Home Gobierno Como 25.000 hende por perde trabao na Aruba

Como 25.000 hende por perde trabao na Aruba

2690
0
SHARE
- Advertisement -

Perdida di 64 miyon Florin na salario

ORANJESTAD (AAN): Apenas un luna pasa, Aruba tabata hopi contento cu porfin lo bay tin un Surplus den Presupuesto 2020 di e isla.

Un luna despues, cos a bolter completamente!  Crisis mundial di Coronavirus a azota e isla, y pesey mes, a core haci cambio na e Presupuesto 2020 cu tin di wordo trata den Parlamento, cu un peticion special pa haya luz berde pa por bay busca prestamo cu ta bal como 1.300 miyon Florin.

E ta pa e ‘tempestad’ na caminda, manera Prome Ministro Evelyn Wever Croes a yame.  Y e sa cu e ta algo cu hamas nunca e isla aki a yega di experiencia.

Tanto Premier Wever-Croes y Ministro mr. Xiomara Maduro a presenta den un Sala di Reunion bashi na Parlamento.  E ta bashi debi cu eyden tambe a practica Distanciamento Social.  Cada Parlamentario tabata cera den su oficina ta sigui e reunion via Video Monitors, y ora di haci pregunta ta cana bay den sala uno-pa-uno pa por dirigi discurso.

   UN SHOCK HAMAS BISTO:

Ministro mr. Maduro a splica cu e isla aki a yega di haya algun sacudi den pasado.  Eseynan tabata shock leve!  Aruba na 2001 despues di 9/11 a wanta un shock.  Tambe a haya golpi durante e desaparicion di Natalee Holloway na 2005.  E isla a sufri tambe na 2008 cu e crisis financiero mundial.

Pero awe nos ta dilanti un crisis cu ta hopi mas grandi, y e lo afecta e isla mucho mas compara cu esnan den pasado.  Nunca antes e isla aki a conoce situacion cu Hotelnan ta cerando, Contratistanan a stop di labora, Restaurantnan a manda trahador cas, Casinonan ta full cera.  Diferente negoshi chikito a manda hende cas.  Esnan cu ta traha pa Uitzendbureau’s awor ta sin empleo.  Taxistanan ta sin trabao. Trahadornan na Aeropuerto tambe ta na cas.

   REALIDAD NOBO:

Gobierno tambe tin di adapta na e situacion di e ‘realidad nobo’.  A pone un nota di cambio pa e Presupuesto 2020.

Entrada di pais Aruba lo wordo afecta, unda lo perde 627 miyon Florin.  Esaki ta debi cu e.o. lo perde 80% di tur entrada cu ta haya relaciona cu turismo di e pais.  Na momento cu a lockdown e isla, claramente esaki ta trece cune un sla economico unda cu ta cera e ader principal di economia, y esey ta turismo.  Esaki ta resulta den 80% perdi den entrada for di turismo.

Esaki lo trece cune tambe cu cuponan di trabao relaciona cu turismo ta sufri daño.  Gobierno a haci calculo, y a mustra cu 25.000 hende por perde nan trabao debi na e efecto di e crisis aki.

Esaki ta representa 64 miyon Florin di salario cu nan lo no haya.  Sin conta e “tips” y beneficio secundario cu e trahadornan ey lo ta ricibi.  Esaki ta un golpi duro! Pa colmo no sa cuanto e crisis aki lo dura!  Pero Gobierno a traha un scenario pa e siguiente 9 luna (te fin di December 2020).

   FONDONAN NECESARIO:

E yudanza cu Gobierno kier ofrece, ta pone cu tin di busca fondo pa esey.  A specifica esaki den cifra.  Pais Aruba tin mester di un presupuesto aproba pa asina haya e apioderacion pa subi mercado internacional rapidamente pa percura pa por busca e fondonan necesario, pa e siguiente 3 luna tin e seguridad cu Gobierno por mantene e parti social (SVb, AZV, primanan) wordo paga pa asina tin fondo pa brinda e alivio.

Gobierno ta yuda 683 miyon Florin, y esaki ta disponible pa trece alivio temporal na e tres gruponan aki.

GRUPO 1:  Esaki ta tur esnan cu ta perde trabao debi na crisis economico di Coronavirus, of esnan cu salario ta wordo rebaha a base di loke ta pasando den dje.  Esaki ta encera e fondo F.A.S.E. cu ta bay 214 miyon Florin, y lo yuda tur hende cu un suma mensual di 950 Florin.  Den e fondo di FASE tambe lo yuda tur esnan cu ta self-employed (manera Taxista).

GRUPO 2: Gobierno kier brinda e negoshinan chikito y mediano (menos di 50 empleado), pone disponible 40 miyon total pa yuda nan.  Den esaki ta pone tambe

GRUPO 3:  Pa sistemanan por keda draai pa seguridad social, esta SVb y AZV pa cubri deficitnan premira, kier pone 429 miyon Florin disponible.  A calcula esaki a base di e scenario cu a ricibi, y ta fondo cu Gobierno di Aruba no tin e momentonan aki.  Pesey mester di un apoderacion di Parlamento pa por actua rapido pa haya e fondonan aki riba mercado internacional.

- Advertisement -

DUNA COMENTARIO

Please enter your comment!
Please enter your name here