Funeriananan a pone na vigor procedura pa atende cu entiero

    867
    0
    SHARE
    - Advertisement -

    ORANJESTAD (AAN):  Funerarianan rond mundo como tambe na Aruba mester a adapta nan sistema pa atende cu entiero.

    Awendia e situacion rond di Coronavirus a haci cu e actividadnan unda tabata tin aglomeracion di hende awor ta wordo prohibi of limita.

    DIARIO a tuma contacto cu representante di un di e funerarianan na Aruba ken a duna di conoce cu nan a bin cu un procedura pa atende cu e entieronan. No ta un procedura oficial di Gobierno cu a keda publica, pero procedura cu algun di e funerarianan mes a pone na vigor como medida di precaucion y higiena.

    Na e momentonan aki ora cu un hende fayece:

    – E famia tin cu haci un afspraak cu e funeraria.

    – Dos persona so di e famia ta atende cu funeraria pa regla tur cos.

    – Ta regla e traslado di e difunto for di hospital of for di cas te na funeraria pa prepara e curpa.

    – E funeraria ta baha e difunto na cas.

    – No tin acto di condolencia na funeraria.

    – Na cas por tin acto di condolencia pero e famia mester evita aglomeracion di hende.

    – No tin ceremonia di entiero na misa.

    – E funeraria ta baha e restonan na santana.

    – Na santana ta permiti 20 persona maximo.

    – Den caso di cremacion, 5 persona so mag di dispidi.

    – Ta crema e curpa di biaha.

    Esaki ta e caso di mayoria di funeraria na Aruba. Tin un funeraria cu a duna di conoce cu Gobierno a stipula pa solamente 10 persona mag di ta den e ceremonia di entiero, ariba un distancia di 1 meter for di otro.

    E defunto no mag di wordo mishi si acaso el a muri di Coronavirus y si tin mas hende cu kier despedi di e difunto, nan mester regla esaki di tal forma, cu un grupo ta sali pafo prome, despues e otro grupo mag di drenta. 

    CORSOW

    Por a tuma nota cu na Corsow, Gobierno a bin cu un serie di medidanan di precaucion cual ta e siguiente:

    -Te un maximo di 50 famia, amigo(a) y/of conocirnan por bay e entiero di e defunto.

    – Esaki ta conta tanto na e casnan funeraria como na santana.

    – E sala di entiero no por tin mas cu 30 persona pareu sinta paden.

    – E medidanan di distancia social/fisico mester keda aplica durante entiero, kemen tur hende mester mantene un distancia minimo di 2 meter for di otro.

    – Agencianan Funeraria ta palabra cu famianan cu no ta haci publicacion di dia, orario y luga di entiero.

    – Famianan tin cu palabra cu e agencia ken tur ta e maximo 50 hendenan cu por bay e entiero.

    – E entiero mester tin un duracion maximo di un ora y mei (1.5 ora).

    – No ta permiti pa organiza dos (2) entiero pareu na mesun localidad.

    – Famia ta facilita otro opcionnan (digital) pa miembronan di famia, amigo(a) y/of conocirnan manda condolencia.

    – Ta aplica metodonan mas moderno pa e personanan cu no por bay entiero, sigui esaki tog.

    – No ta permiti aglomeracion pafo di e casnan funeraria.

    – Tur Agencia Funeraria mester tin “Hand Sanitizer” pa bishitantenan uza. Ademas, no ta hasi uso di buki di condolencia.

    – Durante di e entiero, no ta permiti musico presente mas.

    – No ta permiti bishita di condolencia na cas, ni tampoco aglomeracion na santana.

    – Cuerpo di Polis ta actua mesora, den caso di aglomeracion.

    Locual si DIARIO a tuma nota di dje ta cu famianan mes cu na e momentonan aki ta den dolor pa e fayecimento di un ser keri ta dunando di conoce pa medio di nan obituario cu nan ta aprecia di ricibi condolencia via WhatsApp of Facebook. Nan no lo ricibi bishita di condolencia na cas.

    Asina e situacion normaliza, lo tene un misa special pa descanso di e alma di e difunto.

    DIARIO ta wardando confirmacion oficial di Gobierno pa wak si a implementa un procedura standard pa tur 4 funeraria existente na Aruba pa loke ta entiero.

    - Advertisement -

    DUNA COMENTARIO

    Please enter your comment!
    Please enter your name here