No ta un sorpresa di mira cada dia dos o mas barco crucero den nos puerto, loke ta indicativo di e popularidad di Aruba como destino turistico. Nos beachan ta di e mihornan na mundo, o por lo menos ta den condicionnan igual cu e mihornan, pasobra no ta prome biaha cu e ta ser resalta den e revistanan specializa di e ramo. Nos hendenan a keda cu e actitud hospitalario cu un carta di presentacion hopi agradable pa kendenan ta bishita nos isla pa prome biaha, o ta bin den viahenan di repeticion. Lo cierto ta cu ta bon so nan ta papia di nos hendenan y e trato cu nan ta ricibi di nan. Ey no tin posible substituto.

            Apesar di e situacion financiero hopi dificil cu hopi pais na mundo, incluyendo Merca, ta pasando aden, di tur manera nos a logra conserva un posicion hopi halto den e demanda pa pasa vacacion riba nos isla. Mi ta atribui e exito grandi cu nos ta eperienciando den e auge di turismo na e dinamismo di Otmar Oduber, na su curashi y su tumamento di decision ora cu e ta necesario, a pesar di cualke riesgo cu nan por inclui. Si bo tin e poder anto use, o siña use, de lo contrario lague pa otro cu si por use pa crea bienestar pa nos Pueblo y nos isla. Nos no ta gana nada cu un Ministro cu ta pasa henter su tempo ta titubea, ta debati cu su mes na momento cu e mester tuma decision, y djey ta laga cosnan para pa casualidad tuma e decision pe.

                Un pabien grandi ta bay pa Otmar y e siguranza cu nos ta para su tras den e noble empeño di crea prosperidad y bienestar te unda cu e por pa nos Pueblo y nos isla. Su estilo ta encomiable, pasobra te unda cu mi por analiza, e ta e Ministro di Turismo di Aruba, no di un sector specifico, o di un grupo ayega na Gobierno. E ta incorpora den su gestionnan gobernante tur e circulonan di Arubianonan capacita y ta incorpora tur esnan cu e ta sinti lo ta util pa Aruba, sin preocupa su mes cu nan antecedentenan, solamente cu nan boluntad pa sirbi nos isla y nos Pueblo.

              Cu semehante Ministro cosnan no por bay malo; ta subi so e cifranan di turismo por subi, pasobra unda camindanan nobo ta ser habri, unda e bieunan ta ser renoba, ta utilidad so nan por produci pa nos pais. Y ta riba esey e concentracion di Otmar ta dirigi, pa saca e mihor probecho posible di loke ta existi caba y loke por ser crea pa amplia e mercado turistico mas ainda, pa Aruba keda como e destino ideal pa pasa vacacion o bishita cu agrado.

                MEP  ta e partido cu a causa e mayor turbulencia ya cu el a mira su presencia den Parlamento reduci te  5 candidato. E resto a ser obliga pa bandona partido o tabata propenso pa hacie di tur manera. El a perde un Booshi cu semper ta den noticia, sea cu lawai o sin dje, pero cu tin e habilidad di yama atencion pa loke e tin di bisa. Den mi huicio, MEP a perde un baluarte den e persona di Marisol pasobra den e eleccionnan cu el a participa el a sali como e number dos votegetter di su partido y den ambos ocasion a causa Nel un spanto real ora cu el a casi supere den cantidad di votonan obteni. Cu Mervin Wyatt Ras MEP no a perde absolutamente nada, pasobra na total e no a aporta nada na e partido durante su estadia den dje.  Un figura mas of un figura menos, sin laga hueya, no ta di ningun importancia pa e partido. En cambio, cu e entrada di Evelyn Wever Croes el a gana un bon lider, cu ta dispuesto di aporta loke e partido tin mester, o sea calidad di pensamento y conocimento di estrategia. Cu o sin e guia di Hendrik, mi ta sigur cu e lo haci un bon papel. Tur loke e mester tene bon na cuenta ta e declaracionnan di e Partido, pa nan no bay den e extremo di bira personal sin ningun necesidad. Na DIARIO nos a haya un par di nan cu ta hopi repugnante, y por supuesto a bay para directamente den bari di sushi.

