ORANJESTAD (AAN) – Apesar cu e circulacion di auto den nos ciudad y cu por mira basta hende tog, den e area comercial, e crisis financiero y economico cu mayoria di nos poblacion a conoce, tin su refleho den e compranan y tambe den trahamento di cierto cumindanan comun den Pasco y Aña Nobo.

DIARIO a haya informacion cu e personanan cu ta traha hayaca y cu a traha mas di loke nan a worde pidi, pa por si acaso tin mas hende cu por a bestel tin hayacanan cla den freezer, no a logra di bende tur.

Tambe por mira den e supermercadonan cu ta bende foyo pa lora hayaca cu a resta cantidad siendo cu den pasado nunca tabata suficiente, pasobra e demanda tabata sumamente grandi, tanto pa esnan cu ta gana un tiki cent extra na December door di traha hayaca como door di esnan cu ta traha pa consumo propio.

Ademas mayoria di supermercado tin basta ham ainda, y aparentemente, algun incluso a baha prijs pero asina mes no tabata tin tanto demanda manera den pasado.

E tipo di alimentonan aki no ta esnan cu precisamente turistanan ta cumpra e temporada aki, pasobra esnan cu ta uza timesharing no ta bin pa haza cos den fornu, pero nan ta busca cumindanan mas practico.

Locual si nan ta bare cune ta yogurt, pan, bolo, buscuchi, chips, refresco, keshi, etc. pero galiña pa yena, calacuna, ham, etc., si no ta e consumidor local cu ta cumpra nan, nan ta keda den friser si e cantidad ta grandi. Fruta manera apple y druif ta producto cu ambos ta cumpra, tanto e consumidor local como e turistanan pero prijs pa nos hendenan a bira demasiado halto, specialmente druif cu ta parce no tin suficiente na stock tampoco.

Con cu bay bin, e consumidor local a cumpra menos e aña aki, segun informacion cu nos por a compila. Falta wak na final di aña con e benta di vuurwerk lo resulta. Tin indicacion cu e prome dia di benta a hay slow. Posiblemente hopi hende no a cobra ainda sino entre mañan cu diabierna, pues ainda ta prematuro pa analiza esaki.

Ta p’esey ELMAR ta sostene e programa “Hunto nos ta Spaar”

ORANJESTAD(AAN)– Ing. Robert Henriquez, director di Elmar NV ta masha contento cu e campaña “Hunto nos ta Spaar’ awor ta un realidad y cu ta cla pa cuminsa demostra con clientenan cu a sigui nan consehonan, a sa di cosecha di e beneficionan di un recibo mucho mas abou. E programa “Hunto Nos Ta Spaar” tin como meta pa demostra e compromiso serio di WEB, Elmar y Utilities Aruba N.V. como bon ciudadanonan corporativo.

Esey kiermen cu como compania nan ta haci algo bek pa nan comunidad.

E tipo di proyecto aki ta pa yuda nos comunidad con nan Ta spaar riba uzo di coriente y awa y mediante testimonio di otro clientenan cu ya a haci cambio den nan uzo na cas.

E consehonan of tipnan aki ta trata mas riba un cambio di comportacion, pues si bo refleha un cambio den bo comportacion, con bo ta anda cu e uzo di awa y coriente, abo tambe por disfruta di un consumo y cuenta mas abou.

“Pues comunidad ta haya un testimonio riba e programa pa siña spaar y a base di tipnan valioso den cambio di comportacion di e ciudadano aki, nos tambe por siña spaar riba energia.

E tipnan cu bo haya, bo mester sa di pone nan den practica, pa abo mes disfruta despues di e producto y uzo”, asina Ing. Robert Henriquez a termina bisando.

