Archivo di e Categoria ‘Editorial’

EDITORIAL: E Socialismo di Siglo bintiun

Publication: Tuesday, 29 December 2015. Categoria: Editorial

jossy_mansur_pic                Esaki ta un concepto o idea cu Hugo Chaves a lanza pa gana e adhesion di su seguidornan, primintiendo nan un estado utopico pa e siglo cu  ta bin, y cu durante cual tur miembro di ‘sociedad’ lo ta riba un nivel  igual di prosperidad. Como homber inteligente e tabata sa masha bon cu e idea tabata solamente un idea, cu e no lo por a realiza ni sikiera a medias, pasobra e mester tabata consciente cu su peor enemigo y mayor contrincante pa e logro ey ta e naturaleza humano mes.

                Den su forma mas simple, socialismo  ta un concepto filosofico cu ta pretende cu tur e medionan di produccion, y tur e produccion di un pais ta pertenece na su sociedad, o sea  na a e totalidad di su habitantenan, sea cual fuera nan capacidad productor o nan contribucion na e logro di dje. E ta un  eror di pensamento grave, pasobra te ainda no a existi y no por existi tampoco un sociedad, o conhunto di hende, cu tin un capacidad igual di produccion o di inteligencia entre tur su miembronan. Naturaleza no a crea y no por crea tampoco un paridad semehante entre sernan humano di diverso origen, raza, religion, preparacion y intelecto.

Editorial : UN BON TRABAO!

Publication: Monday, 14 December 2015. Categoria: Editorial

jossy_mansur_picKen cu mira rond cu atencion no por scapa di e impresion cu di berdad nos ta bibando den un mundo cu a bira loco. E foconan di peligro a multiplica y a bira mas intenso. Nos ta mirando un movimento masal di refugiadonan batiendo na e portanan di diferente pais industrial en busca di un stabilidad cu por ofrece nan seguridad pa nan mes y nan famianan, y cu no ta existi na nan mesun paisnan. E no ta un situacion facil, y no por ofrece tampoco un solucion real y duradero pa problemanan asina grandi.

            Diferente pais Europeo a caba di pasa den un trauma similar di imigracionnan exagera y no tin e deseo di biba un repeticion. Hopi di nan ta man na cabez y no sa con libra nan mes di nan erornan di pasado corda asumi algun nobo. E crisis financiero cu a dal hopi economia benta abao ainda no a caba y diferente pais ta sigui lucha cune. Na Aruba, danki na e vision di Mike Eman y su ekipo di gobernantenan, nos a supera e crisis cu algun daño, pero ningun di nan severo. E tabata e momento pa escoge entre austeridad y inversion, o sea pone den servicio di comunidad loke tin di reserva o tene na dje y confia cu cosnan lo resolve nan mes riba nan mesun forzanan. Mike a opta contra austeridad na e momentonan ey, loke a produci un resultado positivo pa Aruba.

EDITORIAL SISTEMA DI PARKEO: UN IDEA MALISIMO

Publication: Saturday, 14 November 2015. Categoria: Editorial

jossy_mansur_pic     Mi no sa ken a bin cu e idea absurdo di un sistema di parkeo asina complica. Poco hende ta compronde cabalmente con e ta traha y kendenan e ta faborece. Te awor a nota varios caso di ‘friends and family’, sistema cu DIARIO y AVP a critica severamente den pasado. Pero parce cu e sistema di faborecimento ey a haya bida atrobe y e ta hopi visible den e sistema di stacionamento cu a word implementa cu hopi fanfaria.

     Pa mi, mientras mas simple un sistema ta, mas acogida e tin den Pueblo, pasobra e ta compronde y e por bay di acuerdo cune. Pero e sistema di parkeo si a bruha hopi hende, pasobra tin un mashin cu mester usa, tin yen di bicicleta cu ta core rond pa controla, y faboritismo den e hoki nan pa para auto ta obvio na varios lugar. Diferente caso di faboritismo a ser reporta caba y nos ta na apenas e principio.

Editorial: 35 AÑA DIARIO

Publication: Tuesday, 3 November 2015. Categoria: Editorial

Un pueblo, un lucha, un DIARIO

jossy_mansur_picDia 3 di November 1980 un corant netamente Arubiano a nace. El a haya e nomber DIARIO y te awe e ta den bo mannan pa bo huzga su calidad, su contenido y su mensahe. DIARIO ta un culminacion di un proyecto cu a surgi pa cumpli cu e anhelo di e pueblo Arubiano pa mira un corant na Papiamento imprimi ariba su propio isla.