                Pa loke ta Andin Bikker, semper mi a bisa cu e ta un one-man show, pasobra ta e so ta papia, loke ta indicativo cu e no tin un partido, sino un plataforma individual for di unda e por lanza su invectivanan sin estorbo. Como cu e ta e unico voz solitario, ta mi opinion cu e frecuencia di su declaracionnan a cuminza fada hopi hende, ni maske con bon e ta prepara su discursonan o declaracionnan. Un solo persona no ta  un partido, e ta un alma solitario bringando contra mulinanan di biento. A pesar di tur su inteligencia, su conocimentonan profundo di Ley y su voluntad pa sirbi su votadornan, e ta keda papia den bashi, sin e respaldo di un equipo cu por dune e sosten cu e tin mester pa haci un diferencia real.

                Como cu no ta mi custumbra di analiza difuntonan politico, mi no ta bay tuma e molester di papia di Rudy Lampe, kende a percura ‘su solito’ caba cu su propio partido y  desaparece for di e panorama politico sin pena ni gloria.

                Benny Nisbet ta tratando di haci un di su tantisimo comebacknan, pero mi no ta mire realizable, por lo menos no den e sentido di logra un gran progreso pa PPA. Mi no sa con e ta bay re-estructura e partido, pero si e por bin cu un lista aceptable, ta posible cu e por bolbe bira un factor den e proximo eleccion, aunke no di gran importancia.

                AVP a impresiona y desapunta alavez. E no a demostra di ta un partido constante cu su aliadonan, y esey por coste caro den proximo eleccion. Sinembago, ta innegable cu el a haci y ta haciendo un bon papel den Gobierno. Danki na figuranan importante manera Otmar Oduber, Mike de Meza y Benny Sevinger, su gestionnan gubernamental ta visible y e logronan tambe ta palpable. Cu Otmar so e tin cu kico impresiona ken cu ta den e sentido di un Ministro cu sa tuma decision y ta hacie corectamente. Pa loke ta trata Visser y e popchi, nan ta haci loke nan por den nan ministerionan, sin berdaderamente impresiona ningun hende. E fayo grandi ta sinta den e Ministro di Enseñanza y Husticia pasobra ta casi tur su departamentonan tin problemanan cu hopi di nos ta achaca na su falta di voluntad pa tuma decision. Si AVP ripiti cune riba lista e ta bay haci e partido hopi daño. Nos na DIARIO sigur no tin ningun aliciente pa ni sikiera considere un candidato serio, y durante e campaña cu ta bin, si e participa, e lo note claramente. E ta un bon persona, sin ningun duda, y hopi decente, pero e falta e materia gris cu ta diferencia un bon Ministro di uno di e monton: e capacidad di tuma decision y para su tras, venga loke venga.

                Mike Eman ta sigui destaca como un Prome Ministro cu ta logrando cosnan importante pa Aruba. Apesar di e frecuencia inagotable di su dunamentonan di man y su potretnan cu personahenan di exterior, ningun hende por nenga cu su gestionnan ta produciendo cosnan bon pa Aruba. Su drechamento di e relacionnan cu Hulanda so tin hopi merito, hopi mas di loke hopi hende ta compronde, y su trabaonan incansable riba tereno social ta dunando frutanan cu bo por mira. E no ta ni un revolucionario ni un socialista, pero e ta desenvolve su mes den tur dos campo cu hopi exito, sin trece riba su mes un etiketa cu hopi di nos lo rechaza di inmediato. Mi ta sigui tene confianza den su labornan como Prome Ministro y mi ta convenci cu durante e proximo dos añanan Aruba ta bay logra hopi exito for di su gestionnan.

             Berdad ta cu den pasado e lucha di MEP tabata pa e independencia di Aruba, loke a resulta tambe den e logro di Status Aparte, pero mara na un independencia indeseable 10 aña despues, y cu a ser hancra den Statuto. Pero, pa duna Cesar loke ta di Cesar, ta e Gobierno di MEP mes di e tempo aya a logra scrap e fecha di independencia for di Statuto y a duna mas firmeza na e Status Aparte cu nos a logra na final di tur e confrontacionnan. Un Status Aparte cu despues a cuminza perde parti di su importancia durante añanan largo di tornumento na dje, y cu a lague practicamente como un skelet di loke un tempo e tabata.