ORANJESTAD (AAN): Cu cierto preocupacion Camara di Comercio y Industria ta observando e negociacionnan cu ta tumando lugar entre gobierno y e sindicatonan cu ta representa empleado publico. Como resultado preliminar KvK ta comprende cu gobierno ta mustra comprension pa e deseo di e empleadonan publico di por conta cu ahustacion di nan salario den forma di indexering.   KvK tambe tin comprension pa tanto e punto di bista di e empleado publico como esun di gobierno. No cabe duda cu mescos tur otro hende, empleado publico tambe a sufri consecuencia di e situacion economico mundial cu a afecta Aruba durante e ultimo añanan. E aña aki posiblemente ta trece un recuperacion economico, pero esaki no ta fuerte y no ta general, y ta producto di reapertura di Valero y varios inversion cu gobierno mes a haci den proyecto. Tambe por mira cu cierto optimismo e resultadonan preliminar di nos turismo, segun e cifranan oficial publica te awor.

   Sin embargo, esaki no a hiba nos ainda na e nivel mas halto di produccion di 2008, promer cu e crisis a cuminza.

   Desde hopi aña gobierno ta sufriendo un nivel di deficit financiero preocupante y continuo, locual a hiba nos na un debe publico di alrededor di 2500 miyon Florin, loke ta representa mas di 50% di nos Producto Interno Bruto (GDP) caba. Mirando e situacion financiero di gobierno cu lo no logra ainda pa yega na un presupuesto balanza den e proximo par di aña, e pregunta mester surgi kico ta e

posibilidadnan pa duna un mihor recompensa na e empleado publico.

   Si nos bay analiza e presupuesto di gobierno, nos por ripara cu e gastonan di personal ta e factor mas grandi y mas problematico entre e rubronan principal. Na aña 2010 gobierno a paga un suma total di salario (di empleado publico y di institucion subsidia) y prima di pension di Afl. 602 miyon, segun cifranan publica pa Banco Central. Na mesun momento, entrada regular di impuesto pa 2010 tabata alrededor di Afl 860 miyon, excluyendo e Afl 211 miyon di entrada di BBO extra procedente di Valero. Si mester conta acerca e Afl 221 miyon di gasto di “bienes y servicio”, nos por mira cu e gastonan general di e aparato gubernamental a consumi Afl 823 miyon, loke ta representa mas di 95% di entrada di impuesto regular. Mester tuma na cuenta tambe cu den e añanan venidero no ta premira mas entrada incidental halto manera a sucede na 2010.

   Pa 2011 e gastonan di empleado publico a sigui crece, entre otro pa motibo cu gobierno a reconoce e Afl. 105,- pa luna pa cada empleado, cu tabata fruto di e lucha sindical algun aña atras. Tambe mester tene cuenta cu e acuerdonan den Dialogo Social, principalmente e cambio di edad di pension pa 60 aña, cu tin su efecto positivo pa fondo di pension, pero ta trece cune cu e “natuurlijk verloop” cu ta un di e medionan principal di reduci gasto sin recuri na retira personal forzosamente, tampoco no ta mas na e mesun nivel. E empleadonan di mas experiencia y mas salario ta keda mas tempo den e aparato, loke ta preveni baha gasto. Di otro banda esaki ta haci cu nan experiencia ta keda mas largo den e aparato, cual ta bon pa operacion di gobernacion.

   E buskeda di un solucion duradero pa indexering den forma di un protocol of hasta un ley di banda di e empleado publico ta comprendibel. Sin embargo mester tene cuenta cu e hecho cu solucion duradero no por tuma lugar si no tin solucion duradero pa e problema di exceso di personal cu ta hiba nos na un presupuesto gubernamental insostenible aña tras aña.

   Ta di spera cu den e dianan nos dilanti gobierno y representantenan di empleado publico sigui delibera riba e tema aki, pero tumando na cuenta tambe interes general di tur trahador, tambe esnan di sector priva cu mester aporta via impuesto pa cualkier solucion cu surgi. Mirando e panorama mundial economico, cu na e momento aki por trece sea un crecimento economico modera, o un catastrofe global si e problemanan di e situacion financiero/monetario na Europa no haya solucion.

   Esaki por afecta tambe stabilidad di Merca, loke na su turno por afecta nos economia gravemente. Sano huicio ta importante pa tuma tur e factornan aki na cuenta, sigur si nos no kier hipoteca futuro di nos yiunan.

