Diario Online » Deporte

Gobierno ta regala “Patriots” un vakantie cu tur cos paga pa Aruba

alex — Tue, 07 Feb 2012 05:22:27 +0000

ORANJESTAD (AAN): For di diadomingo caba, DIARIO a haya informacion cu e perdedor di Super Bowl lo por a bin pasa un vakantie na Aruba como regalo di consolacion.
Despues cu “The Patriots” a perde nan wega di Super Bowl contra “The Giants”, nan lo ta sintiendo masha malo awo. Pensando riba esey, Aruba Tourism Authority a ofrece nan un vakantie cu tur gasto paga pa nos isla, como un premio di consuelo despues di a perde un wega asina grandi.
“We want to acknowledge and celebrate the hard work, dedication and season-long success of the team, despite their loss,” asina Ronella Tjin Asjoe, CEO di Aruba Tourism Authority a duna di conoce na prensa Mericano. “We believe there is no better place to recover after a loss than Aruba. After all, we are known as ‘One Happy Island’, a bisa.

E ekipo ganador a ricibi como premio un vakantie pa Disney World mientras cu e ekipo perdedo a gana un viahe pa Aruba.

Hurricanes a titula campeon den baseball Infantil A di Liga Menor di ABBA 2011

alex — Thu, 19 Jan 2012 05:02:44 +0000

Hurricanes a titula campeon den baseball Infantil A di Liga Menor di ABBA 2011
ORANJESTAD(AAN)—-E final tan spera entre Hurricanes y Grasshoppers den e categoria di Infantil A di baseball di ABBA a tuma lugar diasabra merdia den un Centro di Bario Noord, yena di fanatico. Un wega tan spera pa motibo, cu e serie final tabata empata na dos y for di anja pasa caba e wega number cinco mester a ser hunga, pero pa motibo di awacero a pospone esaki y a lage pa e anja aki. Centro di Bario Noord tabata tur na color cora y oranje cual ta e colornan di Hurricanes y Grasshoppers. Mester bisa cu e wega a inicia cu e pitchernan di ambos equipo luciendo un poco nervioso, mirando cu ta trata di un wega desicivo y e desordo di publico, cual un hende grandi mes lo spanta di dje ta ki ta un mucha. Den prome inning caminda cu Grasshoppers ta pika dilanti anotando 2 careda, pero Hurricanes ta reacciona mesora anotando 4 careda pa bai ariba, aki e equipo di Grasshoppers a haye ta cambia 2 pitcher rapidamente den e prome entrada, cual tabata algo sigur cu a deblita e equipo den pitcheo. No obstante di e cambio, Grasshoppers a reacciona den nan siguiente inning y ta bai ariba 7 – 4, caminda cu e biaha aki Hurricanes ta haye ta cambia su pitcher habridor. Pero a lo largo e muchanan guia pa Lyle Rombley y su crew di staf tecnico, esta Hurricanes tabata tin e rosea mas largo caminda nan a bini gana Grasshoppers cu e score final di 20 – 12 pa asina bai cu e titulo di Campeon den e categoria di Infantil A di ABBA 2011. Un pabien sigur na ambos equipo cu e deleita e publico den tur e cinco weganan hunga cu un tremendo spectaculo di baseball. For di ABBA Liga Menor nos a haya e Boxscore cu ta como lo siguiente: Grasshoppers 12 careda 3 hit y 0 error, mientras Hurricanes 20 careda 8 hit y 0 error. Miho bateadornan: pa Grasshoppers Antione Tromp 5-2, Miho bateadornan: pa Hurricanes Keshawn Rombley 6 -2 . Di parti Hurricanes Baseball Foundation nos kier a manda un danki na prome lugar Dios Tata poderoso cu a guia e muchanan pa nan victoria. Na tur mayornan cu un manera of otro a sa di juda pa e muchanan por a jega asina leu di bira Campion. Y sin laga afo nos Managers Y Coachnan semper y manera un Team a dirigi nos muchanan pa nan victoria.