E tempo ey e staff di redaccion di Agencia Arubano di Noticia tabata consisti di Sr. Jossy Mansur, Sr. Angel Kirchner, Sr. Juby Naar, Sr. Django Simoons, Sr. Richard Tromp, Sr. Harry Croes, Sr. Pedro Maduro , Sr. Toko Winklaar y Sr. Robby Burleson. Cu tempo e staf di personal a crece y awe ta consisti di un team completo caminda cada uno tin nan responsabilidad pa na final trece e producto DIARIO pa pueblo.

EDITORIAL: HULANDA DEBE ARUBA UN GRAN EXCUSA

Publication: Monday, 21 September 2015. Categoria: Editorial

jossy_mansur_pic            CAD a dicta su sentencia na final di su estudio y raport, bisando Hulanda cu e KB cu el a dicta contra Aruba ta anticonstitucional, y te  awe nos no a tende ningun reaccion di Hulanda, pa confirma o rechaza e hayazgo di CAD despues di su estudionan. Pesey nos ta asumi cu CAD tin  razon y Hulanda a dicta un KB cu ta hasta contra e preceptonan di Constitucion.  E ta algo grave pasobra e KB ta keda colga riba cabez di Aruba manera un spada di Damocles. Ta mas cu husto exigi di Hulanda un excusa publico pa clarifica e asunto y kita for di Aruba un KB anticonstitucional.

            Hulanda mester pone su miho expertonan studia e conclusion di CAD pa confirma nan hayazgo o rechaze cu argumentonan legal valido den cualke Corte di Husticia. Di kico e bal pa nan sostene un KB cu no tin pia pa para ariba? Hulanda ta un pais serio y respeta y ta su obligacion di mantene e calificativonan ey intacto.

EDITORIAL: Duda y incertidumbre

Publication: Wednesday, 2 September 2015. Categoria: Editorial

jossy_mansur_pic   Tur e acontecimentonan ultimo a crea un lagun di duda acompaña pa un incertidumbre grandi.  Gobierno no tabata capaz di clarifica nada.  Asina ta cada ken pa su cuenta mester a purba saca afo di tur e cosnan contradictorio kico ta kico.  Ultimamente nos ta notando cu Gobierno ta nengando di paga su debenan.  Pero si ta core tras di comercio manera loco pa cobra e debe cu tin cu Gobierno.  E ta un situacion completamente fuera di balans y hasta inhusto.

   Ora bo debe placa ta bo deber di paga, mescos cu ora nan debebo, ta bo deber di cobra.  Pero bo no por cobra sin paga loke bo mes debe.  Y Gobierno debe hopi placa na hopi miembro di comercio y na hopi otro individuo y e ta bula pipa pa nan.

   Na DIARIO mes nos ta cana un calvario pa purba cobra Gobierno loke e debe corant aki pa aviso-, anuncio-, y declaracionnan di prensa cu nan ta pone paga.  No a resulta cu tin manera pa obliga e hendenan ey pa asumi nan responsabilidad pa cumpli cune.

Editorial: Kico Aruba a para bira?

Publication: Tuesday, 11 August 2015. Categoria: Editorial

jossy_mansur_pic            Parce cu e arubiano no realmente no bal su  nacionalidad mas riba su propio isla. Tin cosnan cu ta pasando cu ta lagabo babuca, no pa motibo di nan falta di splicacion sino pasobra nan ta imposible pa compronde. Tin un berdadero invasion di stranhero actualmente, sin cu tin un hustificacion  real pe. No tin ningun problema pa nos asimila nos parti, pero nos no por absorbe e partinan di otro paisnan hopi mas grandi y economicamente solido cu nos. Nos ta consciente di e problemanan severo di cierto paisnan rond di nos, pero e bista pa nan solucionnan no por ta dirigi riba nos. Cumpli cu nos  parti? Si! Soluciona esun di otronan? No.