Un punto cu ta importante pa menciona ta cu hendenan desemplea(personanan cu no tin trabao Y ta buscando trabao segun defincion di ILO)  cu ta registra na 2007 tabata di 859 persona, na 2008 el a subi te na 1345 persona, na 2009 a sigui subi te na 1825 hende registra na DAO. Danki na e maneho hiba a reduci esaki na 2010 cu casi 22%, bahando esaki ta 1584 y meta ta pa por sigui baha esaki y di e forma ey por tin un mercado laboral caminda mayoria di nos hendenan ta forma parti di dje.

Den e rapport aki ta papia tambe riba e cantidad di peticionnan pa retira hendenan for di trabao. Na 2007 esaki tabata 121, na 2008 el a subi na 312, y na 2009 cu tabata e ultimo aña di Gobierno anterior, esaki a subi te na 805 persona y na 2010 danki na e maneho hiba el a baha na 649 hende, cu ta un reduccion di casi 22%. Maneho di Minister Oduber ta pa logra cu esaki sigui baha .

Continuando e mandatario a duna di conoce cu na 2010 Departamento di Labor a registra den edad di 16 pa 30 aña casi 600 persona desemplea. Splicando riba e cifra aki, el a bisa cu no tur ta trata di personanan cu a caba nan estudio, cu gran mayoria di nan ta hobennan cu ta worde considera ‘dropouts’.

Esaki ta un di e motibonan pa cual a scohe pa saca Arbeidsvoorziening for di DAO y dune un bachi completamente nobo pa asina por pone procesonan mas eficiente cu ta posibel pa yuda mas tanto hende posibel subi mercado laboral.

Na e momentonan aki DAO ta realizando e proyecto di herintegratie y dentro di poco lo inicia cu e proyecto di herintegratie pa mamanan soltero cu ta registra como buscando trabao y asina por yudanan subi mercado laboral.

Contrario na antes, Gobierno actual a duna atencion special na investigacionnan relaciona cu nso mercado laboral y mehoracion di sistemanan di informacion na DAO. E aña aki a percura pa DAO tin un plan di investigacion, algo cu no tabatin den e ultimo 7 añanan, mas dirigi cu proyectonan y investigacionnan cu por duna un mihor bista di e mercado laboral.

Minister Oduber a duna di conoce cu ta dificil pa un Minister di Labor por pone un maneho pa dilanti si no tin cifranan pa basa su maneho riba dje. E aña aki lo bay tin un total di 15 rapport adicional, incluyendo investigacion riba ‘cheap labor’, encuesta riba forza laboral cu pa hopi aña no a worde haci, entre otro.

Pa por logra podera nos consumidornan Arubano Minister Hooyboer-Winklaar lo establece leynan specifico pa proteccion di nos consumidornan. E leynan aki mester ta basa riba e 8 derechonan di consumidornan estableci door di Nacionnan Uni na aña 1985.

Tambe Minister su enfoke ta pa bin cu programanan pa educa y informa e consumidor Arubano di nan derechonan. Minister Michelle Hooyboer-Winklaar ta felicita tur consumidornan riba dia di consumidor.

Andin Bikker,

Condicionan general
Si un compania (manera Elmar of WEB) usa condicionan general ora cu bo cera un contract di servicio cu nan (“aansluitvoorwaarden’), como consumidor bo tin e derecho pa laga Corte valida (“toets”) e articulonan di esaki na asina yama “zwarte en grijze lijst” (art. 6:236 y art. 6:237 Codigo Civil). Un acuerdo por wordo declara nulo si un of mas condicion general ta desproprocionalmente injusto (“onredelijk bezwarend”) pa e consumidor.

Un condicion lo wordo considera desproporcionalmente injusto si por ehempel e ta stipula cu e contra partido cu ta use tin mag di hisa su prijs unilateralmente dentro di tres luna despues di cera e contract.