             Cualke encuesta na Aruba lo demostra sin ningun duda cu e mayoria absoluto di e Pueblo no ta partidario di un eventual independencia, y ta desea di keda cu e status cu nos tin awor, o sea parti di Reino, y via Hulanda, di Europa. Ban laga aventuranan yen di riesgo pa otronan menos pensante cu nos, y ban consolida e relacionnan amigal cu nos tin cu Hulanda. A bay nos bon cune durante mas di 400 aña, y mi no ta mira pakico esey mester cambia awor. Ambicion pa poder no por tuma prioridad nunca riba e bienestar di e mayoria di nos Pueblo, y ta na dje e politiconan mester dedica nan mes un poco mas, na lugar di pleita den patio aheno manera gaynan di pelea.
       
               Nos tin hopi problema pa soluciona, y cu confrontacionan infructuoso nos no ta bay logre. Ya Evelyn a declara caba cu MEP no ta interesa den independencia, no ta papiando mas di dje, y e no ta mira tampoco pakico mester sigui cu e topico ey. Mi ta di acuerdo cune. Tin hopi otro cos mas urgente pa atende.

                  Lagami repasa un rato e relacionnan di DIARIO cu AVP, pa no keda ningun duda den e cabez di ningun hende, especialmente e tanda di mediocrenan cu semper ta acompaña e partidonan politico y tin mas stem cu cerebro. Durante tres Gobierno di AVP, ni ami ni DIARIO a haya absolutamente NADA di nan! Den dos ocasion DIARIO a acompaña Henny den su buskeda di poder, y ultimamente nos a acompaña Mike pa recupera e poder cu e partido a perde durante 8 aña! Un biaha mi a bay tras di e oferta di Glenbert pa un loteria, y ta net AVP a bay contra cu e otro Ministro di Husticia cu e tabata tin, o sea Eddy Croes. Total, nada! O sea cu mi no tin nada di agradece e partido.

                 Cu mi tabata tin hopi simpatia pa AVP ta un hecho cu mi no por nenga, y di cu mi tin admiracion pa Ministronan manera Otmar Oduber, Mike De Meza y Benny Sevinger, ta algo cu mi a yega di expresa den diferente ocasion. Esey no a cambia. Pero, di cu mi tin alavez un gran decepcion den e falta di lealtad di AVP pa su seguidornan, tambe ta innegable. Contrario na MEP, cu ta para firme cu su hendenan venga loke venga, AVP ta bira lomba pa nan asina cu e yega na poder. E ta parce un imitacion barata di Dr. Jekyl y Mr. Hyde, o sea un doble personalidad inexplicable.

                 Awor, cu e asunto di e structuranan modular, cu por cierto no ta di mi personalmente, ata e lenganan cu tin e custumbra di bati bay gol cu shisheria, a los nan venenonan atrobe. En realidad mi no ta biba pendiente di si Dowers a firma o ta bay firma cualke contrato cu e desaroyadornan di e proyecto, y sea loke sea cu e ta bay haci, e no ta afecta mi cartera ni mi creencianan politico. Loke si mi tin di enfatiza ta cu a strañami masha hopi cu un Parlamentario di AVP a inicia tur e badaba cu a surgi entorno di e proyecto, apoya pa e Presidente di Parlamento, comosifuera e ta un gran cos, sin cu e partido a tuma medidanan contra dje. Con por ta posible cu un Parlamentario, den e caso aki Juan David, alias pitipois, ta vota contra e mocion di su proprio fraccion y ainda e ta forma parti di e partido? Den MEP esey no por a sosode nunca, keremi! Pesey mi ta sinti hopi inclinacion di reverti mi pasonan y bay cas bek.

                Danki na Nel y su gueranan constante contra DIARIO, mi a cambia di e rumbo politico cu mi tabata tin for di tempo di Betico, pero awor e no tey mas. Awor e partido tin otro dirigente y ta haciendo loke e mester haci pa reconstrui e partido y bay un biaha mas en busca di poder, o sea bolbe den Gobierno. Ningun hende den AVP mester preocupa su mes cu e conceptonan ridiculo di “dependencia” o “grip” , pasobra cu un solo yamada mi por a pone un fin inmediato y categorico na semehante ideanan o impresionnan cu por ta bibo den cualke cerebro febril di AVP. E partido no tin mester di DIARIO, ni DIARIO tin mester di dje! E ta dje simple ey. Den politica cada ken mester conduci su mes di acuerdo cu su principionan y su metanan, y esunnan di mi ta bon delinea y bon conoci den Pueblo. Mi meta semper tabata y lo ta te dia mi muri, e bienestar di mi isla y su hendenan, pasobra mi ta sintimi comodo y feliz como parti di su Pueblo. Politica no ta significa nada pa mi den e sentido personal, pero si hopi den e sentido di un conduccion acerta, trankilizante y progresista pa e futuro di mi isla.

