Home Hudicial 1 aña di prison pa duo Venezolano cu a trece cantidad ilegal...

1 aña di prison pa duo Venezolano cu a trece cantidad ilegal Aruba

105
0
SHARE
- Advertisement -

E boto cu Guarda Costa a tira ariba ta keda confisca

ORANJESTAD (AAN): Hues a confirma e exigencia di Fiscal di 1 aña di prison, pa e hombernan Venezolano C.R. y X.M., kendenan riba 1 November 2019 anochi a trece un cantidad di ilegal for di Venezuela, Aruba.

TIRA RIBA BOTO

Tratamento di e caso a tuma lugar luna pasa caminda Hues a mustra cu Guarda Costa a haya informacion cu tin un boto for di Venezuela direccion Baby Beach cu velocidad halto. Pa 11.30 di anochi Guarda Costa a mira e boto sin luz. A sende lus y sirena pero e boto a sigui navega. A los tiro di advertencia pero nan a sigui. E ora ey miembronan di Guarda Costa a tira riba motor di e boto y asina esaki a logra para. Den e boto tabata C.R. y X.M., kendenan ya a baha un cantidad di ilegal na Baby Beach.

BAHA ILEGALNAN NA ARUBA

Durante interogacion C.R. y X.M. a bisa miembronan di Guarda Costa cu nan a caba di baha 10 hende banda di Baby Beach. E ora ey a haya sa cu ta traficacion di hende. Nan a bisa cu a trece hendenan for di Venezuela y tabata bayendo bek. Ora nan a scucha un otro boto banda di nan, nan a kere cu ta boto pirata y no kier a para. Ta ora a scucha tiro a para. X.M. a bisa cu e lo haya 200 dollar. E ta kere cu e hendenan lo a paga entre 200 y 350 dollar pa nan viahe pa Aruba. Un tal Roberto lo a acerca X.M. y C.R. pa haci e navegacion pa Aruba. Segun X.M. el a haci esaki pa placa pa mantene su famia.

Tabata promer biaha cu el a haci esaki. Segun X.M. e tabata dilanti den e boto y C.R. tabata patras ta stuur. Segun X.M. den e boto tabatin 10 salbabida. Hues a remarca cu Guarda Costa a constata cu no tabatin salbabida. X.M. a bisa cu a baha e hendenan den seco cu nan no mester a landa. Cada un tabatin un salda bida bisti. C.R. tambe a bisa cu el a trece e hendenan y cu e lo haya 200 dollar. El a splica cu e hendenan for di Venezuela a haya e salba bida pa bisti.

EXIGENCIA DI FISCAL

Fiscal a bisa cu e ta haya legalmente proba cu e duo a trafica hendenan ilegal. Nan a admiti di a transporta e hendenan y tabata den un boto sin luz. E pregunta ta si a pone bida di e otronan na peliger. Nan ta bisa cu a duna e hendenan salba bida. Na opinion di Fiscal, e forma con nan a splica ta pone cu por kere cu e hendenan tabatin salba bida. Pero si mira e grandura di e boto, ta hopi peligroso pa tin 12 hende abordo. No tin radio, no tin pistol di señal, no tin luz, no tin sistema di navegacion. Tur esaki ta haci cu a pone e hendenan nan bida na peliger. Fiscal a mustra cu den pasado a yega di sosode tragedia caba. El a bisa cu cruza e laman grandi entre Venezuela y Aruba ta sumamente peligroso sin tin tur e aparatonan menciona. Fiscal a sigui bisa cu traficacion di hende ta sosode hopi na Aruba. Door di e situacion na Venezuela, hendenan ta busca manera pa bin Aruba pa haya trabao. Ademas di hende, tin contrabanda di arma y droga. E hendenan ilegal ta bin Aruba y ta traha ilegal y ta keda den e circuito ilegal. Esaki ta causa hopi presion pa Aruba. Fiscal a exigi 12 luna di prison y cu e boto ta keda confisca.

SENTENCIA

Door di e medidanan di prevencion pa cu e Corona Virus, e sentencia no a tuma lugar den Corte di Husticia sino a wordo manda via fax pa e abogado y Fiscal. DIARIO a logra haya e decision di Hues. Hues a bisa cu e ta haya legalmente proba cu C.R. y X.M. a trafica hende y cu e boto no tabatin tur cos abordo manera mester ta. Hues a condena C.R. y X.M. na 12 luna di prison y a duna orden cu e boto ta keda confisca.

- Advertisement -

DUNA COMENTARIO

Please enter your comment!
Please enter your name here