Cu e 5.5-K United Walk & Run y record di participante

alex — Fri, 13 Jan 2012 05:00:29 +0000

Team Thrill Walkers ta haci e diferencia:
ORANJESTAD(AAN)—Diadomingo ultimo, e 3rd 5.5-K United Walk & Run 2012’ organisa pa Thrill Walkers S.V. a resulta den un a exito rotundo un biaha mas y esaki ta danki na e tremendo trabou di tur miembro cu a prepara pa e evento grandi aki como tambe tur atleta y deportista cu a sa di yega pa participa. E mas di 350 canado y coredo a haci di e atardi uno grandi, ora cu a cuminsa y caba na ora. For di trempan e atletanan a registra y tabata prepara pa e salida. Esaki a tuma lugar exactamente pa 5:30 pm y tur atleta a cuminsa e trayecto di 5.5K cu a recorre area di Sombre, Cas Ariba, Sero Compa, Cadushi Largo, Coba Lodo y Angochi. Un ruta cu tur participante ta keda disfruta y ta duna bon ‘feed-back’, entre otro cu e ta un tremendo ruta, duro, pero hopi dushi pa habri aña y cuminsa move pa pone e curpa den condicion. Alabes e participantenan ta disfruta di nos naturalesa y aire fresco pero tambe e comportacion ehemplar di automobilistanan den e area aki cu ta duna nos participantenan e respet riba caminda. Algo sigur di aprecia.

Compañeronan di Team a traha riba e ruta pa guia tur participante, duna asistencia na post di awa y tambe yuda cu powerade, awa, patia, bacoba etc. ora participantenan a yega final.
Canado y coredonan a sali na mes momento, pero tabata e coredonan cu a drenta prome, entre nan sigur, coredonan cu ta prepara sigur pa destaca grandemente durante aña 2012. Poco rato despues e canadonan cu tambe ta figura grandi e aña aki tambe ta finalisa. Thrill Walkers S.V. a premia tanto e coredonan como e canadonan cu a yega den e prome tres lugarnan, cu un bunita medaya patrosina pa META CORP.
Coredonan ganador:

E prome coredo masculino cu a cruza linea final tabata e hoben prospecto Jean Andrew Fingal y el a hasi esaki den un tempo di 20:06 minuut y ta hasi’e merecedor di e medaya di oro. Na di dos lugar ta keda otro coredo cu tin ideanan serio den 2012, esta Alrric Kock cu ta marca un tempo di 20:14 minuut y ta ricibi su medaya di plata. Mientras cu na di tres lugar den cabayeros ta keda otro hoben prospecto Joel Dirksz cu ta finalisa den un tempo di 21:40 minuut y e ta ricibi su medaya bunita di brons.

Den damas, e prome pa drenta den e coredonan tabata e hoben Chantal Stephens cu ta core e ruta den 25:25 minuut, cu ta hasi’e ganador di e medaya di oro. Na di dos lugar ta keda e hoben Julienne Dorothal cu ta finalisa cu un tempo di 28:41 minuut y e ta ricibi su medaya di plata, mientras cu na di tres lugar ta keda e hoben Iraida Dorothal cu ta finalisa e careda den 30:10 minuut, pa cual e ta ricibi su medaya di brons.
Canadonan ganador:

E canadonan a disfruta mescos cu e coredonan di e ruta den naturalesa. Den cabayeros e prome pa crusa e linea final tabata Jimmy Leon cu a hasi e trayecto den 33:43 minuut y ta hasi’e merecedor di e medaya di oro. Na di dos lugar, cu e tempo di 34:40 minuut ta keda Fernando de Graaf cu tambe ta ricibi su medaya di plata.

Mientras cu e di tres lugar den cabayeros ta keda pa Nelson Feliciana cu ta termina den 34:48 minuut y na final tambe ta ricibi su medaya di brons.

Den damas, e ganador ta bira e hoben Liza Geerman cu ta cana e trayecto di 5.5K den 39:26 minuut, cu tabata bon y merecedor di e medaya di oro. Na di dos lugar y cu un tempo di 41:47 minuut ta finalisa Carol Larmonie cu ta bira ganador di e medaya di plata, mientras cu na di tres lugar ta keda Chichi Tromp cu ta marca e tempo di 43:11 minuut pa cual e ta ricibi asina su medaya di brons pa e 5.5K United Walk & Run 2012, organisa pa Thrill Walkers S.V.

Doorprizes
Na final di e atardi, no por a falta e ‘door-prizes’cu ta hasi e atardi tambe sumamente atractivo y interesante pa tur participante. Pues a conta un biaha mas cu premionan manera meal vouchers, Cinema tickets, caha di malta y powerade, Basket di productos, Gift Certificates y e premio maximo cu tabata un pasashi pa Corsou cu Tiara Air, nos aerolinea nacional.