“Consumentenkoop”
Ora ta trata di un acuerdo cu un consumidor ley ta stipula cu no por desvia na desventaha di e consumidor di cierto provicionan stipula den Buki 7 di Codigo Civil. Un di e stipulacionan ta cu un producto mester cumpli cu loke e consumidor por spera di dje: un cumprado por ehempel di un auto nobo mag di spera cu e ta funciona como medio di transporte y cu e ta haya e auto cu ela cumpra y no cu ora e bay buske ta dune un otro tipo di auto, art. 7:17 Codigo Civil.

Casonan di prueba
Den varios pais organisacionan di consumidor (“consumentenbond”) ta recauda fondo of hasta ta haya subsidio for di Gobierno pa por hasi casonan di prueba (“test case”) pa vigila e interes di consumidor. Na Hulanda varios caso di prueba a hiba cu por ehempel interes riba cierto cobransa a wordo limita na un tarifa mas husto pa e consumidor of cu a pone cu empresanan cu ta suministra coriente stop di demanda deposito for di consumidornan.

Ley pa baha prijs di awa y coriente
Na Parlamento di Aruba tin un concepto di ley cu a wordo introduci dor di fraccion di Democracia Real pa protehe e consumidor: e ley cu ta trata bahamento di prijs di awa y coriente. E ley ta propone solucionan concreto pa yega na rebaho di e gastonan mensual di awa y coriente: 1. Elmar y WEB mester introduci meternan prepago pa e consumidor mes por dicidi cuanto e ta gasta pa luna (y no cu manera ta e caso awo despues di 2 luna ta haya sorpresa cu a surpasa loke por paga). E meternan prepago lo elimina e necesidad pa deposito y cu mester paga mas deposito cada luna. 2. E deposito pa post paid lo wordo limita na 50 florin pa consumidor, dus no ta subi cada luna. 3. Cada aparato electronico nobo mester un sticker cu ta informa e consumidor cuanto coriente e ta usa, pa e consumidor tin e libertad di kies e aparato cu ta usa menos coriente.

“ E Estado Nacional ta bibo. Kizas e no ta biba optimalmente, pero e ta keda e mehor alternativa. E buscamento di gobernacion global ta algo absurdo. Ta improbable cu e gobiernonan nacional ta accede na un control significativo, na institucionnan trans-nacional y e reglanan armonizador no ta beneficia sociedadnan unda tin necesidad y preferencianan diverso.

Union Europeo por ta e unico excepcion den e axioma aki, aunke su crisis actual por demostra cu no ta asina.

Cu hopi frecuencia nos ta derocha e cooperacion internacional den metanan demasiado ambicioso, produciendo resultadonan debil manera e denominador comun mas abao cu nos por nota, dentro di e Estadonan principal.

Na momento cu e cooperacion internacional tin exito e ta genera reglanan cu, of nan ta ineficaz of nan ta refleha e preferencianan di e Estadonan mas poderoso so.

E reglanan di Basilea (empresa) riba e rekerimentonan di capital y esnan di e Organizacion Mundial di Comercio riba subsidio, propiedad intelectual y medidanan di inversion, ta tipifica e tipo di extra-limitacion aki. Nos por mehora e eficiencia y legitimidad di e globalizacion respaldando y no strobando, e procedimentonan democratico den nos mes cas” (Economista Dani Rodrik).

   E compania aki a haci un sondeo pa check con e demanda ta den sector laboral, y a constata cu hopi compania awendia no ta tuma empleadonan den servicio pa tempo indefini, sino mas bien ta bay via servicio intermediario.

   Pesey considerando cu ya tin varios compania similar na Aruba, L&C a dicidi di check kico tur falta den e ramo aki, y bini cu un diferencia. Detayenan di e diferencia lo worde informa na e momento cu bishita cada un compania personalmente.

   L&C lo brinda servicio di Cleaners, Waiters, Bartenders y mucho mas. Tambe si bo tin un fiesta priva, nos por brindabo e servicio di Cleaners, Waiters y Bartenders. Lo bay tin dianan specifiko cu L&C lo conduci entrevista, y lo anuncia esakinan den nos corantnan local.