E cobertura den e revistanan mas popular, y e corantnan mas grandi cu ta dedica espacio na moda y estilo, y a manda representantenan Aruba pa cubri e magno evento ey, a bay back nan paisnan cu palabranan grandi di elogio dibuha riba nan lipnan. Como ehemplo, pa un Hilton bisa cu e ta sintie absolutamente sigur na Aruba, bo no por haya un lineal suficientemente largo o capaz di midi e resonancia, e eco y e propagacion ey di e bondadnan di nos isla.

E mal impresión cu e caso di Natalee por a causa a desaparece tras di e palabranan di e personahe ey. Ademas, el a declara na diferente persona di Aruba cu e isla aki ta bendiciona, cu e Pueblo ta por demas hospitalario, cu e trato cu nan a ricibi di parti di e personal cu tabata tin contacto cu nan, tabata sublime.

Miho propaganda cu esey bo no ta bay logra ni maske bo inverti un centenar di miyon di dolar pa logre. Esey tabata, pa mi, e esencia di e importancia di “Aruba in Style”, o sea cu el a logra atrae, y mas cu esey convence e clase di personalidadnan mundialmente importante di e virtudnan di nos isla, virtudnan cu nos conoce pasobra nos ta biba akinan, pero cu pa nan tabata un revelacion agradable y satisfactorio.

Un pabien especial ta bay pa Ministro Otmar Oduber, cu for di un principio a kere den e proyecto y a pone di su parti y di e parti di su personal pa convirtie den loke el a bira, o sea un exito rotundo, y un evento cu ta bay crece den e añanan venidero te bira un di e mas importantenan den su estilo na mundo.

Un felicitacion ta bay tambe pa e personal di ATA cu a contribui, especialmente pa Mirna Jansen, kende haciendo gala di un experiencia grandi y un conocimento profundo di e materia a coopera sin por mas, y ta un di e personanan clave den e éxito cu “Aruba in Style” a cosecha. Y e elogio cu mi tin pa Damilice, Ronchi, Evelyn, y e resto di e grupo dirigente di e proyecto, ta mes grandi cu e exito universal cu el a cosecha pa nos isla.

Mi ta testigo di con duro nan a traha durante dia y anochi pa organiza un evento cu ya a pasa pa historia caba cu e leternan mayusculo di exito. Laga e poco almanan cu kier bin cu algun critica sin importancia compronde bon cu bo ta midi e logro di un evento den e olanan di propagacion y publicidad internacional cu el a provoca, y cu bo no por evalua monetariamente, pasobra no tin suficiente placa pa paga ni un decima parte di dje! Y ta awor nos ta bay cuminza haya copia di e elogionan pa nos isla, y e fama cu el a propaga den exterior, y cu ta redunda den un beneficio enorme pa nos turismo.

Semper mi a sintimi orguyoso di ta un Arubiano, naci y cria riba e isla mas spectacular cu Dios a crea y cu nos a hereda di Dje como un regalo cu nos mester preserva cu tur nos forzanan. Ta nos deber di no laga posturanan negativo predomina riba nos isla, y cuide pa e futuro generacionnan tambe disfruta di su encantonan.

Un biaha mas: un pabien caluroso na Ministro Otmar Oduber, Mirna Jansen, Damilice, Ronchi, Evelyn y e resto di e personal cu a percura pa Aruba a keda asina bon presenta dilanti di e wowonan di mundo. “Aruba in Style” tabata senciyamente sensacional!

         Awe 31 aña a pasa for di e fecha ey di su comienzo, y e matutino di Pueblo ta sigui goza di e confianza absoluto di Pueblo, cu a sostene nos y ta sigui sostene nos como e number 1 entre tur e medionan di comunicación skirbi cu ta circula na Aruba. Hasta e participantenan riba facebook a faborece DIARIO cu nan votonan y a otorga nos un 82 por ciento di e totalidad di e votonan deposita. Pesey, y pa hopi otro motibo, awe ta un dia no solamente di hubilo pa nos, sino di agradecimento tambe. Sin e apoyo grandi ey di Pueblo, aki y den exterior, nos no lo por a logra e posicion cu nos tin awe. Pesey un danki di curazon na tur esnan cu a kere y ta sigui kere den nos y tin e confianza cu nunca nos lo desvia di e ruta cu nos a tuma pa enfrenta porvenir cu fe y creencia den Dios y den e fortitud di nos Pueblo, cu ta e fundeshi di e grandeza di nos isla.