Esaki a keda gana pa Clinton Quandt. Tur cu tabata presente a ricibi nan premio y otronan lo keda contacta pa asina nan premio keda entrega. Thrill Walkers S.V. ta gradici inmensamente di curason tur patrosinador cu ta kere den e trabao di e organisacion deportivo cu ta traha pa yuda concientisa y motiva comunidad pa haci algo di movecion y asina mehora nan condicion y salud.

Team Thrill Walkers ta gradici sr. Eric Gomez cu ta yuda cu tur material pa e evento, como tambe cuerpo policial motorisa cu a coordina, controla y guia e trafico pa tur participante por a cana y core trankil.

Aprecio y gratitud pa Emergency Response Brigade cu tambe ta hasi tremendo trabou y tabata presente full e ruta. Na tur compañero di team cu a yuda di un of otro forma pa haci di e ‘3rd 5.5K United Walk & Run 2012’ un exito rotundo cu ta laga tur participante sigui comenta riba con dushi nan a pasa.

Team Thrill Walkers for di awor caba ta haci un invitacion cordial na comunidad pa reserva e fecha di diadomingo dia 1 di juli 2012 mainta trempan. Esaki ta pa nan siguiente actividad, cu ta uno tradicional caba riba calendario, esta e popular “Nature Walk”.

Aña 2012 ta bira otro aña grandi pa cual nos ta invita comunidad pa keda pendiente entre otro pa e fecha di 9 di September 2012 pa otro gran evento di Thrill Walkers S.V. pa comunidad cu ta sigui “Move pa Salud”.

Premio Excelencia den Deporte 2011

alex — Tue, 13 Dec 2011 05:02:37 +0000

ORANJESTAD(AAN)—E Premio Excelencia den Deporte ta un muestra di gratitud, reconocimento, y estimulo cu un pais ta duna na esnan cu a destaca den mundo di deporte. Gobierno di Aruba pa medio di e gremionan di deporte y prensa local den un forma organisa y imparcial ta studia y repasa e curiculo di tur e nominadonan, pa na final scohe e deportista di aña y reconose e figura deportivo aki durante di un anochi espectacular. Mescos cu otro paisan ta reconose nan atletanan, dirigentenan, entrenadoranan y oficialnan pa nan bon trabou, Aruba tambe na final di aña ta tira un bista atras y como pais hopi activo den deporte simplemente no por keda atrás. Gobierno, mediante e ‘Comision Excelencia den Deporte’ cada aña lo duna reconocimento na su mihor deportista, dirigente, entrenador y oficial di wega.
Cu e ayudo di e informacion cu ta wordo suministra door di e federacionnan y e reporteronan deportivo, por yega na honra e personanan cu a sobresali tanto riba tereno local como den competencia deportivo di caracter internacional
“Comision Premio Excelencia den Deporte”

Mirando e importancia di reconoce e deportistanan cu a destaca den nan ramo di deporte of den nan funcion den deporte, Gobierno di Aruba a mira e necesidad pa forma un comision cu representacion di e organonan manera Comite Olimpico Arubano y Aruba Sport Unie.

Tambe Sra. Jacqueline Ponson van Putten, representante di IDEFRE y Sr. Elias Kock, representando Fundacion Lotto pa Deporte tin asiento den e comision, mescos cu representante di Ministerio di Deporte.

Tambe reportero y/of redactor deportivo di prensa, radio y television ta wordo invita pa forma parti di e comision di huzgamento. Reporteronan y redactornan deportivo cu a yega di coopera cu ‘Comision Excelencia den Deporte’ y kendenan lo huzga e nominadonan, pa menciona algun, ta:

Srs. Robby Burleson, Caryll Kelly, Cadochi Kock, Seever Krozendijk, Jenny Loefstok, Claret Lopez, Leo Vrolijk, Allric Kock, Yuri Schwengle, Alvin Werleman, y Andresito Krozendijk.
Regla- y rekisitonan:

Pa bin na remarca pa un di e premionan, e federacion mester tene cuenta cu varios regla.
Siguientemente e reglanan y criteria cu ta conta pa e evento aki.

1. Federacion
1. E federacion cu presenta un nominado mester ta afilia na Aruba Sport Unie of na Comite Olimpico Arubano y mester tin e status di ta den “good standing”.

