Home Parlamento Tin tres Parlamentario di Aruba tambe den cuarentena

Tin tres Parlamentario di Aruba tambe den cuarentena

4852
0
SHARE
- Advertisement -

ORANJESTAD (AAN): Diamars mainta a tuma lugar den Parlamento di Aruba, e reunion pa e proyecto di ley pa aproba e presupuestonan di Ministerionan di Gobierno pa 2020, y tambe modifica e ordenanza pa inclui un prestamo di 1.300 miyon Florin (1.300.000.000,= Florin) pa salba Aruba di e crisis di Coronavirus.

E placa aki ta pa reduci e impacto cu e crisis lo benta riba schouder di Gobierno, y cu tin di yuda e isla keda cu su cabez riba awa di awor te cu fin di December 2020.

Algo cu tabata notable ta cu na comienzo di reunion, Presidente di Staten Ady Thijsen a revela cu e reunion no ta uno manera esnan di pasado.  E reunion publico di Staten semper tin di cumpli cu cierto ley y reglamento di ordo.  Pero debi na e Estado di Emergencia aki, Staten a haye obliga di sigui cu e reunion y lagando un banda articulo 26 y 27, a base di articulo 83 di reglamento di ordo.

Esaki ta mustra cu normal mester tin quorum den reunion, esta 11 of mas Parlamentario presente den sala.  Pero e biaha aki no a hacie, a base di e hecho cu kier proteha nan mes segun e reglanan cu DVG mes a duna, relaciona cu Social Distance.

Tur 21 Parlamentarionan a palabra cu lo bay mantene si loke Constitucion ta duna, esta cu bo mester tin e mayoria pa ora cu ta ‘ter vergadering’.  Y Diamars nan tabata ‘ter vergadering’, pasobra e Parlamentarionan cu no ta den Sala, tabata ta den nan oficina na Parlamento.

E Parlamentario cu kier hiba palabra lo drenta sala, haya 20 minuut maximo, y asina uno-pa-uno nan ta drenta e sala y bay bek na su oficina.

President Ady Thijsen a gradici e Parlamentarionan pa e cooperacion cu nan ta duna den e situacion cu Aruba ta, pa asina por tene e reunion toch y trata e Presupuesto 2020 pa Aruba na bienestar di pueblo.

Aki ta unda cu Thijsen a revela, cu toch tin 3 Parlamentario ausente na e reunion, y cu el a wordo informa di antemano cu esey lo ta e caso.

E Parlamentarionan cu a notifica di antemano ta Mike de Meza (AVP), Michael Lampe (AVP), y tambe Mervin Wyatt-Ras (AVP).

Nan a haci esaki, pasobra nan ta tene cuenta cu e reglanan di Departamento di DVG, y como cu e tres Parlamentarionan aki tabata recien den exterior, awor cu nan a regresa Aruba, nan mes a dicidi riba nan mes cu nan ta pone nan mes den cuarentena.  Pues nan no por acudi na e reunion.

Di e forma ey, e tres Parlamentarionan ta proteha nan mes, y ta proteha otronan por si acaso tin algo.

President di Staten no a revela nada encuanto salud di e tres Parlamentarionan, ni si acaso nan ta sinti sintoma.  Hecho ta cu a pone nan mes den cuarentena pa 14 dia, pa asina cumpli cu Aruba y yuda “flatten the curve.”

DIARIO ta agradablemente sorprendi cu e decision aki di e tres Parlamentarionan aki, demostrando cu nan tin salud di pueblo na pecho.  Tabatin algun comentario cu tin mas Parlamentario cu tambe a viaha, pero nan si a dicidi na bay reunion y no a keda na cas den cuarentena.

 

- Advertisement -

DUNA COMENTARIO

Please enter your comment!
Please enter your name here