              Na comercio en general cu a faborece nos den tur e añanan di nos desaroyo, un danki special y un reconocimento pa e importancia di su aporte. Nunca nos a depende di cualke gobierno o partido politico pa sostene nos, aunke na honor di berdad, ta cu e apoyo di Betico nos a logra escala e ceronan di obstaculo cu envidia semper ta pone dilanti di cualke institucion, negoshi o empresa cu ta riba e caminda di progreso y di éxito. Pesey semper mi a keda cu un gratitud special na e politico cu mi ta considera esun mas sobresaliente cu nos isla a produci.

                Pero, nos tarea no ta caba akinan, y no ta e momento tampoco pa descuida nos debernan cu e Pueblo di Aruba. E por conta cu nos lo tey semper, como medio di comunicación, pa defende su interesnan ora cu nos mira algun peligro asoma riba horizonte. Ta nos deber di analiza e cambionan cu ta tumando lugar na diferente parti di mundo, en especial den e regionnan di peligro pa humanidad mes, y lanza e voz di alerta pa nos ta prepara pa cualke eventualidad. Mi no ta kere cu nos isla ni nos Pueblo ta o lo core algun peligro inmediato como consecuencia di e tumultonan cu ta tumando lugar na paisnan hopi distante di nos posicion geografico, pero distancianan a manera desaparece den e progreso increiblemente grandi di mundo tecnologico, y bo no por papia mas di lehania. Pesey no ta di mas mantene bista riba nan y mira den ki direccion nan por pusha nos.

                Na henter e personal di DIARIO mi agradecimento como Director, y mi reconocimento di un trabao bon haci. Mi ta insisti di bisa cu nos tin e miho ekipo di redaccion den nos region, y mi ta convenci cu e personal tecnico y administrativo no ta keda atras den nan aporte pa e logronan cu e matutino aki di Pueblo a cosecha te awor. Danki pa e mas di 30 añanan inverti den nos empresa, y ban sigui pa futuro cu e mesun idealismo nacionalista cu a inspira nos durante e tres decadanan cu ta tras di lomba. DIARIO ta aki pa keda como e number 1 incuestionable. Nos no ta bay cede e posicion ey na ningun otro medio, sino cu nos ta bay fortifike cu nos empeño di sigui presenta e miho matutino di nos region.

(Esun cu crea problema den su mesun cas lo hereda biento)

Unda MEP ta completamente ekiboca ta den e cuestion di e structuranan modular, pasobra mescos cu e loteria solicita (cu tabata tin su origen den un oferta di OLA, y no un idea di e peticionarionan) durante e di dos mandato di Henny Eman, y cu by the way a ser nenga, e proyecto di e structuranan modular ta un idea original y exclusivo di JEM na e Ministro di Enseñanza.

E Ministro no a pidi e oferta, e no tabata tin ningun nocion di su existencia te ora cu el a haya e oferta den su mannan, y cu a parce un bon idea pa soluciona den corto tempo y cu un bon sparmento di placa di Pueblo, e escasez di localnan pa duna les cu ta existi te awe na nos schoolnan.

Den ningun momento por relaciona esaki cu ‘friends’ o ‘family’. E idea no a surgi di Gobierno, pero bao e presion di Paul Croes principalmente y Juan David Yrausquin, AVP mes a duna motibo pa otronan convirtie ekibocadamente den un ‘fabor’ politico!

Analizando henter e badabada cu a surgi entorno di e oferta ey, y e compromiso incuestionable di Gobierno via un MB cu a seya e oferta den un contrato, no tin otro hende pa culpa cu e Ministro di Enseñanza mes, kende pa cobardia o temor di critica, a laga e asunto core sin freno di boca pa boca. Si el a djis cumpli cu e MB, por ta cu lo tabata tin protesta (politico) durante un siman y ya pa awe e schoolnan lo tabata cla y funcional.

Aki no por papia di friends and family pasobra ta AVP mes ta tras di e badabada cu a surgi ya cu ta dos supuesto Avepista, Paul y Juan David, a insisti pa bin cu un licitacion publico, loke no tabata necesario di acuerdo cu Ley.