2. E federacion mester a tene un campeonato nacional y/of competencia durante aña 2011.
3. E nominado mester ta un persona di conducta ehemplar na unda e aspecto di “fair play” ta refleha y consecuentemente ta profila su mes como un role-model pa nos hubentud.

* Bou di e palabra “good standing” ta wordo comprendi cu un federacion ta cumpli cu e rekisitonan pa ta miembro di ASU of miembro di COA. Un federacion cu ta suspendi of sanciona pa incumplimento cu ASU of COA lo no por participa den Premio Excelencia den Deporte.
2. Nominadonan

1. E persona mester ta miembro di un federacion deportivo, reconoci pa ASU of COA.
2. E federacion mester entrega un C.V. di cada nominado.
3. E resultadonan deportivo di e persona mester aparece den un forma oficial, p.e. resultadonan publica door di e federacion y tambe e resultadonan mester ta conforme e reglanan oficial di e deporte. (p.e. den landamento e tempo, den baseball e averahe di bateo etc).

4. E resultadonan mester ta procedente di competencia oficial di e federacion local of di e federacion internacional.
5. Ultimo fecha pa entrega di e formularionan ta 13 di december 2011. E formularionan por wordo entrega na oficina di Sportsubsidie Commissie cerca sra. Jos Maduro of yama tel. 582-5153.

6. Un federacion por nomina e mesun persona di e aña anterior si den opinion di e federacion en cuestion e nominado ta esun cu a destaca e aña aki atrobe.

7. Por nomina e mesun persona den mas cu un categoria si e ta cumpli cu e criterianan vigente.
8. Pa tur nominado ta rekeri 2 portret; un pasfoto y un potret digital, sea durante wega of durante otorgamento di premio of otro (preferiblemente un portret relaciona cu su ramo di deporte).

3. Categorianan
Cada federacion por nomina candidato pa e siguiente categorianan:

1. Deportista infantil/hubenil femenino te cu 13 aña
2. Deportista infantil/hubenil masculino te cu 13 aña
3. Deportista hubenil femenino di 14 te cu 18 aña
4. Deportista hubenil masculino di 14 te cu 18 aña
5. Deportista cu a destaca ampliamente den pasado (y cu no ta activo mas den e ramo di deporte ey.)

6. Honor al merito. (indica door di un federacion of otro organisacion cu un
Atleta (cu no ta cay bou di e categorianan 1,2,3,4 y 7), un organisacion, un dirigente, un entrenador, un arbitro (oficial di wega) un evento deportivo, a destaca den aña 2011, na un manera sobresaliente.)
7. Deportista di aña. (premio maximo)

 Den cada categoria, Comision mester ricibi un minimo di cinco (5) nominado
(= minimal cinco diferente federacion), pa por saca un ganador.
 Comision tin e derecho di rechasa un nominacion si e federacion no ta
subraya na un manera cla y convincente pa ki motibo(nan) su nominado ta e persona cu a destaca den aña 2011.

 Comision tin e derecho di propone un nominado si tin razonnan y
informacion relevante di su prestacion den aña 2011, y cu sin indicacion y motibo cu e federacion no a cumpli cu e rekisitonan manera poni aki den.

Brazil Taekwondo Stichting tin un directiva nobo pa e siguiente rond di aña 2012

alex — Mon, 12 Dec 2011 04:41:37 +0000

ORANJESTAD(AAN)—Diahuebs anochi a tuma lugar e reunion di Brazil Taekwondo Stichting na unda tabata tin ariba
agenda diferente topiconan cu mester a wordo atendi cual un di nan ta forma un directiva
nobo y tambe vota pa un banco. Mirando cu aña 2012 ta dilanti porta Alberto Klabér a habri mas
posicion y tambe uno pa presidente cu a wordo nenga rotundamente. Alberto Klabér a menciona si
cu esaki lo ta su ultimo aña, pasobra mester traha lugar pa un otro haya e oportunidad pa duna
otro e oportunidad tambe pa dirigi e fundacion.
Aki ta na unda cu a protesta pasobra niun hende no kier pa Alberto Klabér baha como presidente. Alberto Klabér si
tin otro retonan su dilanti na unda cu e lo mester bay pa atende cu esakinan. Aischal van der Linde y Edmar
Winterdaal lo keda como atleta, pero semper lo bay tey pa yuda ora di campeonatonan nacional.
E siguiente personanan a bira miembro di Brazil Taekwondo Stichting.

