Archivo di e Categoria ‘Editorial’
No tin ningun hende mas na Aruba cu ta inconsciente di loke ta pasando, especialmente den e ramo di criminalidad. Corantnan, Radio emisoranan y canalnan di television ta yen di e tipo di noticia aki cu ta cay tur hende pisa, o sea un atraco, un asalto na cas, un bandidahe riba caya, enfin, di un of otro forma cu ta kibra e paz tradicional cu nos a disfruta mayor parti di nos bidanan.
Ya no ta hende bruin, o blanco, o scur cu ta papia spaño o Hulandes o cualke otro idioma so, awor nan ta parce di tin nan propio Nacionnan Uni pasobra nan ta papia cu otro den tur idioma, incluyendo Papiamento. No ta pasa un dia cu no tin algo cu ta altera e nervionan di hendenan custumbra di biba cu trankilidad y ta desea di conserva e tiki paz cu ainda a keda.
Mi a keda asombra cu e noticia cu Booshi a gana Pader Lampe den e cuestion di ofensa durante un reunion di Parlamento, y e splicacion cu e sala di Parlamento ta un forum habri pa lanza cualke clase di ofensa o insulto iresponsable no ta parcemi un decision defendible den ningun sentido. E ta un demostracion claro di un inferioridad real.
E unico salanan cu mi ta considera sagrado ta esnan di e Misanan di cualke denominacion. Loke Husticia a haci cu e sentencia aki ta habri portanan pa e entrada impune di expresionnan inaceptable den cualke lugar cu ta considera su mes decente y ta bay proba di ta un demostracion mas di e decadencia moral cu ya caba por ser vislumbra den e incurable diatesis social cu a invadi varios parti di nos comunidad.
No tabata tin ningun manera cu e manifestacion cu MEP a convoca cu tanto fanfaria por a logra un exito pa e partido, pasobra e tabata basa riba un negativismo profundo y no e deseo of intencion di aporta algo valedero pa Aruba.
Bo no por pretende di haya seguidornan pa un manifestacion di odio, organiza y conduci cu un lenguahe ofensivo y riba un nivel poco biaha scucha na Aruba. Ora cu e ‘lider’ di un partido baha su mes te na un nivel asina iritante bo sa caba cual ta bay ta e resultado di dje. Otro producto a surgi si e tabata pa presenta remedinan pa tur e malnan cu MEP mes a crea durante ocho aña di desperdicio, persecucion politico y abuso. Coregi un mal ta rekeri honestidad y tolerancia, no atakenan verbal lanza a diestra y siniestra contra hendenan cu no tin nada di haber cu e problemanan cu MEP mes a crea.
E hubentud di Aruba: Riba bon o mal caminda?
E ta un tema dificil pa abarca, pasobra e ta presta su mes na tanto interpretacion diferente cu ta dificil precisa uno so, y djey pretende cu e ta esun valedero. Otro cos cu bo no por haci si bo kier keda dentro di e parametro di loke ta berdad, ta bin cu generalizacionnan cu no ta aplicable na tur e facetanan di e tema. Cu nos hubentud ta miho o piyo cu e otronan rond di nos y rond di mundo tambe ta suheto na e angulo for di cual bo kier mire.
Personalmente mi ta kere den nos hubentud, no pasobra mi ta bao e ilusion cu e ta perfecto o liber di erornan, sino pasobra mi no ta considera e desvionan di un sector minimo di dje como algo cu por ser extendi na e mayoria. Te unda cu mi experiencia y mi observacionnan ta guiami, mi ta convenci cu nos hubentud ta comporta su mes bon, atrobe cu e exepcionnan cu ta bin al caso. E no ta nada diferente na e tanto otro generacionnan hoben di pasado o hasta di antiguedad. Semper dentro di un comunidad, cua cu e ta, bo ta haya e excepcionnan cu por conduci na un generalizacion ekiboca, y ami ta purba di no cay den e trampa ey.
