Home Policial Un total di 25 hende deteni den auto despues di Jouvert Morning

Un total di 25 hende deteni den auto despues di Jouvert Morning

335
0
SHARE
- Advertisement -

ORANJESTAD (AAN): Riba e madruga y mainta di Diasabra, despues di e evento di Jouvert Morning Pajamas Parade na San Nicolas, autoridad policial a tene un control riguroso pa check si hendenan ta tribi di core auto mientras nan ta bao influencia di alcohol.

Y e agentenan policial riba brommer a detene 25 persona  despues di Jouvert Morning.

E biaha aki, na puntonan strategico e agentenan aki a eherce controlnan.

Vocero Policial a confirma cu e madruga y mainta aki, un total di 25 persona a worde deteni.

Di esaki, 22 chauffeur a keda deteni debi cu nan tabata maneha auto bao influencia di alcohol, y alaves 2 di nan pa core sin rijbewijs.
Tambe a detene un chauffeur cu ta core cu rijbewijs cu a caduca.

   PERSECUSION:

Tambe na dado momento ora cu Polis a duna ordo na e chauffeur di un Hummer H2 Pickup señal pa para.  Sinembargo e chauffeur a djis primi trot y huy pa agentenan.

Mesora unidadnan di Polis a sali bay su tras, y a cuminza pidi refuerzo di otro unidadnan Policial riba caya.

E momento ey tabatin caya basta druk, y e chauffeur di e Hummer H2 Pickup color preto aki cu number A-46357 no tabata preocupa cu seguridad di demas vehiculo riba caya.

Dado momento el a tuma direccion pa caminda di Kibaima pa Hato.  Ora cu el a drenta den area di Rooi Bosal bayendo pa Macuarima, diripiente a bin topa cu un unidad di Polis di Santa Cruz cu tabata bin di otro area pa yuda.

Aki ta unda cu e chauffeur a dicidi na haci algo, cu sigur lo pone bay keda encarcela pa basta tempo.

El a hala su stuur y intencionalmente a purba na dal duro contra e patruya polisial.  Aki ta unda cu su careda a stop tambe.

Polis a cuminza atende e chauffeur masha fuerte mes riba su comportacion, y aki inespera e chauffeur a purba na manda golpi riba Polisnan.

Aki ta unda e dos agente policial a aplica loke nan a siña di defensa propio, unda cu na un forma corecto y preciso a hisa e homber aki y bente abao, pa asina stop e cu su acto mesora.

Tanto e chauffeur como e ocupante a keda deteni.

Vocero Policial a confirma cu nan a detene e persona aki pa intento di asesinato, maltrato cu un arma, destruccion, y tambe di ta core auto bao influencia di droga y alcohol, y di maneha un vehiculo di tal forma cu e ta trece bida di otronan den peligro (e asina yama “kapstok artikel”), y pa colmo cu e ta core sin rijbewijs.

E acusacionnan aki ta serio, y pa awor e ta encarcela y posiblemente lo pasa resto di temporada di Carnaval encarcela.  El a ser pasa pa oficialnan hudicial di Recherche cu ta sigui cu e investigacion.

- Advertisement -

DUNA COMENTARIO

Please enter your comment!
Please enter your name here