Presidente Alberto Klabér. (Te cu final di 2012).
Vice-presidente Feliciano Lacle.
Tesorero Robert Giel.
2do Tesorero Harold Rasmijn.
Secretaria Maria Geerman.
2do Secretaria Charmaine Maduro-Tromp.
Comisario Jervis Lowe.
Comisario Marni Lont-Duque.
Comisario Josefa Willems.
Comisario Laida Willems.
Comisario Geneitha Carlmicheal.
Comisario Jeritza Arends.
Comisario Kenrick Tromp.

Depues a vota si lo keda cu e banco cu tin awor aki of lo cambia esaki. Esaki a bay 14-1 na fabor di CMB. Nos kier a gradici tur e miembronan nobo di Brazil Taekwondo Stichting y masha pabien.
Awor cu un directiva nobo, por spera hopi mas logronan di Brazil Taekwondo Stichting.

Bubali a gana JTL cu score di 2-0

alex — Fri, 11 Nov 2011 05:24:57 +0000

ORANJESTAD (AAN)—Durante e continuacion di e campeonato di futbol Division Honor, recientemente e equiponan di Juventud Tanki Leendert y SC Bubali a enfrenta otro na Stadion Guillermo Trinidad, partido cu a finalisa cu un otro victoria pa e equipo di Bubali cu score di 2-0.
E hungador Alexander Tejada tabata e hungador cu a destaca durante e encuentro aki door di a anota e dos golnan pa su equipo Bubali. Pa lo cual ta trata e wega nos por bisa cu aunque e team di Bubali ta un equipo cu a demostra e ultimo 3 campeonatonan di ta un di e “Duronan” pa vence, toch e “Bufalonan” di Juventud Tanki Leendert a duna e “Orguyonan di Noord” un tiki dolor di cabez, sin embargo tabata Bubali kende a domina un poco mas ariba tereno.
Cu e victoria aki, Bubali a “cosecha” 3 punto mas na su favor. Bubali ta na e di 4 lugar den e Tabla di Posicion cu un total di 10 punto, unda cu di 6 partido hunga, nan tin 3 victoria, 1 empate y 2 derota, mientras cu e equipo di Juventud Tanki Leendert ta posiciona na e delaster lugar (10), ainda no a logra acumula un punto, nan tin 5 wega hunga, 0 wega gana, 0 wega empata y 5 wega perdi.

Awenochi Bubali lo subi tereno un biaha mas pa enfreta e “Pumanan” di Britannia, e wega aki lo bai tuma lugar 8’or di anochi na Stadion Guillermo Trinidad, mientras cu Juventud Tanki Leendert lo sube tereno te Diadomingo awor pa 7’or di anochi na Compleho Deportivo Frans Figaroa pa enfrenta e blaunan di Angochi, esta Caravel, un partido cu sigur lo bai ta candeloso mirando cu Caravel mester cuminsa acumula victorianan ya cu ta net ariba JTL na e di 9 lugar y un victoria contra JTL lo por nifica pa subi na e di 8 lugar y pone Riverplate baha na di 9 lugar, asina ta cu e partido aki no mag di perde.

Caravel Campeon den Master di Copa Aruba 2011

alex — Wed, 09 Nov 2011 05:02:01 +0000

“Jaragua di Brazil a sali Campeon Super Master”
ORANJESTAD(AAN)— Diahuebs ultimo den Compleho Deportivio Frans Figaroa a termina e campeonato di COPA ARUBA 2011. Pa motibo di viaje di e ekipo di Brazil cu mester a subi avion e mesun atradi e wega final di Master entre Caravel di Aruba y Cooper di Brazil mester a tuma lugar pa 1 or di merdia. E horario no tabata esun mas favorabel pa fanaticonan jega stadion na masa pa apoya Caravel. A pesar di esaki e equipo di Caravel a sa di saca nomber di Aruba, cu of sin fanatico nan a hunga cu cuerpo y alma y bira Campeon ganado Cooper 2-1 y asina bai cu e trofeo bunita di cristal.

Después di e wega di biaha representante di ATA Sra. Amayra Boekhoudt y Sr. Rufo Kelly di AVB a entrega e trofeo na e Campeon Caravel y sub Campeon Cooper. Aparte di e trofeo cada hugador a ricibi un medaya di campeon y sub campeon.

