Home Hudicial Tripulantenan riba Barco Aressa ta procedente di Montenegro

Tripulantenan riba Barco Aressa ta procedente di Montenegro

1269
1
SHARE
— Potret cortesia: Montenegro’s Police Directorate.
- Advertisement -

—Como 5.000 kg di cocaina en total—

ORANJESTAD (AAN): Manera cu DIARIO a pronostica, ta saliendo na cla cu e operacion Dialuna atardi pa anochi riba lama pazuid di Aruba, pa captura un barco carga cu miles di kilo di droga, ta resultado di un investigacion internacional di varios luna caba, haci door di inteligencia hudicial di Hulanda, Inglatera, Serbia, y Montenegro.

Aunke na Aruba ainda ningun relato oficial a wordo duna di e captura y descubrimento di e droga aki, prensa di tin di depende di e.o. Cuerpo Policial di Montenegro (paisnan Balkan na Europa) pa suministra informacion.

Na Aruba a keda keto… pero Police Directorate di Montenegro a revela Diaranzon, cu riba e barco Aressa cu a ser intercepta na Aruba, a wordo haya 5 ton di cocaina (5.000 kg.) y e barco di berdad tabata destina pa Grecia.

Segun Montenegro, e miembronan di tripulacion cu a wordo aresta riba Aressa, nan tur ta di Montenegro.  Pero ta parce cu e droga aki no ta destina pa e area di Europa Oriental, sino pa un waf na West Europa.

Polis di Montenegro a confirma tambe cu e barco nabegando bao bandera di Cameroon, a caba di sali for di Puerto Guaranao (cerca di Punto Fijo na Venezuela) y a wordo intercepta algun ora despues.

Segun e relato di Polis di Montenegro, e captura di droga aki na Aruba ta mustra cu solamente via di trabao conhunto di Polisnan Internacional, por logra resultadonan di calidad pa asina stop c traficacion internacional di droga.

E hecho cu Montenegro y Serbia ta hopi envolvi den e casonan aki di inteligencia, ta bin debi cu apenas Diahuebs siman pasa (20 Februari) a gara un kilo di cocaina cu a drenta North Macedonia, y cu ta forma parti di un operacion internacional.  E droga aki a drenta North Macedonia for di pais di Albania, y tabata den un truck maneha pa un ciudadano di Montenegro.

Polis di Montenegro tambe a suministra un potret di e pakinan di droga abordo di e barco Aressa, y bo ta mira algun di e saconan aki ta imprimi na spaño cu palabranan di “mocolla de trigo”, otro tin “harina de carne y hueso” imprimi riba nan.

A sali na cla cu e principal carga abordo di e barco Aressa ta hero bieu, y aki ta bin e pregunta si acaso e compania cu ta opera e barco aki ta violando e medida di sancion impone door di President Trump di Merca pa cu paisnan aliado no haci negoshi cu Venezuela.

   RUSIA ENVOLVI:

Pues na momento cu e barco Aressa a aparece riba scope di autoridadnan local, mesora nan sa cu esaki ta e momento oportuno pa actua.  Como cu nan ta siguiendo su pasonan for di basta luna caba, segun Polis di Montenegro a bisa.

Esey a pone cu Guardacosta di Caribe Hulandes a acudi cu nan unidadnan, reforza cu Helicopter tambe, pa asina stop e barco y start cu investigacion riba lama pazuid di Aruba.

E portal di noticia di Maritime Bulletin, a mustra den un informe di Diaranson, cu e barco Aressa a wordo construi na 1978, y algun aña pasa e tabata nabega bao bandera Ruso.  E tabata haci negoshi bao di e bandera di Rusia te cu 2017.   Na aña 2019 e registro a ser cambia, y e barco a cuminza nabega atrobe bao bandera di Cameroon.  Pero keto bay ta registra cu e maneho di e barco ta cay bao di Rusonan.

Awor ta keda na autoridadnan internacional pa saca afo, si acaso ta un deal di Venezuela y Rusia a bay malo riba lama grandi aki ora cu e droga a wordo descubri abordo di e barco.

Tambe ta bay check, di con ora cu el a sali for di Paramaribo na comienzo di Februari, e lo a paga su AIS-System (un equipo di tracking reporting) pa asina ningun hende a mira unda e ta.  Te ora cu e tabata cla pa sali di Guaranao, el a cende e machine di AIS-System bek y raporta cu e ta rumbo pa Thessaloniki (Grecia) cual e tabata programa pa yega dia 30 di Maart venidero.

Esey ta un viahe demasiado largo pa dura asina hopi pa yega na Grecia.  Esey ta indicativo cu e lo por tabata planea pa haci un “stop secreto” cerca di un costa na West Europa pa descarga e droga, y despues sigui pa Grecia.

Mientras tanto, e cargamento di 5.000 kilo di cocaina tin balor riba caya na Merca di entre US$200 miyon te cu US$500 miyon.  E droga aworaki ta bao vigilancia arma riba Base Militar di Marinierskazerne na Savaneta.  Te ainda no ta conoci ki nacionalidad e Capitan tin, aunke tin sospecho cu e ta Ruso.

- Advertisement -

1 COMMENT

  1. Hey, guys, nan a cuida pa Corona Virus, durante e aresto? Lesa noticia, tin outbreak di Corona Virus na Macedonia, eybanda, di Montenegro…….mensen!

DUNA COMENTARIO

Please enter your comment!
Please enter your name here