Sinembargo, tur dos a bira mudo frente e escandalonan reciente cu a rebenta den nan caranan manera bombnan di hopi megaton! Y ta awor nan a cuminza! Unda e ‘balentia’ di e dos parlamentarionan aki a keda? Di con nan no a ni sikiera cuestiona loke ta pasando cu e cas di Europa? Cu e faboritismo di un Ministro pa un locutor di radio, pa e otro tantisimo casonan cu ta rekeri licitacion publico pero cu a ser otorga bao man na “friends and family”? Pakico nan bocanan grandi ta cera cu candal? Si ta pa “principio” nan a actua den e caso di e structuranan modular, unda e “principio” ey a keda cu e trailernan cu Gobierno a huur durante tanto aña, pa cual nan a paga hopi miyon di florin di Pueblo sin nunca a bay un licitacion publico? Ta pa hipocrita mes Pueblo tin nan, pasobra ora cu bo kier actua di buena fe pa “defende” un punto di bista, anto e punto di bista ey mester ta aplicable na tur caso cu ta rekeri di dje, y no pa uno so pasobra bo no ta gusta e persona tras di e proyecto!

Y si Gobierno saca e proyecto den un licitacion publico, utilizando e specificacionnan di JEM, anto ta un ladron mes e ta pasobra e ta hortando e trabao di un ciudadano cu a inverti hopi di su tempo y placa den prepara e proyecto! Ora cu e cabez di un partido no sa kico e rabo ta haci, of ta di acuerdo cu e posturanan contradictorio y censurable di e rabo, anto no ta bay tin redencion pa e partido. E resultadonan di proximo eleccion ta bay confirma loke mi ta bisando awor. Pesey e palabran di Salomon den e buki di proverbionan tin tanto balor: “Esun cu crea problema den su mesun cas lo hereda biento.”

Na esnan cu ta kere cu ta pa “gana di cos” ami ta bringa cualke caso, lagami splica nan cu NUNCA mi a yega di haya un solo fabor di cualke partido den Gobierno. Tempo mi tabata acompaña Betico den su lucha, mi a keda na final mescos cu mi tabata na principio: sin a haya ningun fabor! Mi no a pidi y Betico no a ofrece tampoco! Durante e di dos Gobierno di Henny Eman, Glenbert a bin mi cas ofrece nos un loteria, pero cu Henny a nenga di otorga. O sea cu hasta como aliado di AVP mi no a pidi ni a haya nada! Y den e caso di lotto tampoco ta ami a pidie.

Glenbert ta testigo di esey pasobra ta el a bin mi cas ofrecemi e! Cu Marisol mi a logra un pida tereno banda di e hotelnan cu Nel a obligue bolbe kita di mi. Marisol ta testigo cu nunca mi a skirbi algo contra dje pa motibo di e tereno ey. O sea cu ey tampoco por bisa cu ta pa gana di cos mi a obra. Awor, cu e ‘pequeño dictadorcito’ tampoco mi a pidi algo; mi ta sostene e proyecto di e structuranan modular pasobra ta mi yiu a bin cune, y ey tambe tin un tranca formal di parti di AVP pa e no haye!

Mi tabata tin un confianza grandi den Artur Dowers pasobra for di un principio el a parcemi un persona cu bo por confia, cu ta fiel na su palabra, cu no tin miedo di critica, pero hechonan concreto a convencemi ultimamente cu mi ta ekiboca den mi apreciacion di su persona.

Pa loke ta Paul Croes y Juan David, pa mi nan ta dos paracaidista cu pa prome biaha a milita den AVP, y mi ta duda cu nan lo bolbe aparece riba su lista. Enfin, hende por papia kico cu nan kier, pero e hechonan concreto ta conta un storia real, o sea e berdad di loke ta pasando cu e proyecto formidable di e structuranan modular.

Tempo lo trece un claridad den un asunto perdi den e batimento di tanto lenga tocante un proyecto cu poco di nan ta compronde y menos ainda ta den e capacidad di aprecia su importancia.

Nos ta biba, ademas, den un democracia fragil, unda tin un bataya constante di derecho (ciudadano) contra forza (gubernamental), y cu no tin un fin na bista. E eror di kere cu pasobra Pueblo a vota pa tal o cual partido, mandando e goberna na su nomber, esaki ta dune e privilegio di haci loke e kier y no loke ta cumbini, no por resulta den algo bon pa nos isla.

