Home Cultura Di e forma aki Biblioteca ta rindi homenahe na tur autor y...

Di e forma aki Biblioteca ta rindi homenahe na tur autor y compositor

49
0
SHARE
- Advertisement -

ORANJESTAD (AAN): Den cuadro di celebracion 70 aña di trabao di biblioteca na Aruba, Biblioteca Nacional Aruba ta duna homenahe na autor y compositor di poema y cancion.

E ta un proyecto cu lo sigui, pero den e prome fase aki ta trata di poema y letra di cancion di autornan y compositornan cu ya a bay laga nos. A cuminsa cu 11 texto.

Ta trata aki di strofanan di poema di Hubert Booi, Ernesto Rosenstand, Federico Oduber, Nydia Ecury, Mario Dijkhoff, Nena Bennett y Nicolas Piña Lampe. Strofanan di cancion di Padu Lampe, Hildward Croes, Ramon Krozendijk y Bernadina Growell-Kock.

E textonan ta poni riba porta y bentana den e edificio central den George Madurostraat.

Biblioteca Nacional Aruba ta presenta e  poemanan y fragmentonan impactante riba su bentananan pa bishitante por lesa, conoce y disfruta di dje.

A scohe prome strofa di e wals ‘Abo so’ di Juan Chabaya ‘Padu’ Lampe [1920-20119], Ultimo dos strofa di e poema ‘Traha ruman’ di Nicolás A. Piña Lampe [1921-1967], Poema ‘Relashon’ di Eugenia Adelicia ‘Nena’ Bennet [1935-2003], prome strofa di e poema ‘Un sinta den bientu’ di Nydia Ecury [1926-2012], poema ‘Na bo’ di Mario Dijkhoff [195-2015], poema ‘Si mi por…’ di Hubert ‘Lio’ Booi [1919-2014], poema ‘Luego lo tin jotín pa cada ken ku por expresá’ di Federico Booi [1942-2007], strofa for poema den tomo ‘Un anhelo sin fin’ di Ernesto Rosenstand [1931-2016], strofa di ‘Music’ di musico y compositor Hildward Croes [1962-2014], prome dos strofa di cantica ‘Pilar’ di Bernadina Grovell-Kock [1939-2009] y por ultimo strofa di ‘Luna scondi’ di Pedro Ramon ‘Don Ramon’ Krosendijk [1950-2015].

Art & Design a traha riba e lay-out y instalacion. Publicacion di e poemanan a cay net den temporada di Dia internacional di Poesia. Rond mundo bibliotecanan y festival literario ta celebra poesia dia 21 di maart.

Cu e publicacion di e manera aki biblioteca ta spera cu hopi mas bishitante ta ‘topa’ cu expresionnan literario di yiunan di tera. Y kizas ta keda stimula pa lesa e obranan completo. Tur ta forma parti di e coleccion di Biblioteca Nacional Aruba.

Den futuro lo traha riba mas texto di otro autor y compositor pa e otro localidadnan di Biblioteca Nacional Aruba.

- Advertisement -

DUNA COMENTARIO

Please enter your comment!
Please enter your name here