Despues di esaki pa 4.30 di atardi a tuma lugar e wega final di e categoria Super Master entre 2 ekipo di Brazil esta Madruga y Jaragua. Den e categoria aki cu score di 3-0 Jaragua ta bira campeon y asina bai cu e otro trofeo cu a ser entrega na e gandornan pa Sra. Sanju Luidens Daryanani di ATA y sr. Joy Fingal di Fedevetta.

Asina a conclui e torneo di COPA ARUBA 2011 cu tabata un exito rotondo y a logra contribui cu cantidad significante di turista, un total di 650 bishitante di Brazil. Riba tereno deportivo e ekiponan veterano di Aruba a haña e oprtunidad pa participa den e torneo y asina midi nan forza cu ekiponan internacional. Y sin laga afor e aspecto cultural
Na unda cu tabata tin un anochi di integracion cultural caminda tur participante por a goza baila cu musica di Aruba y Brazil.

Pa finaliza organisador Sr. Rogerio Donato Presidente di Cia Travel y Aruba Tourism Authority ta hasi uso di e oportunidad pa gradici tur esnan cu di un of otro manera a contribui pa hasi e evento aki un exito y specialmente pa e bon cooperacion ricibi di AVB, Fedevetta, Fundacion Lotto pa Deporte Compleho Frans Figaroa y Minister di Turismo, Transporte y Labor y Minister di Deporte. Ta spera di ricibi e mesun cooperacion pa e COPA ARUBA 2012 cu otro aña lo tuma lugar di 1-8 di september.

Ambiente na ordo Diadomingo na pista di Karting na Bushiri

alex — Tue, 08 Nov 2011 05:02:04 +0000

ORANJESTAD (AAN)—Diadominhgo manera ya caba Diario a trece pa tur nos lectornan, a tuma luga na pista di Karting na Bushiri, caredanan di Go Kart, tanto di machinenan drecha como tambe esunan cu ta wordo gehuur na publico. Puclico tabata bon y e ambiente tambe a bira uno hopi agradabel.

Pa caba di completa e obra, algun di e autonan y brommer nan cu a competi na e careda di Drag ariba Palo Marga, a dicidi pa bay show na vehiculonan na e sitio ya menciona.

Esaki a crea un ambiente na ordo y mas ainda ora cu ya caba e caredanan di Kartin a caba y cu musica live a cuminsa resona.

Team di Marlins di Aruba a bay hunga na Merca y pasa bon

alex — Thu, 20 Oct 2011 05:00:17 +0000

ORANJESTAD (AAN): E grupo di hobennan aki, a sa di demostra grandemente cu Aruba tin bon futuro den deporte! DIARIO aki ta referi na e team hoben cu apenas tin par di aña di existencia na Aruba, esta di team di Marlins.
E grupo aki di Noord, despues di mas di un aña di preparacion, a haci e viahe pa Florida, y esaki a resulta den un gran exito. Pesey un danki ta bay na tur comerciante cu a pone nan confianza den Stichting Marlins Sport Aruba, cu a haci e soño di nos muchanan pa bay hunga baseball y bishita e parke nan di Walt Disney World y Universal studios.
Manera ta conoci, Marlins a bay cu su team nan y a hunga na Merca tambe. Den 3 categoria a sa di a gana esaki. Marlins ta gradisi tur hende cu a yuda pa nos muchanan por a yega Orlando.

Prome piloto femenino di Aruba cu a core 7 seconde na Aruba y Caribe

alex — Tue, 18 Oct 2011 05:00:05 +0000

Ruzischka “Yuyika” Tromp di Brazilian Flash Racing
ORANJESTAD (AAN)—Manera ya ta conoci, Ruzischka Tromp yama cariñosamente Yuyikia, a pasa na bira e prome driver femenino di Aruba y Caribe cu den su rond ta logra di marca un tempo di 7 seconde ariba un ¼ mile. Yuyika ta yiu muher di Tito Tromp y Mildred Thijzen Tromp. No ta un secreto cu Yayita ta bini di un famia cu tin hopi tempo exitoso den e deporte di Drag Racing y no tabata nada straño cu cualkier rato nos lo a tende di e bon noticia cu Brazilian Flash lo a haya un driver nobo y e sorpresa tabata cu e biaha aki tabata un yiu di Tito mes cu lo ta tras di stuur di un autonan.

Yayita a pasa hopi di su bon ratonan den compania di su famia riba un pista di Drag y ta mas cu logico cu e fiebre a drenta mas lihe cerca su persona.