Cu un ekipo di hendenan talentoso manera esun cu e Gobierno actual tin, ta incomprendible con un parlamentario pitipois, doño di un cerebro di e tamaño di un stuf di potlood, por mantene henter un Conseho di Ministro y e resto di su Parlamentarionan como su rehennan priva! Algo no ta anda bon ora cu semehante situacionnan presenta, y e no ta pronostica nada bon tampoco ni pa e Gobierno ni pa e Partido pa proximo eleccion.

Mester tin hendenan suficientemente capacita den Gobierno pa inicia e obra di consolidacion di e programa cu e kier ehecuta, sin e estorbo inutil di cualke Parlamentario di cabez fofo. Mi ta sigui kere den e capacidad di e integrantenan di Conseho di Ministro, pero mi ta alavez completamente asombra cu nan falta di vision y curashi politico pa remedia un situacion cu no ta nada dificil di solventa. Pero, cada ken ta pensa na su manera, y mi no ta bay asumi e papel di un redentor pa purba rescata loke a bay perdi den e confrontacion innecesario cu pitipois a provoca.

Nunca mi a yega di endiosa ningun hende, pasobra pa mi Dios ta un so tin, y ta na dje so mi debe tur loke mi ta y tin. E unico politico cu mi a yega di admira sin condicion ni reserva tabata Betico Croes, den feliz memoria, y e partido cu durante su tempo como lider a sa di marca e rumbo pa un porvenir husto pa su Pueblo. Mi ta kere den Evelyn, como persona y como lider di MEP, y mi ta sigur cu e lo desempeña su papel como tal cu honor y sentido comun.

Ta imposible pa un persona manera mi kere cu un debate o confrontacion cu un tata mester ser hereda pa un di su yiunan, y mi no ta candidato pa hacie tampoco. Evelyn ta keda, pa mi, como un promesa grato di loke politica por ofrece Aruba.

               Di cu e matutino aki a publica un cuenta bancario di Zwinkels den pasado no tin nada di haber cu belastingdienst o cualke otro departamento di Gobierno; idem pa Edmond, cu ta e dos casonan cu e kier tene na nan pa no bay pasa un temporada na KIA. Pero, nan no ta bay yude pasobra loke el a haci ta completamente otro cos. El a pasa man, den combinacion cu hendenan di paden di belastingsdienst, pa un corespondencia priva y confidencial entre un pagador di belasting, su fiscal huristanan, y un par di hefe di belastingdienst, poniendo esakinan riba facebook pa henter mundo lesa un corespondencia cu no ta concerni nan y cu cual nan no tin nada di haber tampoco.

              Pakico Nel no ta publica cuanto mi ta paga na belasting via DIARIO, Hooters y Benihana cada aña? E cifra ta asina halto y importante cu e ta spante? No ta e tambe a cobra parti di su salario di loke ami ta paga na belasting tur luna y aña? E tipo di politica barata cu e kier hunga ta bay salie malo, pasobra e ta creando mas rabia den Pueblo cu e daño cu e ta causando e lider actual di MEP y su posibilidadnan pa sali triunfante den proximo eleccion. Mientras Nel ta “in the picture”, MEP no tin ningun clase di posibilidad di logra un actuacion honorable e eleccion cu ta bin. Miho e bay sigui duna masashi na Riu o cualke otro hotel cu el a faborece den pasado como mandatario, y laga e team nobo di MEP crea e partido den cual Pueblo por bolbe kere.

                  E pregunta cu tur hende ta haci ta: na nomber di ken Nel ta papiando? E no tin ningun relacion mas cu MEP desde cu el a nenga di ocupa su puesto den Parlamento. Pakico e no ta sigui e ehemplo di e bon politiconan manera Leo Chance y Henny Eman? Nan a retira di politica y nan a keda keto, lagando otronan yena e bashi cu nan a laga. Di con Nel no por haci mescos? Ta confianza e no tin den e capacidad di Evelyn y e otronan cu ta acompañe den e tareanan di MEP? Un barco no por tin mas di un capitan! Dos persona diferente no por establece e compas cu mester marca e rumbo di e barco, y den esey Nel ta causando un daño enorme na e partido. Cu bla bla bla e no ta yudando ni su mes, pasobra si el a keda keto por lo menos esnan cu no conoce como e rey di tur shishi, lo por mustre algun consideracion, pero habriendo boca cada rato e ta lagando tur e muscanan di discordia drenta pa causa nan daño.