            Nos ta un isla hopi chikito, cu un Mercado y economia limita, sin cu nos tin e capacidad pa hacie mas amplio cu loke nos tin disponible. Pesey mester maneha e asunto di stranheronan cu ta invadiendo nos cu hopi criterio, enfoca riba e futuro di nos propio hendenan; nan capacidad pa adkiri un cas, pa logra  un bon trabao, pa conta cu un futuro stabil. Mi no ta mirando nada move den e direccion ey, sigur no di parti di e autoridadnan. Nan ta parce mas preocupa pa atrae inversionnan cu crea cuponan di trabao den cantidadnan suficiente  pa satisface e demandanan local. Nan a parce di a lubida na caminda cu e arubiano ta bin prome, y cu esaki ta su isla.

Editorial: DIRECCION

Publication: Monday, 27 July 2015. Categoria: Editorial

jossy_mansur_pic         Aruba awor ta den dos diferente direccion, uno directamente padilanti y e otro no mes directo di loke hende por pensa. E razon ta simpel y basa riba e falta di fondonan pa financia e proyectonan cu tin mester di un gran cantidad di capital pa completa.

        Ningun hende a splica te awor ta di unda e monto grandi ey di capital mester bin, pa cubri tur e gastonan envolvi. E razon ta simple y ta basa riba e falta di fondondan pa cubri e capital inmenso cu tin mester pa ehecuta nan. Ningun hende a splica te awor ta di unda e placa mester  bin y ni tampoco con ta bay pague back. Problemente e ta bay pasa forma parti di e gastonan adicional  imponi riba un Pueblo cansa di tanto gasto cu ta baha riba su lomba sin spera. Cada aumento ta trece cune gastonan adicional cu e no por maneha pasobra su entradanan a limita y e no por rek nan mas di loke nan ta caba.

Editorial: CONTROLANDO E INVASION DI STRANHERONAN

Publication: Friday, 10 April 2015. Categoria: Editorial

Na Aruba nos ta mirando un berdadero invasion di stranheronan, especialmente for di Venezuela, loke no ta straña nos en absoluto considerando e situacion deplorable den cual e pais a para cay. No ta un cuestion di critica e Gobierno di tal pais, y menos ainda e hendenan cu ta biniendo na gran cantidad nos isla, sino simplemente un observacion pragmatico di loke ta pasando. Cera wowo pa no mira e realidad, djis pa keda bon cu tur hende tampoco ta bon, pasobra cualke asunto robez cu ta andando lo sigui den e rumbo ey a menos cu pone enfasis riba dje y trata di busca e coreccionnan cu ta bin al caso, via esnan competente pa hacie.

Venezuela ta un pais cu mi ta stima hopi, un pais cu a dunami un tremendo acogida dia mi a bay biba aya, te cu mi a keda mas di 10 aña y a traha den e industria di petroleo, tanto den esun exploratorio como esun di refinacion. Mi a traha den e refineria di El Palito un aña prome cu el a cuminza refina oficialmente, y tabata ocupa e puesto di Supervisor di Seguridad Industrial. Mi  a traha varios aña na Barinas, djey Anaco y finalmente Puerto Cabello.  Na cada lugar cu mi tabata mi a core rond pa conoce e areanan bon, y mi a keda cu e miho impresion posible di e pais y di su Pueblo. E sentimento cu el a inspira den mi a perdura te awe, pesey mi ta sintimi cu e derecho di por haci comentario al respecto. Mi ta ripiti: mi ta stima Venezuela y ta sinti un decepcion grandi pa loke ta pasando aya cu ta causando un emigracion asina grandi. Tanto Miami como e islanan den Caribe, Incluyendo Panama na Centro America, ta testigo di un exodo casi masal di venezolanonan cu kier busca un miho porvenir pa nan mes y nan famianan.

Editorial: TA BAY SIGUI TOLERA UN HUSTICIA SELECTIVO?

