Home Editorial Arubianonan di origen Chines ta parti integral di Aruba

Arubianonan di origen Chines ta parti integral di Aruba

759
0
SHARE
- Advertisement -

Editorial

Awe descendientenan di tanto e poblacion original di Aruba como di nacionnan situa na tur parti di mundo, ta sigui duna prueba di excelencia y grandeza na mundo y ta duna motibo pa Aruba sinti su mes orguyoso.

Un grupo cu ta forma parti integral di Aruba, ta e grupo di descendientenan Chines, cu hopi tempo pasa a crusa oceano Pacifico y a establece nan mes na continente Americano y entre otro Aruba.

Na Januari 2020, e comunidad Chines a pone nos recorda e papel cu entre otro Chinese Club tabata tin como parti di Aruba. Durante e celebracion di e aña nobo Chines, miembronan di e club a entrega nan contribucion na un organisacion hopi importante na Aruba.

E tabata un ocasion pa recorda factornan importante pa e comunidad di Aruba,  caminda e descendiente di China a bira Arubiano y a traha su cas, forma su famia, habri su negoshinan den cual e don natural di empresario ta bini dilanti.

Tabata leu for di nan pais di origen cu e Arubianonan di descendencia Chines, a mira e cambionan structural grandi na nan pais di origen cu a wordo dividi pa ideologia. E descendientenan di China Nacionalista, cu tabata e mayoria na Aruba, mester a realisa cu un dia nan lo mira un pais diferente na e pais cu nan of nan antepasadonan a bandona.

Arubianonan di origen Chines no a laga historia para den nan caminda. Nan a integra completamente den e comunidad di Aruba  y como Arubiano orguyoso a hiba e nomber di Aruba na posicionnan di honor na mundo den tur ramo y sector y na e nivelnan mundial mas halto.

Casi nunca ta tende nan nomber den actonan cu no ta bon segun comunidad di Aruba. Nan ta demostra respet pa tur hende y ta conoci pa nan honestidad.

Aruba ta hubila ora mundo ta aplaudi Arubianonan di descendencia Chines, cu ta permiti nomber di Aruba resona riba plataforma di honor.

Awe na un forma special, hunto cu Aruba nos ta observa e situacion cu a desaroya na China. Nos ta comprende loke e Arubiano di descendencia Chines ta sinti enfrente e sucesonan na China pasobra semper e pais di origen ta keda mara na curason di hende.

Na Aruba, nacionnan di henter mundo a uni y awe como un solo pueblo Arubano, ta observa desaroyonan internacional. E comunidad Chines ta parti di e plegaria di Aruba pa e situacion mundial conoce un solucion, cu te awor hende no tin den su man.

E dolor di tur Arubiano, sin distincion di descendencia of rasa, e bienestar di tur Arubiano y e respet pa tur Arubiano, ta loke DIARIO ta tene na bista pa sirbi e comunidad unico y bendiciona di Aruba, na caminda pa 18 di Maart, nos dia grandi como un solo Pueblo di Aruba.

 

- Advertisement -

DUNA COMENTARIO

Please enter your comment!
Please enter your name here