Archivo di e Categoria ‘Editorial’
Nada ta sosode pa casualidad, o pasobra algun figura mitico a dicidi di hinca man pa yuda. Tur cos tin un motibo su tras, y e aumento cu nos a experiencia y ta experienciando den turismo ta e resultado di un labor bon haci di parti di e expertonan cu nos tin ta labora den e ramo. Principalmente e ta debi na e bon conducta y ehemplo di e Ministro di Turismo, Otmar Oduber, cu ta ganando mas y mas simpatia tur caminda pa e tremendo labor cu e ta desplegando na cabez di e departamento cu ta fundamental pa e stabilidad di nos isla.
Cu e apoyo di Mike de Meza, Ministro di Financien, Pueblo por ta sigur cu turismo lo sigui crece y cu e lo mantene su posicion riba e escala di progreso cu poco otro isla den Caribe ta experienciando. Di mes nos tin un competencia feroz di parti di un cantidad di otro isla y nacion cu ta depende, mescos cu nos, di e desaroyo di nan turismo, cu a para bira den e epoca moderno aki un pilar economico indispensable.
Aña ta yegando su fin y vale la pena tira un bista riba loke a acontece durante e lunanan cu a pasa, sin pone reparo na cronologia of un ordenamento politico dificil pa expone sin riesgonan di eror. Loke nos por haci ta corda riba loke a pasa den cada partido y mira con nan a yega fin di aña y kico por pronostica, sin pretension di ta clarividente, pa e aña pre-electoral cu ta habri dia prome.
Mi no por keda sin sinti mi mes asombra cu te ainda tin algun hende ta core tras di e ilusion di Independencia comosifuera e ta algo deseable o bon pa Aruba. Den ki forma cu bo mire, e ta lo ultimo cu nos tin mester pa purba sali di e debaclenan economico cu e ultimo dos Gobiernonan a crea. Ademas, bo mester ta hopi ingenuo pa kere cu mara na cualke otro pais (excepto Merca) cosnan lo ta miho pa nos den algun sentido. Nos no tin nada di gana cu un pasaporte Arubiano, y menos ainda cu un nacionalidad di e mesun tipo. Como Hulandes nos ta goza di respet, y como viahero nos pasaporte Hulandes-Europeo ta duna nos un prestigio cu masha poco di nos lo kier perde pa sinta kere cu den un Independencia progreso lo hari cu nos y acompaña nos den nos viahenan pa exterior. Arubiano nos ta for di e momento cu nos nace, y Arubiano nos ta keda, pero esey ta un pahra di otro plumahe cu nacionalidad o pasporte.
E proyecto di e structuranan modular pa schoolnan a tilt hopi cabez, y awor, na conclusion di e caso cu algun doño di trailer a lanta contra Dowers, y a bin un sentencia den cual practicamente un Huez a bay sinta riba e stul di un Ministro, varios lenga den AVP a los y a cuminza divaga riba e relacion di AVP cu DIARIO. Lo ultimo cu a ser treci na mi atencion ta cu un di nan a comenta cu loke AVP ta hciendo ta un intento pa kibra e “dependencia” di AVP riba DIARIO, y otro a laga sa cu mester los e “grip” cu DIARIO tin riba AVP. Shonnan, ta di kico boso ta papiando internamente o den e pasiyonan di e partido berde? Pa caba cu e “dependencia” imaginario ey, o los e “grip” ficticio cu supuestamente lo ta existi, tur loke Mike o cualke otro dirigente di e partido mester haci ta yamami na telefon y den un seconde lo mi complace nan completamente! Pero, como cu ningun di e dos delirionan ey ta existi, mi no ta compronde pakico mester bin cu tanto drama!
Na e poco almanan cu kier lanza critica habri o disimula contra e proyecto cu yama “Aruba in Style”, lagami bisa nan cu nan no ta hacie pasobra e evento tabata mal planea, mal dirigi o mal atendi; nan ta hacie pasobra ta existi un palabra den diccionario cu ta describi nan actitud y negativismo perfectamente bon: envidia! Nos tur cu ta biba riba un isla mes chikito cu Aruba, ta consciente di existencia abulta y generaliza di e defecto ey, ya cu aki nos tur conoce otro, y nos virtudnan o exitonan ta molostia e mediocrenan enormemente. Como cu “Aruba in Style” a cosecha tanto exito cerca e periodistanan y personahenan cu a bin di exterior pa observa o participa den e evento, mester a inventa kico cu ta pa lanza algun critica na lugar di un merecido elogio.