 Con pa aplica, masha facil. Ariba e dia di entrevista bini cu bo CV actualisa, 1 pasfoto, AZV valido, identifikashon valido. Y pa esnan cu tin permiso, e permiso valido. Gerencia di L & C ta conciente cu tin hopi hende eyfo capacita pa traha y no por haya trabao pa un of otro motibo. Bay aplica y te na unda cu trabao ta permiti, L & C lo yudabo bolbe integra den ramo laboral y cu exito.

E propietario di L & C un femenino local cu determinashon, cu 15 aña di experiencia como Gerente di Recursonan Humano, doño di Franxo’s All Inclusive cu 5 aña di existencia, Señora Karina Odor Croes, ta conta cu boso sosten y apoyo pa asina duna L & C e oportunidad pa contribui cu e mercado laboral y yuda hiba esaki na e siguiente nivel.

ORANJESTAD(AAN)– Den e dianan nos dilanti, prome cu tratamento di presupuesto 2010 lo bin cu un serie di articulo relevante pa duna un splicacion compacto y comprendibel di kico tur e presupuesto aki ta encera. Presupuesto 2010 ta duna indicacion cu gastonan di gobierno mester baha y cu lo mester austerisa riba tur nivel.

Asina ta corta den gastonan di personal mescos tambe riba gastonan operacional di e aparato gubernamental. Tur esaki pa motibo cu e gobierno anterior a laga nos cu debenan astronomico dor di un teribel mal maneho. Esaki ta wordo demonstra cu cifranan palpabel. A gasta placa cu no tabatin, a crea presupuestonan ficticio y awe e situacion financiero precario ta presenta su mes.

 Pa por trece e deficit bek riba un nivel aceptabel – loke ta tambe intencion di e actual gobierno – mester austerisa den un forma vigoroso y consistente.

Un punto importante den e presupuesto 2010 ta e maneho financiero economico. Di esaki hopi ta depende. Pa por yega na finanza duradero di gobierno, un base economico sano ta di vital importancia. Esaki ta duna comunidad e oportunidad pa por genera bastante placa y via belasting hinka un parti di dje den tarea di gobierno cu ta di interes general.

Banda di esaki un balansa structura di e presupuesto ta importante pa di e forma aki e debe di gobierno por keda controlabel. Un crecemento economico stabil ta un condicion evidente pa por yega na finansa publico duradero.

E crecemento economico mester pas si dentro di e capacidad di un economia chikito y habri manera esun di Aruba. Tambe mester tene cuenta cu e efectonan cu ainda lo presenta nan mes di e crisis economico.

Con percura pa tin un finansa publico duradero

Pa por logra e meta principal aki, esta percura pa tin un finansa publico duradero mester crea un situacion na unda tin un balansa structura di e presupuesto y unda tur riesgo ta bastante cubri. Esaki ta nifica cu e deficit financiero en principio mag di move cu e oferta y demanda, pero cu a largo plaso e deficitnan aki mester wordo compensa dor di surplusnan pa di e forma aki crea un balansa den e presupuesto.

Na e momentonan aki e meta aki ta uno masha ambicioso si tene cuenta cu e actual situacion financiero economico den cua e economia mundial ta hayando su mes aden. Asina mes e gobierno aki ta trata pa por realisa e intencion aki.

ORANJESTAD*(AAN)–Den su esfuerso pa hisa e nivel di hasi negoshi na Aruba, ATIA ta invita tur su miembronan pa asisti pa un atardi di informacion encuanto “Management Summer Program 2010 – Back to Business in a New Economy” .Esaki ta diaranzon diaranzon 12 di mei pa 5 or di atardi Na ATIA na Pedro Gallegostraat 6, Dakota

E programa lo wordo facilita pa YMCA Educational Center den colaboracion cu “Management School for Tourism Studies” di Universidad di Aruba y ta consisti di siete moludes cu ta enfoca ariba diferente aspecto di comercio y maneho.

E areanan cu ta inclui ta stategia, liderazgo, finansa, mercadeo, recursonan humano y comunicacion.

Por registra pa e atardi di informacion via e-mail      atiaaruba @ setarnet. aw of por jama na 582 7593. Participacion na e atardi di informacion ta gratis.