croes, representante di Stichting Parkietenbos a duna di conoce cu recientemente tabata tin atrobe un candela enorme ariba e dump di Parkietenbos. Esaki ta algo cu nan ta lamenta profundamente.

    El a bisa cu e motivo pakico e dump ta asina aki ta pasobra 50 aña largo of mas, Aruba no a defini con e ta atende cu su desperdicio. A tira y a acumula y despues cu e proyecto di Bouldin & Lawson eynan a funciona pa algun aña y pa algun razon of otro el a stop su funcion.

    Durante e periodo ey, e dump su tamaño tabata controla y tabata crece masha tiki. Pero Aruba a crece den poblacion, mas turista, mas barco y e volumen di sushedad tambe a crece. Diripiente algo a pasa cu e planta eynan cu no a funciona mas y a trece cune cu e sero di sushi tambe a crece di tal magnitud cu tin hopi acumulacion di gas eybao hunto cu e cayente cu dado momento ta surgi un candela, Croes a remarca.

    Pesey e fundacion ta puntra con bin tanto sushedad ainda ta bay dump di Parkietenbos y for di atardi merdia ta cuminsa kita un tiki y anochi ta kima full locual a wordo benta durante di dia eyriba. Esey ta locual a sosode e dianan aki, Aldrich Croes a señala.

    E fundacion tabata tin un bishita cerca Minister Marisol Lopez – Tromp, despues di un luna di a acumula firmanan. Ainda e campaña di firma no a caba. Nan ta acumulando firmanan for di dia cu e campaña a cuminsa y ta bay ta hiba e campaña den diferente bario.

    Den un luna di tempo a acumula mas di 2200 firma y a hiba esakinan na e minister nobo ya cu no kier a perde ningun dia desde cu e mandatario ta sinta den su puesto. E mes a invita e fundacion y nan ta aprecia e cortesia

    E directiva a bay entrega e firmanan y alavez a bay entrega un carta caminda ta urgi e minister pa dos punto importante: Sero Tijshi, caminda cu a bay dera e bales, cu e peticion di e pueblo ta pa cer’e pa motivo cu el a bira un fuente nobo di gas y holo malo cu ta drenta e bario y cu ta haci hende malo tambe. Tambe tin e dump di Parkietenbos cu ora biento cambia, e ora e efecto ta drenta e bario.

    Aldrich Croes a cataloga esaki como un situacion di calamidad di sushedad y desperdicio cu mester traha riba un solucion hopi lihe.

     

    - Advertisement -

    DUNA COMENTARIO

    Please enter your comment!
    Please enter your name here