Publication: Tuesday, 31 March 2015. Categoria: Editorial

Mi tin e impresion cu Gobierno ta sigui mira cu indiferencia e caso de Besaril, y peor ainda, cu un menospecio total e exoneracionnan cu Ministerio Publico ta aplicando na e tantisimo casonan di violacion di nos Leynan: loteria, laboratorio, transaccionnan di centenares di florin via un cuenta fantasma di abogado, etc. Ta parce cu MP (Ministerio Publico) ta observando e casonan ey cu wowonan politico y no kier kere mes den e concepto di imparcialidad na momento di aplica e investigacionnan y coreccionnan cu mester bin al caso. Nan ta creando pa poblacion  un idea nobo di loke ta permisible y loke no ta. Nan a drey e mundo di husticia pa robez di tal forma cu poco di nos por sigui kere den su aplicacion imparcial na esnan cu no ta partidario di nan concepto di loke ta importante, o sea e reparticion ecuanime di loke ta husticia entre esnan cu merece. No ta por nada cu nan a escoge como simbolo di imparcialidad un señorita cu un lenso mara na su wowonan pa e no mira ken ta para su dilanti den un tribunal, sino cu nan a ranca e pida tela ey benta afo hopi tempo pasa, y kier sa bon cla ken ta para nan dilanti pa nan aplica loke ta nan interpretacion di loke ta husticia, o sea esun cu ta pas cu nan adhesion na  un of otro politica partidario, of un of otro persona cu no ta “niet zomaar iemand”. Cu esey nan a bisa nos tur cos.

Editorial: MERCA TA NOS ALIADO, NO NOS ENEMIGO!

Publication: Thursday, 26 March 2015. Categoria: Editorial

Pa mi ta incomprendible con un politico Arubiano por ta asina bruha (of mal influencia) cu e ta tribi di cuestiona un decision di e Presidente di e pais mas poderoso na mundo. Merca no ta djis lanza opinionnan, o advertencianan saca for di aire. E ta basa su mes riba actualidadnan cu ta real, no imaginario, y ta busca neutraliza su enemigonan gratuito cu pa envidia o adictonan di un filosofia social cu no ta pas cu democracia, ta intenta cuestione riba nan. Ami semper tabata y lo sigui di ta un gran admirador di Merca y di su Pueblo.

Den henter nos historia, Merca a faborece nos, el a demostra mil y un biaha cu e ta un amigo di nos, y ta dispuesto di defende nos contra loke sea ta inhusto o contraproducente pa nos democracia y nos forma di bida. El a faborece nos durante masha hopi decada cu un refineria cu a mantene nos den bon ordu, y e ta sigui faborece nos cu e coriente turistico mas grandi di nos isla. Bo por ta un malagradecido cu no kier admiti e beneficionan ricibi, pero aki no ta trata di agradecimento sino di un simple estupidez. Ta ken den su sano huicio por ta di acuerdo cu cualke Gobierno cu ta cera su contrincantenan, cu ta ordena tira riba gruponan desarma den un protesta pacifico, cu ta monopoliza tur poder, hasta kibrando trias politico manera cu e ta haya ta bon?

Editorial: HENDRIK SEFERINO CROES: E MINISTRO NARCO-COMPLACIENTE DI MEP!

Publication: Tuesday, 10 March 2015. Categoria: Editorial

Con bin Ministerio Publico no a actua den ningun sentido contra e vagabundo aki, mi no ta compronde, a menos cu e Fiscalnan ta politicamente comprometi o influencia. No tin otro splicacion pasobra pruebanan nos a publica na granel pa demostra cu el a cana, siendo Ministro, man teni cu diferente capo di droga. Esun mas evidente ta Sanchez, cu e nota skirbi na man pa Hendrik ‘himself’ y dirigi na Fiscal Hoogland o Wijland pa nan pone Sanchez inmediatamente den libertad, cos cu nan a nenga di haci. Pakico Hendrik Seferino tabata asina persistente pa pone Sanchez den Libertad? E tabata cera pa traficacion di droga! Asina mes, ningun Fiscal a tuma e molester di indaga den e asunto pa pone Husticia funciona manera debe ser. Ta ora cu Hendrik a prohibi nan dos di atende cualke caso relaciona cu narcotica cu Fiscal Wijland a lanta un caso contra Gobierno y a gane tambe! Ta hopi puyito a sali na careda for di bao e macuto durante e tratamento di e caso importante ey! Nos lo ripiti loke a sali na cla pa tur hende nota con dañino e influencia di Hendrik y su ehecutor (Evelyn) ta pa MEP.

