Home General Coronavirus a dicidi pa entrada y gasto di Aruba

Coronavirus a dicidi pa entrada y gasto di Aruba

96
0
SHARE
- Advertisement -

Despues di un decada di presupuesto diferente na normal

*Supervision Hulandes y lucha pa autonomia a perde liderato

*Un siglo despues di Kabouter, virus ta rementa presupuesto

 ORANJESTAD(AAN)–Cu hende no tin futuro den su man, ta bini dilanti atrobe. Pa comprende e les actual di bida, por biaha den tempo y bolbe na 1918 ora mundo tabata atende cu Prome Guera Mundial.

Hende tabata uza poder humano y hunga poderoso. Diripiente un griep a nace y a conkista mundo mientras militarnan tabata plama tur caminda pa lucha den e guera.

E virus a mata mas hende cu guera mes pasobra no tabata tin remedi ni vacuna. Na 1919 el a yega na su fin y a laga un mensahe pa mundo, cu a lubida cu semper por tin sorpresa.

Na 2009 Aruba a cera conoci cu e fenomeno di un presupuesto diferente na normal. Aruba tabata para na fin di un recesion mundial, cu a pone e isla introduci BBO, cu tabata tin e parti fastioso di acumula.

Na 2009 el a bira campaña politico cu a duna bon resultado y a corta BBO na mita. Entrada di Aruba na BBO a baha na mita, debe a cuminsa subi, gastonan a subi y Hulanda a bati na porta pa “tik op de vingers” y menasa cu e ta tuma medida.

Un tempo confuso a sigui, cu un refineria cu no a haya oportunidad di saca huma pero a disparce den huma.

Nicolas Maduro a subi trono na Venezuela y a destrui e situacion na e pais, loke a haci cu Aruba a keda sin turista Venezolano y mester a busca mas turista Mericano.

Presupuesto ya tabata diferente di normal, pasobra Hulanda a impone medida pa stop di gasta placa cu no tin. Pero…..

Na 2017 presupuesto nobo no a keda cla na ora. Hulanda tabata supervisa y a cuminsa scrap y coregi. E crecemento economico cu refineria mester a trece, a keda pega. Aruba tabata na rand di bankroet cu un debe nacional, cu sigur no tabata cuadra den un presupuesto normal.

Na 2018 pa por a biba cu e situacion cu tabata fuera di normal debi na caida di situacion financiero y economico, a introduci medida y a cuminsa traha riba futuro. Presupuesto di 2019 a subi mesa, pero e presupuesto cu e cambionan grandi mester a bini na 2020.

Hulanda a menasa kico lo pasa si no tuma medida pa presupuesto ta den balansa. Politica a bay halto na Aruba y e hecho cu mester tuma medida pa sigui dilanti, a bira atrobe herment politico.

Mientrastanto 2020 tabata sinta den sala di espera cu un pakete special, cu tabata tin e caracter tipico di e Griep Spaño, Kabouter, un siglo pasa.

Na 2020 no tabata Kabouter, pero COVID-19 cu a cana drenta. Un virus sumamente peligroso pa un mundo sin vacuna y remedi.

Dia 24 di Maart 2020 lo drenta historia como e dia cu un presupuesto diferente na normal a wordo trata den Parlamento.

Pa biba cu coronavirus nobo na 2020, cu lo mester tene cuenta cu turismo lo no ta pilar economico, mester di un suma di entre 1.2 y 1.35 Miljard Florin, cu ta mescos cu e suma di un presupuesto completo pa tene Aruba riba pia.

Aruba lo mester financia 1.65 Miljard.

E coronavirus nobo a crea un escenario historico pa e presupuesto 2020, cu tin un aspecto mas. Ningun hende tin siguridad kico ta bay pasa pasobra presupuesto mundial tambe por rementa.

Si nos analisa Kabouter, cu a dura mas cu un aña, kico nos por spera? Dificil pa bisa exactamente. Un cos ta sigur, cu decada 2009-2019 a wordo corona cu e coronavirus nobo, COVID-19 cu no ta permiti presupuesto normal pasobra mundo a perde control!

 

 

- Advertisement -

DUNA COMENTARIO

Please enter your comment!
Please enter your name here