               E eleccion cu ta bay bin ta bay ta uno dificil pa MEP pasobra e tin hopi tereno pa cubri, hopi problema interno pa soluciona, y hopi convencimento di haci pa recupera esnan cu Nel y su shisherianan a obliga bira lomba pa e partido. Si den MEP no surgi un o mas persona dispuesto di mande cera boca, anto mi no ta mira un gran porvenir pa e partido. E lo sigui “cuesta abajo” manera e tango di Gardel ta bisa, te yega bom. Y si esnan cu ta dirigiendo e partido actualmente permitie yega te ey, e no ta bay tin e fortaleza moral pa lanta mas. E no ta un decision dificil, ni impopular, pasobra e intencion su tras ta pa duna e partido rosea, dune espacio pa actua, y dune e posibilidad di bira lomba pa e politica nefasto di shisheria di hendenan manera Nel cu no a haci nada otro cu rebaha e partido te suela.

              Pueblo kier mira un cara nobo, un manera diferente di haci politica, un enfoke riba e problematicanan di nos isla y no riba e bida priva di cualke ciudadano; e kier mira un partido dispuesto di defende loke ta drechi, di contribui na e recuperacion economico y financiero di Aruba, di establece un rumbo beneficioso cu por crea e horizontenan di prosperidad cu Pueblo tin mester y cu Aruba merece.

                Juan David mester por compronde cu su pretension di ta un homber di “principio” no ta cuadra cu realidad. Ta ken tabata yama cu insistencia poniendo tur clase di presion tur dia pa nan tuma den Gobierno un tal Yrausquin? Nan a splike cu no tin prespuesto pa tume te cu el a bay saca e presupuesto di otro caminda pa nan por a crea un puesto pe. E tin e mesun fam di Juan David, y lo ta bon pa e splica nos si e sa ta ken tabata pone tanto presion como Parlamentario te cu na final nan a tuma e tal peersona ey den servicio cu schaal 10. Ta cua Parlamentario tabata pone e tipo di presion ey? Y a base di cua principio?

                Mi mester bisa si cu mi a keda hopi impresiona cu e exposicion di Marisol, kende a enfoca e substancia di loke mester discuti den enseñanza y no cualke proyecto, di ken cu e por ta, ni cuanto e por bal. El e enfoca cu un maestria absoluto, y un sinceridad convincente, cu e sa ta di kico e ta papiando. Juan David lo haci bon di imita e tipo di argumentonan ey na lugar di perde tanto tempo cu redo, shisheria y atakenan infunda riba un proyecto cu ta aproba caba pa e Ministro. Si el a scucha un di e mihor huristanan cu tin na Aruba, o sea Andin Bikker, e a haya sa cu Gobierno a cruza e brug caba y no por hala atras di e compromiso di acepta e proyecto y dune curso di ehecucion.  Of esey, of Gobierno lo mester bay enfrenta e creadornan di e proyecto den Corte, unda su posibilidadnan di gana ta minimo! Juan David por ta tapa, pero ningun hende por ta dje tapa ey!

                E otro oradornan cu mi a scucha, entre nan Evelyn y Eddie Briezen, tabata riba un rumbo politico, loke ta nan tarea, pero tampoco a abarca e tema cu e seriedad cu Marisol a hacie. Andy Lee a bin cu un punto cu ta pone Juan David den un mal luz, pasobra el a puntra di con pa e proyecto aki si mester di destaho publico pasobra el a pasa 100 mil Florin, y na momento di renoba e contratonan di huur di e trailernan actual cada 6 luna, cu tambe ta pasa 100 mil Florin cada un, Juan David ta sordo y mudo y no ta habri su boca ni pa hap? Ey bo ta mira ki clase di Parlamentario e ta, o sea parcializa na fabor di algun y contra otronan. Nos no tin mester di e clase di Parlamentario ey! Ohala tabata tin mas Marisol den Parlamento, pa nos por sinti cu algo di substancia ta ser discuti y cu tin e interes berdadero di enseñanza na pecho.

                Mi no sa ta unda Juan David kier yega cu e tipo di actuacionnan infantil aki, pero awor cu tur hende sa cu e no ta un Green Giant sino un simple pitipois, su horizonte politico a bira hopi chikito. Mi no sa kico AVP ta bay haci cune, pero manteniendo un cabay di Troya den bo seno no ta exactamente recomendable.