Editorial: IMF TA CONFIRMA E EXITO DI MIKE EMAN

Publication: Thursday, 19 February 2015. Categoria: Editorial

E articulo 2015 di IMF ta respalda e Vision di Aruba tocante su estrategia pa un prosperidad economico, y cu e isla ta riba e caminda corecto pa un surplus fiscal na aña 2018. Algun dia pasa, o sea dia 13 di e luna aki, pa ta mas exacto, IMF a publica su Declaracion Concluyente di su Mision IV Articulo 2015. E tabata hopi claro den bisa cu e economia di Aruba ta recuperando di dos evento fuera di su control: un recesion doble causa pa e crisis financiero global y e ciere di e refineria na Aruba. IMF a cita varios desaroyo positivo cu ta mustra cu Aruba ta riba e ruta corecto pa un recuperacion economico completo y mester alcanza un surplus fiscal pa aña 2018. E deficit actual a bira menos y e deficil no relaciona cu petroleo tin un surplus pa motibo di e desaroyonan positivo den e sector turistico. En realidad, ta ser spera cu turismo lo sigui crece, pero tambe cu e demanda domestico lo recupera via proyectonan grandi den cual ta ser inverti, manera e Green Corridor y e Ring Road 3, cu ta moviendo bon. E beneficionan di e inversionnan di Gobierno den e infrastructura tambe ta visible.

Editorial: E EXITO DI PROME MINISTRO MIKE EMAN

Publication: Monday, 9 February 2015. Categoria: Editorial

Aña pasa a surgi un turbulencia entre Aruba y Hulanda pa motibo di un enfoke diferente di cada un di e dos paisnan pa loke ta trata e forma di enfrenta e crisis economico cu a bin ta surgi desde 2008-2009. E enfoke di nos Gobierno (Prome Ministro Mike Eman) tabata riba inversion y no austeridad, pa purba soluciona e crisis economico cu a surgi y cu a conduci te hasta na un welga di hamber cu mi no tabata comparti pasobra mi tabata convenci, y ta sigui cu e conviccion ey, cu e no tabata bay contribui cu algo na cualke sorto di solucion pa e problema, especialmente elimina e discrepancia di pensamento entre e dos paisnan.

Conociendo e testarudonan di Hulanda cu tabata braza austeridad manera un tabla di salbacion durante un naufragio riba un laman azota pa bientonan di horcan, mi tabata convenci cu nan ceguera no tabata bay cede pa pensamentonan progresista, o sikiera diferente na e modelo Hulandes-Aleman di austeridad.  E solucion cu nos Prome Ministro tabata buscando tabata tin e aval di varios di e economistanan mas famoso di mundo manera John Maynard Keynes y Shumpeter, y cu a duna su resultado. E mihor manera pa sali di e crisis tabata via di inversion y no di austeridad. Diferente editorial den dos di e corantnan mas importante na mundo, o sea New York Times y Wallstreet Journal, ta confirma esaki categoricamente.

Editorial: E LIDER DI MEP

Publication: Wednesday, 21 January 2015. Categoria: Editorial

Un contradiccion inexplicable di parti di e lider actual di MEP ta su aceptacion pa presidi e comision di “integridad” siendo cu e no a demostra ningun clase di integridad den e caso di e oficina di abogado fantasma cu un cuenta bancario  na cual e tin acceso y a usa manera cu e ta desea. Tin un discrepancia grandi entre e dosnan ey. Pa por lidera un comision di integridad bo mester por tin maske ta un tiki di dje, y demostre publicamente, loke no ta e caso di e lider di MEP. Tur loke e ta empeña di haci, no ta libra su nomber di e mancha cu e mes a permiti pa e caso pone riba dje, sino di purba desacredita Gobierno con cu e ta haya ta bon, sea cu mentira, cu exageracion, cu rumor, cu loke sea, menos cu e berdad.

Claro cu ami si ta defende e administracion aki, a pesar cu mi no ta di acuerdo cu algun di su prioridadnan, pero mi ta mira progreso, mi ta mira accion, mi ta mira e afan di hiba Aruba padilanti lo mas lihe cu por, y lo mas sigur posible. Durante e 8 añanan di MEP tur loke nos a mira ta e faborecimento di rumannan y otro miembronan di famia, un nepotismo abierto, corupcion, y un sinfin di otro defectonan cu ningun Gobierno tin e derecho di comete cu e bienesnan di Pueblo.  Con un parlamentario di AVP por a hinca den su cabez pa nombra Evelyn na cabez di e comision di integridad mi no ta compronde, a menos cu su cerebro normalmente ta funciona mes fofo cu su decisionnan incomprendible.