Home General Trias Politica ta exigi husticia cu placa di pueblo

Trias Politica ta exigi husticia cu placa di pueblo

206
0
SHARE
- Advertisement -

DIARIO ta uza Rekenkamer pa haci huiswerk pa Husticia 

  • Proyecto Bo Aruba ta bofon di e tres pilarnan constitucional
  • Democracia ta muri ora Parlamento hunga tres macaco 

ORANJESTAD(AAN)– Na entrada di fin di siman, durante solemnidad di instalacion di Huesnan nobo pa Aruba, e representante di e Orden di Abogadonan a bini dilanti pa cuestiona loke e pilar di Husticia por atende of no atende den nos construccion constitucional.

Algun tesis a bini dilanti como base pa por yega na e pregunta, si Husticia por dicidi si Gobierno ta actua robes.

E presentacion aki a wordo haci na un momento cu tin basta caso sumamente importante den man di Husticia, cu mester dicidi si politiconan a actua segun ley y si nan decisionnan ta na beneficio di pueblo of ta contra pueblo.

Si nos basa nos mes riba “ley popular” di bida diario, nos ta bay directamente na e centro di discusion y nos ta cuminsa splica e Orden di Abogado, cu manera e mester ta na haltura, politiconan no ta riba ley.

Na un empresa priva, un trahado cu e saldo mas abou pero tambe e director como instancia mas halto, por wordo persigui pa husticia si e maluza placa di e empresa of deliberadamente (conociendo tur peliger) e haci gastonan cu ta kibra e empresa.

Na un empresa priva, ta hiba tanto un director responsabel como e partner den un negoshi sushi Hues, cu sin duda lo pone e director personalmente responsabel pa paga e partner den e negoshi sushi.

Gobernacion ta un empresa mara na leynan cu ta proteha doño di e empresa, cu ta pueblo. Gobernacion ta basa riba e Orden di Ley, loke ta exigi pa tur hende cu ta parti di e sistema legal ta tene su mes na Ley.

Raad van Advies ta e instancia cu mester conseha Gobernador como representante di Rey si decisionnan cu e ta firma hunto cu Conseho di Ministro, ta cumpli cu ley. Si esaki no ta e caso, e no mester firma nan.

Na hopi ocasion DIARIO ta mustra cu e prome necesidad di un democracia ta, pa prensa splica pueblo kico na demasiado ocasion ta wordo presenta cu palabra grandi cu cualkier hende no ta comprende.

E presentacion di Orden di Abogado na instalacion di Huesnan nobo, sigur ta exigi awe di e matutino di Aruba, pa puntra Orden di Abogado kende mester defende e interes di pueblo ora cu prueba keda demostra con instancianan politico ta horta pueblo, ta abusa di confiansa di pueblo, ta destrui bienestar di pueblo y ta afecta hasta e prome necesidad di pueblo.

Pueblo ta doño di e negoshi cu Gobierno ta maneha cu control di Parlamento a base di leynan den cual e uzo di fondonan di pueblo mester ta a base di ley.

Parlamento ta directamente e Bos di Pueblo, aunke ley mester bay regla e asunto di independiente cu ta bay cu asiento di un partido y cambia resultado di eleccion.

Parlamento pues ta resultado di eleccion cu Pueblo ta uza pa maneho di e pais.

Pa controla Gobierno tin rapportnan manera e rapport di Bo Aruba di Algemene Rekenkamer Aruba, cu ta vigila si gobierno y parlamento ta tene nan mes na ley.

E rapport di Bo Aruba ta mustra con gobierno anterior a pone pais Aruba na riesgo, a bini cu proyectonan pa cual ni sikiera a busca alternativa y cu e pais no por a paga.

Ta pasobra e pais no por a paga nan, a yega na un acuerdo cu prome cu bin eleccion nobo, cu nan lo a gana cu e proyectonan, ta construi e proyectonan y pa decadanan largo, e pais ta paga pa e proyectonan.

Na cual empresa priva esaki ta posibel? Orden di Abogado mester haci su huiswerk pa splica si den e caso aki no mester sostene Algemene Rekenkamer Aruba cu no solamente a condena gobierno pero tambe e mayoria absoluto den parlamento cu a hunga ciego, sordo, mudo pa gobierno haci y deshaci cu 1.6 Miyon sin plan, sin guia, sin documentacion rekeri.

Kico pueblo mester haci ora politiconan ta regala placa na amigonan politico cu ta wordo nombra den funcionnan cu nunca nan lo a ocupa den empresa priva?

Husticia mester atende Bo Aruba? Mester bini cu leynan pa laga politiconan personalmente paga contractonan cu nan ta cera cu nan compinchinan cu por hunga Sheik cu placa di pueblo?

Nos kier entrega huiswerk na Orden di Abogado. Pueblo no por pidi autoridad persigui y condena politiconan pasobra nan ta gobierno? Esaki ta democracia?

Pa ta sincero, e discurso di Orden di Abogado a laga nos den shock. Sigur na un pais cu a bira victima di kiebra di e orden di ley y abuso di un decada di gobernacion destructivo!

- Advertisement -

DUNA COMENTARIO

Please enter your comment!
Please enter your name here