Prome cu Yuyika a haya e oportunidad pa subi tras di e stuur di e Dragster di e team Brazilian Flash, el a core varios careda di Street Legal sin cu supuestamente su mayornan tabata na altura di dje.

Tabata e ruman muher cu tabata bay cu Yuyika y tabata yude pa core. Despues Tito cu tabata na altura di e caredanan aki, a papia cu Yuyika, kende a bisa Tito cu e kier core Drag. Tito mester a wanta e secreto un rato prome cu a laga esaki bay den aire pa e pa e mama di Yuyika.

Pa esaki Yuyika mester aprobacion di su mayornan cu conoce e deporte aki basta di cerca, pero manera Tito mes a splica, e ta keda un momento cu como mayor bo ta bira hopi nervioso, ya cu ta velocidad halto bo ta deal cune.

E prome dia cu Yuyika a bay test e Dragster, e mama no a ni bay wak. Dia cu Yuyika a bay pa purba su prome pass nan, e ora si e mama a bay wak un di su yiu muhernan sinta den un auto di careda. Cu otro palabra Yuyika aparte di a pasa bon rato rond di tur loke tin di haber cu drag, a logra di practica su reaccion time durante di e caredanan di Street legal. Cierto momento esaki tabata hopi na fabor di Yuyika y mester a concentra ariba e otro tipnan cu su tata y su primo Jhonathan a dune pa e bira un bon driver.

Yuyika ta hopi agradecido na Viviana Arends di Arends Racing, kende tabata e persona cu a permiti pa prome biaha subi un Dragster ya cu Viviana a permiti Yuyika haci algun test cu su Dragster, entre otro Burnout y lounch.

Esaki a yuda cende e candela un poco mas y Yuyika e ora a sinti’e mucho mas confia pa por drive un Dragster di Brazilian Flash. Yuyika a sigui conta cu ora cu nan a bay haci e testnan, tabata despues cu un careda a caba di tuma luga y nan tabata bay e dia siguiente pa test. Tito no a basila ningun rato y mesora cu Yuyika a bisa su tata cu e kier core, mesora e tata a manda busca helm y pak completo pa Yuyika ta coriendo completamente safe.

Dia cu a bay pa purba e pass nan, Yuyika a haya diferente tip valioso for di su tata y di su primo Jhonathan y te hasta cierto momento Tito bon preocupa a pidi Yuyika pa dal un burn out y despues haci un pass di 60 pia so.

Tito su intencion tabata pa Yuyika dal un full pass si ora cu ta asina leu, pero coriendo den 9 seconde. Lamentablemente Jonathan tabata tin un otro plan y a bisa Yuyika si bo ta sinti bo cu bo por handle e auto, primi trot bay ful abou. Esaki ta net loke Yuyika a haci tambe y ta logra di pone su prome pass coriendo 7:98 seconde.

Ya riba di dos pass Yuyika a logra di core 7:92 poniendo asina e record riba su nomber di ta pasa na bira e prome ser femenino di Aruba y Caribe cu ta subi pista y core 7 seconde den prome pass. Yuyika ta hopi agradecido na Todopoderoso pa a dune e oportunidad grandi aki di por conta cu mayornan cu ta conciente di e deporte di Drag Racing, gradecido na su mayornan cu ta apoye tur dia, gradecido na su ruman muher cu tabata esun cu a pushe pa e por cuminsa pusta den street legal.

Gradecido na Viviana Arends kende tabata tey pe y e preste su Dragster pa e por a sinti e prome disfruto di un Dragster, gradecido na su welo y wela cu tambe semper ta poye, gradecido na e team completo di Brazilian Flash cu a haci un di su soñonan bira un realidad.

Riba e pregunta si Yuyika lo ta cla pa subi un otro vehiculo cu ta core e mes un seconde aki, el a remarca mesora cu ainda e no ta cla pa cu esaki, e Dragster manera tur hende sa, ta autonan facil pa maneha mirando nan wheelbase, autonan peligroso ta e Extreme Importnan y ta pesey mes cu no tin ningun hende muher ta coriendo un di e autonan aki.

Riba e pregunta kico e lo conseha e otro mucha muhernan cu tin gana di por core un auto di Drag manera e Dragster, Yuyika a bisa cu e autonan aki ta mucho mas facil pa maneha y cu nan mester busca sigur un team cu ta handle e autonan aki y sin por laga afo un tata manera Tito cu ta un bon sponsor.