Awe, DIARIO ta cumpli 31 aña di existencia sirbiendo comunidad como e medio di comunicacion mas grandi na Aruba. Bo no ta crece bira grandi sin merece, y ta e constancia den bo trabao, cua cu e ta, ta otorgabo e status cu bo tin awe. DIARIO a bin ta cumpli cu Pueblo for di e dia di su fundacion, den e cayente di e confrontacionnan verbal y publico pa logra un anhelo cu Pueblo tabata kier mira realiza. Nos a cumpli cu Pueblo poniendo di nos parti, uniendo nos mes na Betico, pa logra e Status Aparte cu nos tin awor. Esey ya ta parti di nos historia y no por ser cambia cu cualke intento di falsificacion.
(Esun cu crea problema den su mesun cas lo hereda biento)
E confrontacion ta uno grandi, pasobra MEP ta realiza cu nan a perde e eleccion anterior riba e base di e atakenan sin tregua cu DIARIO y AVP a hiba tocante e topico en cuestion. “Friends and Family” a bira un tema neuralgico pa Pueblo, pasobra no ta importa cua di dos partido practike, ta Pueblo ta keda afo pasobra e preferencia nunca a bay den su direccion. Pero, tin un diferencia grandi entre e enfoke cu ambos partido ta dune: AVP tin razon pa motibo di e tantisimo huurnan otorga na un solo famia di MEP, pero MEP ta basa su mes riba algun indicacion (y no semper corecto) di e faborecimento di un of otro amigo, of un of otro famia di cualke integrante di e partido.
Tin politiconan cu ta atrae critica manera suco ta atrae fruminga, pasobra na lugar di demostra nan capacidad cu accionnan visible, nan ta prefera di sconde den e cueba di indecision. Otronan ta cosecha elogio tras di elogio a base di nan labornan, no palabreria. Un di nan definitivamente ta Otmar Oduber, e actual Ministro di Turismo y otro departamentonan cu ta ricibiendo e beneficio completo di su conduccion positivo y al caso. Tin ademas e politiconan cu despues di un tempo ta cuminza hunga caco scondi, y bo no ta tende mas di nan pa nada na mundo. E gobierno actual tin varios di e ultimonan aki!
Saca potret rond di mundo cu personahenan importante no ta un situacion indicativo di importancia, sino mas bien di un afan pa hala atencion sin haci nada. E politiconan cu ta pretende di gana fama cu semehante inutilidadnan ta haya sa lat of tempran cu no tin substituto pa trabao na beneficio di e pueblo di un pais. Loke si mi ta mira ta surgiendo na Aruba ta un clamor fuerte di parti di un generacion hoben indigna cu un Gobierno cu ta papia hopi, ta dorna curpa cu pluma aheno, y kier pusha parti di su responsabilidadnan riba otro sectornan di comunidad pa nan comparti cune e posible fracaso di su gestionnan.
Tin politiconan difunto cu no kier acepta cu nan a retira voluntariamente, pero ta insisti di duna declaracionnan sin pia ni cabez. Nel mes a bisa cu e ta bay busca un hamaca pa descansa curpa, pero aparentemente tur e placa di Pueblo cu e ta cobra via tanto pensioen no ta alcanze pa cumpra un hamaca y e ta sigui bati boca na radio y television manera un demente. Di mes el a bira lomba pa tur su votadornan nengando di bay sinta defende nan derechonan den Parlamento; djey el a retira como lider di partido; djey el a dicidi di publica documentonan interno di belastingdienst cu a causa e suspension di tres Hulandes y mas pa sigui, pero cu pe mes ta bay resulta malo pasobra un keho penal ta bayendo Ministerio Publico pa Landsrecherche pasa man pe y pone paga pa e violacion flagrante ey di Ley.
Ayera mi a sinta scucha cu hopi atencion e exposicion di e miembronan di Parlamento referente criminalidad y Enseñanza, o sea e proyecto di structuranan modular proponi na Gobierno. E unico cu a decepciona tabata Juan David, alias Pitipois. El a cuminza pa ofende tur su coleganan Parlamentario declarando cu tin un medio di comunicacion (e kier meen DIARIO) cu a pone presion riba Parlamento y tur su miembronan a bira sordo-mudo. Ta tristo tende un persona supuestamente adulto bin cu tal muchachada, pasobra ningun medio na mundo tin e tipo di poder of e influencia ey. Si ta apoyo e tabata buscando cerca su coleganan, el a opta pa e forma robez di buske, pasobra ta hari nan a harie den su cara. Ademas, tabata tin dos punto di orden, uno di Bikker y otro di Booshi, cu a pone Juan David na su lugar sin hesitacion.