Politica mester ser eherci pa hendenan cu tin e capacidad y e inclinacion pa hacie, no pa ken cu ta, ni pa algun iluso cu por a hinca den nan cabez cu nan a obtene sabiduria durante un anochi di insomnio. Realidad ta loke ta existi, loke ta medible, loke ta pragmatico. Confundi un cu e otro ta propio di hendenan insensato, cu na lugar di busca enfoca cosnan cu ta interesa nos como Pueblo y como isla, ta perde nan tempo cu algun tipo o sorto di estrategia cu no ta funciona ni den un dictadura, corda den un democracia.
Tin biaha cosnan ta sosode den politica cu bo ta trata pero no por compronde. Por ehemplo, mi no por imaginami con un politico cu hopi experiencia por haci e promesa cu ta bay elimina brandstofclausule, sin specifica cu kico ta bay reemplaza loke e ta produci pa caha di Gobierno. Cosnan na Aruba no ta di gaba, y ya mitad di B.B.O. a ser elimina sin cu su aporte a haya un substitucion. Goberna kier meen mira padilanti, studia e efectonan secundario di cualke decision, y analiza bon den ki sentido e ta faborece Gobierno y Aruba. Ademas, si mi memoria no ta fayami, e promesa no tabata pa kita mitad di B.B.O, sino pa elimine completamente! Dos promesa cu mi ta mira sumamente dificil pa cumpli cu nan. Si ta pa ganashi politico nan a ser haci, anto nan no tin sentido.
Nos a caba di celebra e conclusion di un periodo importante di nos historia, cu e intencion di continue te unda cu nos por, pa e futuro generacionnan ricibi un isla bon structura, moralmente fuerte y economicamente solvente. E tarea no ta facil. Ningun hende a bisa o pretende cu e ta, pero e ta rekeri nos mayor atencion pa traha pa e logro di loke ta posible y alcanzable. Sinta discuti riba cosnan cu ta separa nos no ta propio di sensatez, y crea polarizacion unda mester tin union, ta parcemi un bobedad sin precedente.
Mester cuminza pa duna SAC un elogio bon mereci, pa e forma con nan a conduci e parada cu mi a mira ayera, haciendo e fluho di carozanan y bodypiecenan asina nechi y fluido cu no por a saca otro conclusion cu tabata tin mannan profesional tras di e organizacion. Polisnan a cana sin prisa y cu hopi autoridad banda di e piezanan den movimento, percurando pa un paso libre, sin interupcion, y e publico na banda a comporta su mes manera tabata di spera di un Pueblo educa y apreciativo di loke su mesun hendenan por y a produci.
Na Redaccion di DIARIO ta yegando mas y mas copia di cartanan manda pa diferente instancia internacional importante for di un “Comision Pa E Presonan di KIA”, den cual nan ta expone cu den e caso di e rebelion di e presonan cu a subi e dak di KIA den protesta contra loke nan ta considera un trato inhusto, nan a ser supuestamente bati mientras cu nan tabata domina caba y nan mannan tabata geboei. Pa nos ta dificil determina si e denuncia ta corecto o no, pesey e comentario aki ta bay ta basa riba e hecho cu den mi concepto, una vez bo domina un rebelde cu a lanta contra autoridad den cualke forma, sea pacifico of no, y bo tine na boei y na rudiya, ta innecesario aremete contra dje cu golpi den señal di venganza o liberacion di rabia.
Tin biaha e deseo ta grandi pa kere den un Gobierno cu te awor a demostra hopi talento pa saca potret den exterior cu personahenan importante; pa anuncia proyecto tras di proyecto sin fechanan di ehecucion o disponibilidad financiero; ostentando alavez un actitud complaciente contra esnan cu durante eleccion cu a pasa nan tabata ataca sin misericordia.
Danki Dios cu mi no a tende nada mas di e asunto di tram, y cu e declaracionnan defensivo tocante Ritz Carlton a mengua te casi nada. Loke mi ta sigui sin compronde ta e expresionnan cu “no por paga malo cu malo”, y “mi no tey pa persegui ningun hende” (refiriendo na e investigacionnan cu mester a tuma lugar contra esnan cu a malversa fondonan grandi di Pueblo, y a comete otro actonan castigable pa Ley).
Te awor tur loke nos sa di e evento ey ta cu Mobarak a bandona poder y cu e Estado Mayor Conhunto di su Forzanan Arma a asumi e liderazgo di e pais. Esey riba su mes no ta nada trankilizante pa kendenan conoce e historia real di semehante traspasonan di poder civil pa organizacionnan militar. Mi por enumera un cantidad infinito di paisnan cu a navega riba e mesun rio ey, pa na final termina den un dictadura sin excusa ni hustificacion. E motibo ta claro: e tareanan fundamental di un ehercito ta pa defende un pais contra forzanan invasor, pa combati anarkia y percura pa orden public sigui su curso, pa garantiza e bida y propiedadnan di e ciudadanonan, pero no pa administra e pais den su totalidad.
Tin biaha bo ta haya den politica, un o mas persona cu ta kibra cu e molde di loke ta actuacionnan estrictamente partidista, pa asumi posturanan cu ta traspasa e fronteranan di loke ta netamente politica partidista. Mi no tin ningun idea pakico Prome Ministro a hacie durante e conmemoracion di e fecha natalicio di Betico, ni con leu e kier a bay den su enfoke di e figura di kende ta, pa mi, e mas sobresaliente di e ultimo decadanan den e mundo politico di Aruba.
Nos a pasa hopi dia lesando y scuchando e debate entre e resto di e liderazgo di MEP y e duo Marisol-Mervin, den cual palabranan fuerte a cay di ambos banda y ningun solucion por a ser logra pa un transicion cu por a scapa e unidad di MEP. E dos damanan a declara nan mes independiente y e resto di MEP a sigui conforma un partido cu 6 asiento y un lider di partido nobo den e persona di Candelario “Booshi” Wever. Apesar di e condena cu e tin colga riba su cabez, regalo di Rudy Lampe via Corte, e ta papiando como e lider natural di MEP. Y e no ta haciendo e malo tampoco! E tono a cambia di uno violento, amenazador, pa uno mas inteligente y apaciguador. Di palabranan condenatorio a pasa pa deseonan di exito, na cual Evelyn tambe a uni su mes. Mi ta spera cu ta te ey tambe nos lo sigui mira e desaroyonan negativo cu a surgi despues cu e dos damanan parlamentario a inicia un tanda nobo den e ramo complica di politica, mistica di partido, lealtad incondicional y e derecho di tin un opinion propio y di exprese libremente.
Prome cu tur cos, mi deseo pa un aña 2011 yen di salud pa henter nos poblacion, y alavez, yen di felicidad y prosperidad.
Na cuminzamento di aña hopi ta tira un bista riba esun cu a pasa pa mira ki sentido nan por saca di dje. Pa loke ta trata e interpretacion personal di cada ken, esey ta keda circumscribi na e individuo, y no por ser distribui entre henter e poblacion.
Ya criminalidad na Aruba a yega un nivel intolerable. Tiroteonan ta ocuriendo cu un frecuencia increible, y e daño cu nan ta causa, no solamente na e victimanan, sino tambe na nos isla, ta indescriptible. Bo no ta sintibo sigur mas riba un isla cu tabata un modelo di trankilidad y tolerancia apenas algun aña pasa. Entre asaltonan, atakenan y ladronicia, e paz di nos ciudadanonan a ser afecta di tal forma cu nan ta biba bao e sombra di temor. Sali anochi riba caya ya no ta un riesgo so, e ta tambe un imprudencia. Bay un centro nocturno pa pasa un rato agradable a para bira un aventura den un jungla pobla pa agresornan sin consenshi. Kico cu ta por sosode sin spera, y si suerte ta di bo banda bo por sali ileso di cualke incidente. Si no, anto bo a caba di conoce bo mala suerte.
No tin ningun hende mas na Aruba cu ta inconsciente di loke ta pasando, especialmente den e ramo di criminalidad. Corantnan, Radio emisoranan y canalnan di television ta yen di e tipo di noticia aki cu ta cay tur hende pisa, o sea un atraco, un asalto na cas, un bandidahe riba caya, enfin, di un of otro forma cu ta kibra e paz tradicional cu nos a disfruta mayor parti di nos bidanan.