Te ainda mi no a tende di Juan David un splicacion racional pa e postura iracional cu el a tuma contra e proyecto modular cu ta faborece e maestronan y e studiantenan cu localnan adecuado, moderno y bon ventila, pa nan por siña loke e maestronan ta imparti den un ambiente moderno di comodidad. E sa masha bon cu e Ministro no a viola ningun Ley; cu e proyecto no ta di Gobierno; cu no ta Gobierno a bin cune, sino e desaroyadornan di e proyecto. E ta e propiedad di esun cu a propone Gobierno e idea cu el a formula y investiga te den su ultimo detayenan. Gobierno awor no por bin haci doño di dje y mande pa ofertanan publico simplemente pasobra e no ta di dje, y no ta e ta financie tampoco.
E dos partidonan grandi di Aruba ta pasando den mal momento actualmente, MEP pa motibo di un lucha interno pa liderazgo cu a caba den fin di siman, y AVP pasobra un Parlamentario cu e cerebro di e tamaño di un stuf di potlood, tine secuestra. Tur e Ministronan hunto no por a tuma e decision cu nan mester a tuma, o sea di respalda abiertamente y publicamente e Ministro di Enseñanza, y a permiti pa Juan David, alias Pitipois, converti nan den rehennan di su capricho. Poco biaha mi a yega di mira un actuacion asina debil di parti di cualke Ministro!
Si e intencion di Juan David ta pa causa AVP suficiente daño prome cu eleccion pa e no keda cu ningun oportunidad di triunfo, e ta riba un bon caminda cu su teorianan y fantasianan dogmatico. Ni den nos Constitucion, ni den nos pasado, ni den nos historia politico, un adhesion irazonable na loke ta poni riba
papel a funciona pa e bienestar di nos isla. Ehemplonan tin na cantidad y ta bon pa e bay investiga nan, especialmente esnan cometi durante e gobernacion di su famia (Juancho Yrausquin) y e PPA na cual e y Juan David ta pertenece pa naturaleza.
Ta hopi lamentable mira e situacion den cual algun conductor di e partido a hinca MEP, no pa motibo di ambicionnan desmesura so, sino pasobra poder ta eherce riba nan un atractivo mas pernicioso cu alcohol tin riba e bebedor adicto. No ta cuestion di evalua cada politico di MEP segun su actuacionnan, sino segun e falta di nan actuacionnan cu a pone e partido lomba contra muraya. Ainda e partido tin salvacion? Mi ta convenci cu si, pero a base di un gran esfuerzo pa uni e base di nobo, proponiendo programanan realistico cu por sirbi di aliciente pa un publico cu a bira lomba pe cu e disgusto crea a traves di 9 aña di corupcion y nepotismo.
Tin cosnan den politica cu ta facil pa dilucida, y otronan cu ta reta bo comprension pasobra nan no tin sentido. E ultimo declaracionnan di Booshi y e manera cu el a posesiona su mas den Parlamento ta mas un enigma cu un resultado logico cu ta presta su mes na analisis y comprension. Mi no ta bay comenta riba loke el a papia pasobra esey ta su asunto cu su partido, pero si mi mester purba analiza kico e resultado final ta. Nos tur ta compronde cu e tabata tin palabranan fuerte dirigi na Nel, kende segun Booshi a traicione ora cu e no a cumpli cu su palabra empeña. Di Nel mi ta kere kico cu ta pasobra e no ta un desconocido pa mi, menos ainda den su maniobranan pa purba consolida su mes den poder, o sea extende su mes como lider di MEP. Booshi nunca a decepciona den su declaracionnan pasobra e ta un persona cu ta papia straight. Cune no tin wega. E ta bisa loke e ta pensa, no loke e kier pa otronan pensa cu el a bisa, o sea declaracionan pa consumo popular.
Nada ta sosode pa casualidad, o pasobra algun figura mitico a dicidi di hinca man pa yuda. Tur cos tin un motibo su tras, y e aumento cu nos a experiencia y ta experienciando den turismo ta e resultado di un labor bon haci di parti di e expertonan cu nos tin ta labora den e ramo. Principalmente e ta debi na e bon conducta y ehemplo di e Ministro di Turismo, Otmar Oduber, cu ta ganando mas y mas simpatia tur caminda pa e tremendo labor cu e ta desplegando na cabez di e departamento cu ta fundamental pa e stabilidad di nos isla.
